Daniyel 8 - Bible en Guidar

Ndargayã gəm hawã ( 8:1—9:27 ) Ula masula'ən: ndargayã gəm porsok

¹ Addəv wəzva mohoko'ən na Beltasar aka məlyã, in Daniyel nəssinik əmpa, mbəksa əssine maddaabəŋ.

² Addəv əssine vani, nərəhək ki zu a Susan, walaŋgəla-metiŋgin na kivadələv na Elam gu'o ama məlpa Ulay.

³ Nəslanək harawa, yas nula ndargayã ziwwe ama məlpa də mohon sula, mohon sula məɓeyti, an məɓayən day dəgil dərɓedərɓe.

⁴ Nulak ndargayã van əbayan təki kəlammba pay na moskoyo, kəla disiŋ gəm kəla dohoŋ. Zəga mamayã tay dəɓap əziw aban ɓa, ya kaɓapi wəkõhgən ɗəf səddəv gagdak nan ɓa. Tay əɗɗa an aŋgələ ya gagdak nan tay əɓay abe abe.

⁵ Gala nəsaw əɗɗum akani, nulak Murgo adek sə kəlammba pay na moskoyo; tay əbbal aka dələv pak məza əne' aka dəlvafuŋ ɓa. Murgo vani, tay də mohon metiŋgin awalaŋ harani.

⁶ Agapək aza ndargayã də mohon sula nəwəl ziwwe ama məlpa naka, yas anzan akan zən soksoku.

⁷ Nulak arəmək makra də ndargayã. Aŋgbosuk ndargayã, aŋzliw mohon sulegiti, yas ndargayã nak dəɓap əziw aban ɓa. Azlbak afuŋ yas andappani, ɗəf tay dəɓap əkõhgən ndargayã səban ɓa.

⁸ Murgo van ablahək sawɓa, səza aggrak əblah nani, mohon metiŋgin puɗoŋgu; yas mbirit poɗo məgəɗ sənən gərəŋ sən ɗəf agilyoŋ a gəlani, aɓe'eŋ də tapaslay pay poɗo pakə.

⁹ Yaŋ mohoŋguk muzliyək təgil səza taka nereti, təɓay diyɗa kəla dohoŋ, dəmmba pay nampum gəm dəka dələv an lelewe.

¹⁰ Təɓayək gap azet məzəlpaŋ na disiŋ; təslaŋgək mbirit səmmbet məzəlpaŋ vani gəm mbirit səmmbet ŋgirzleɗ afuŋgu yas təndepeti.

¹¹ Təɓayək gap aza Daya Məzuɓappak na disiŋ, tətakək əzaɓ-Maŋgəlva an nawdə sən ɗayɗayə gəm təɓzluwək gəlamatuya nani.

¹² Aka wən naggbak ma, məpsəti məzəlpaŋ na disiŋ ammba vata gəm əzaɓ-Maŋgəlva nawda ɗayɗay naka. Təzganək gegesiŋ afuŋ, an təgəɗ pak adawək ammbata.

¹³ Nəprəmək maslay əpele, maslay mbərən attokonək ma an məzupel na: «Pay ŋgbəŋgbar zəgeɗ məs kəwəl addəv əssine aka wən nawzaɓ-Maŋgəlva ɗayɗayə, kiɓəɓəl məraygən təkiya, gəlamatuya məraygəni gəm məzəlpaŋ na disiŋ adassoŋ məndepet adaɗɗan di?»

¹⁴ Yas azlan na: «An moskoy də mompumo gabal sula də səkat hoku atoŋgoŋko. Sədərɓagani, kawpeslni təki salala va lahəŋka.»

Əboton ula an masula'ən

¹⁵ Aka in Daniyel nəsaw addəv ula vani, nədattokon gabbani, nəwələk zəga va ɗəf ade aziw abawa.

¹⁶ Nəprəmək wəla ɗəf sə məlpa Ulay na, amna: «Gabriyel, aboton sən gabba ula van sən ɗəfəŋka.»

¹⁷ Yas ade a maŋgavawa. Səza ade, geslne arməwək diyɗa, nəskotək ngomu. Yas anah su na: «Is wət ɗəf kəŋkə, aprəma, an kəwəl na, awəl sənək pay naggrak dəlva.»

¹⁸ Gala adawpelsuwa, kiyu azlzlaɓka, nəskotuk də magədəvu afuŋgu. Ndən rəŋguwa, asilgu ziw a gəlawa.

¹⁹ Yaŋ amna: «In tat yaŋ ərban suk an dədawtoŋ səɓɓa ədagədəva, vi məziwgəni pay na wəgrak dəlva.

²⁰ Ndargayã kəwəl də moho akan sulaŋka, məlĩ na Medə gəm na Persiya əŋgə.

²¹ Murgo məsdogozo, məlĩ na Gresi, mohon metiŋgin na walaŋ haranəŋka, nan məlĩ an maddaabəŋgi.

²² Mohon poɗo dəgilyoŋ gala an maddaabəŋ agəzlə, məlyeŋge poɗo wasɗaŋ səza dələv vani, net wassoŋ də gbogboŋ va nan ɓa hara.

²³ Aza əgrak əzəm məlĩ neti, an mambray net məs mambrayɗes aknahək gərakə, məlĩ tatrãh wasani, wambəɗet ɗiyi.

²⁴ Gagdak nan waɓayə ya də gbogboŋ nani ɓa. Waraygən təki naɗɗa gərəŋ akani; an adaɗɗa pak wadaw ammbani. Wazet ɗiy guromɗe gəm ɗiy salala.

²⁵ Də pepet nani, əmbəɗet ɗiy wadaw ammbani. Addəv əɓaygən kizəni wazet ɗiy diyɗa, wagay də Məlĩ net milyeŋge. Ya nan wazə məza də gagdak na va ɗəf ɓa.

²⁶ An mənahən kəwəl aka moskoy gəm də mompumo pakəŋka, nan gegesiŋgi. Ya nok arma wən na ula van haɗamə, vi ambərsənək əvoŋ diyɗa.»

²⁷ Nawa, in Daniyel, nəsawək londoru, nəvoŋgək gbəgba əvoŋ ɓaɓayə. Səza nəmbələ, nəgəmək wəza naw aba məlyã. Ya nəsawək gərəŋ sən ula vani, vi gabban aprəm ɓa.