Daniyel 9 - Bible en Guidar

Əkkam na Daniyel

¹ Aka əzva maddaabəŋ na Dariyus wətən Ahasuwerus mə Medə, asan aka əzəm məlĩ aka dələv na Kaldiya,

² aka əzva nan taka aka məlĩ nani, in Daniyel, nəŋɗanək addəv ɗerewel salala na, Yerusalem wasan va kiməski wəzva kaklaw buhul va Yawe anah sən məskəleŋ Yeremiya.

³ Yas nəzi haraw sek aka Daya Maŋgəlva, nəkkamani də əɗɗa meme gəm də əgul lukut na sakə.

⁴ Nəkkamanək Yawe Maŋgəlva nawa. Nənahək na: Kamə Daya Maŋgəlva matuŋguk kənani, nawgeslne' suk kənani. Kakkpaŋgan mok səka wənmiyna nok ɓa, is tat ərban əŋgla nok pay pak viyit ɗiy məzəɗɗaŋ wəŋgla noko gəm məzuɓe'en sənən an kəziwgini.

⁵ Məgəɗək mambray, məgəɗək an dəslə ɓa. Məs mambray gəm məɓoŋgəm mənani, məzban an kəziwgin gəm tivenanziya nok ɓa.

⁶ Məɗɗaŋ wəza nok məskəleŋɗe dəpeleŋ də iya nok sit milyeŋge namə, deyeɗe namə, efiŋgiɗmə gəm ɗiy naka dələv nam pakəŋ na, məprəm met ɓa.

⁷ Daya, təstəs noki; nam wil akam pay dəpaŋka, aket ɗiy na Yuda dit en na Yerusalem, aket Israyelɗe pakə, en go'o dit en faraɗa, aket dilveŋge məs kəɓɓeh adak vi aɓoŋgoŋ ki mok pakə.

⁸ Yawe, wil akamə, aket milyeŋge namə, deyeɗe namə gəm efiŋgiɗmə vi məgəɗək mambray azoko.

⁹ Ulasahã gəm əvvuyon mambray na, na Daya Maŋgəlva na miyi, də məsam məɓoŋgəm akok zlaŋgə.

¹⁰ Ya məprəm ma Yawe Maŋgəlva nam ɓa, məɓe'sən mahenziŋ məs apsəm də met məɗɗaŋ wəza nan məskəleŋɗe ɓa.

¹¹ Mə Israyelɗe pak amzlahaŋgək səka mahenziŋ noko, aɓoŋgoŋko dəprəmən mok ɓa. Ndəni wəray məsway akan məverin addəv mahenziŋ na Moyis məgəɗ wəza nok is Maŋgəlva ade akamə vi məgəɗ sukuk mbərayən.

¹² An kənah naɗɗa akamə gəm aket deyeɗe nam pakə, kəknahanək də wəki tatwãh metiŋgin aka Yerusalem, zeŋvin dəgəɗ ɗah aka dələv ɓa.

¹³ Tatwãh va məverin addəv mahenziŋ na Moyis pak agəɗək akamə. Ya məffeten makra Yawe Maŋgəlva nam ɓa, məppan mambray nam mərahgən maɗɗula addəv gegesiŋ nok ɓa.

¹⁴ Yawe appan tatwãh ade akamə, vi Yawe Maŋgəlva nam təstəsi addəv an adaɗɗa pakə, ya nam məprəm man ɓa.

¹⁵ Kakaŋ na Daya Maŋgəlva namə, kigilgitik ɗiy nok də va gbogboŋ nok səka dələv na Eziptə, kəɗɗak sləmok agilik va pay dəpaŋka. Məgəɗək mambraya, məraygənəka.

¹⁶ Daya, ammba wəza təstəs noko, kamə appan ədagədəv dit herɗe nok səka walaŋgəla-metiŋ na Yerusalem vi mossorgo salala noki. Vi mambray namə gəm heslepe net efiŋgiɗmə, Yerusalem dit ɗiy nok akkpaŋgək zəga nawra net ɗiy en dəssoŋ kiyəm tərwəsl pakə.

¹⁷ Kakaŋ aprəm əkkam də əppu' na gawla noko Maŋgəlva namə, ammba iya noko Daya, appar horok awla gəla nok məɓzlunəŋka.

¹⁸ Apak sləmoko aprəma Maŋgəlva nawa! Akol horoko awla wəzəmsahã namə gəm na walaŋgəla məs iya nok adawya adaka. Mədakkomok na, vi təstəs nami ɓa vi ulasahã nok metiŋgini.

¹⁹ Daya aprəma! Daya, avvuyon səmə! Daya, apak sləmoko! Aɗɗa, kədanziya ɓa vi sləmok tay iya a walaŋgəla-metiŋ noko gəm awaleŋgit ɗiy noko Maŋgəlva.

Kəleŋ aka lumu taka təl kaklaw buhul

²⁰ Nəzbanək əpel də əkkam gəm ərban mambray naw də an net ɗiy naw mə Israyelɗe, gəm əppu' aba Yawe Maŋgəlva nawa, aka wən na mossorgo salala noko.

²¹ Aka in tat əkkam tagayɗa, Gabriyel ɗəf nəwəl addəv ula maddaabəŋ nak aveŋgik adek əne'u aka pay naɗɗa əvəl sən Maŋgəlva də moskoyo.

²² Aprəman suka, apel suwa, amna: «Daniyel, kakaŋ nəgil na, kapsuk əsəni.»

²³ Aka kədappu'o, əpel agilke, naw nəde na vi kawboton suki, vi Maŋgəlva aŋglukuk diyɗa. Akoson əpel vani gəm aprəm gabba ula.

²⁴ Mətaw siti lumu taka təl kaklaw buhul sit ɗiy noko də walaŋgəla-metiŋ nok salala, vi kawtak əggbak ma gəm kawziwgin mambraya, kavvuyon heslepe, təstəs dəsangən hã faɗə, vi ula də kəleŋ dəsoŋgən gesiŋ gəm kawpesl məwele an salala day.

²⁵ Asən kana, aprəm gabbani: Səza əpel agil nawmilye vi karkan Yerusalem hã gap aza wəzza na mesiya na, wəzva buhul təl buhul wagəɗə. Dərɓaga wəzva buhul təl kaklaw sləre kiyən sula na, karkani walaŋgəla-metiŋ də zlava nani, ya pay nan watoŋ də tatwãh diyɗa.

²⁶ Dərɓaga wəzva buhul təl kaklaw sləre kiyən sula naka, kawbayni mesiya, zəga tay adawrəh ɓa. Məlĩ mbərən wade dit məzəlpaŋ nani, wazan walaŋgəla də gəla salala. Əgrak wade va iŋkile muguloŋ təkiya, əbayma nan na, əgay gəm əza wasan va Maŋgəlva atawa.

²⁷ Waska wəlet ɗiy də wənmiyna addəv wəzva buhul, səza pəɗak na pay van atoŋgu, watak wən na əzaɓ-Maŋgəlva gəm əvəla. Məzan zəga van waɗɗa zəga daryaw nani, hã gap pay nawzan va an məɗiyən pay mbes əmbesni.