Daniyel 7 - Bible en Guidar

An Daniyel awələ ( 7:1—12:13 ) Zəgeɗ memeyẽɗ poɗo 7:1-28 Ula maddaabəŋ na Daniyel: zəgeɗ memeyẽɗ poɗo

¹ Wəzva maddaabəŋ na Belsazar asan aka məlĩ a Babilon, gala Daniyel asan ɗuffo aka zəga nawvoŋ nani, assinke, awələk zəga, yas aver essine vani. Ətəŋ nan yaŋka.

² Daniyel apeli, amna: Dəfəɗ addəv əssine naw na, nəwələk vẽŋvil gəlet poɗo asilyoŋguk sə disiŋ, aɓlanənək pehe metiŋgini.

³ Zəgeɗ memeyẽɗ dirnike-dirnike poɗo agilyoŋguk sə pehe, beymet pak temteməŋgə.

⁴ An maddaabəŋ tay va Ɓoolu, tay də persleken na Gazla. Nulak daptiwnin perslekeni; zəga nak asilik səfuŋ aka tələn ziw va ɗəf adawziwe, yas məpsən makra na ɗəfa.

⁵ Masula'ən na tay va zəga darawən adawyaŋ Ursə, asilik hoŋko'o zlaŋgat taka. Embehe hoku tahəŋ a mani, eŋgisl də slayni, yas məpel sən na, «Asili ampər slu diyɗa»

⁶ Səɓɓan na, in tat əzban ula, nəwələk zəga mbərən agilke. Nan tay va balgam ya tay də persleken poɗo aka gəɓan na bəŋga, tay də kiyən poɗo yas məpsən gagdak avani.

⁷ Sə dərɓaga aska, in tat əzban ula, Nulak zəga mamayã mopoɗo'it agilke. Tay də gbogboŋgo diyɗa, də ezlezle hã geslne wərma ɗəfa. Slayən na təbəz tay ɗaslɗasl amani vi kempir gəm kawtekeɗ medembirgiti, tay əndepit də tələn; awɗakək dit zəgeɗ memeyẽɗ en maddaabəŋ kiyən naka, ya tay də mohõ akan kəlawə.

⁸ Gala nədasəŋgləkan mohõni, nəwələk mohuk mbərət muzliyak təgilik a weleŋgit en maddaabəŋ; mohõnɗe hoku səmmbet en maddaabəŋ nek apoŋgoŋguk səbata. Mohuk vatə harat tay va hara ɗəfa, ya mat tay əpel nawkaɓa.

Ətawwən na Maŋgəlva

⁹ In tat əzban ula, nulak məɗiyə mezeŋgeɗ na məlyã, yas mazza ade pay ɗew. Lukut nazan tay babar ndasl va ɓeɓrezlerizze, muhur kiyən tay va zeŋze saksakə, mazaŋga na məlĩ nan tay əwiɗ va offo, təl mazaŋga van tamə va offo mərmani.

¹⁰ Məlpa na offo tay ədaw əgilye səbani. Ɗiy gabal kəlaw təl gabalɗe tahəŋ əɗɗaŋ wəza abani; ɗiy məza əŋɗa net tay ɓa tahəŋ ziwziw abani. Səza mətəŋ wətawwəna, məkolti ɗerewelɗe.

¹¹ In tat əzban ula, səza mohuk nak tədawpel əpel nawkaɓa, in tat əzban ula gala məbay zəga mamayã naka, yas məpəseken slu nani məzgan akoffo.

¹² Məggbuni gagdak net zəgeɗ memeyẽɗ mbirit neki yas məppet dəssoŋgən mederet hã gap pay an mətaw siti.

¹³ In tat əzban ula, addəv əssine naw dəfɗa, nuwələk va wətən ɗəf aka slaybuwən əpirken sə disiŋ; alək hã aza mazza naka, yas məkan abani.

¹⁴ Məpsəni daya, gagdaka gəm məlyã: ɗiy pakə, dəlveŋge temtem gəm ma temtem pak aɗiyənək kini. Gagdak nan gagdak an faɗi, aggrak na ɓa, məlĩ tamə azəna ɓa.

Əboton ula an maddaabəŋ

¹⁵ Makraw in Daniyel azlahka, an nəwəl atapawka.

¹⁶ Nədderik aza ɗəf taka sə weleŋgit ɗiy en dəssoŋ ziwziw adaka, nəttokonək gabba zəga an nəwəl pakə. Anah suwəka gəm aboton suwək gabbani.

¹⁷ Anahək na: «Zəgeɗ memeyẽɗ gugriɗ poɗoŋ na: Milyeŋge poɗo wasilyoŋ səka dəlvafuŋ;

¹⁸ Sədirɓegeti, ɗiy en salala na Məsəɗəɗə warəhən məlyã, neti, məlĩ wasan avet hã faɗ ka faɗə.»

¹⁹ Ndəni, nəŋgəl nəsəngən zəga mamayã mopoɗo'o, məs dəsan temme səzet en mbirit neki, məs də ezlezle azan diyɗa məs slayən na təbəz amani gəm perzleŋ tələn na təbəz pepreŋge, məs dəmpir gəm dətekeɗ gəm wəndep membirit ammba tələn naka;

²⁰ Yas nəttok aket mohõnɗe kəlaw naka kini, gəm aka maɓɓan dəgil na, mohonɗe hoku apoŋgoŋ səbat naka, mohon van, nan tay də harani gəm man məzəwpel əpel nawkaɓa. Ulan na badak zən adayək kiyit en membirti.

²¹ In tat əzban ula, yaŋ mohon nan agəɗ wəgay dit salalaɗe na Maŋgəlva yas aska wəleti,

²² hã gap mazza nak pay kawka wən ammbet ɗiy salala na Məsəɗəɗə. Səza pay nan agapə məpsiti gagdak na məlĩ ammba vet ɗiy na Maŋgəlva.

²³ Anah suwək na: Zəga mamayã mopoɗo'ən na, məlĩ naka dəlvafuŋ mopoɗo'oyi, wasan temme səzet milyeŋge mbirit pakə, nan wazəm dələv pakə, wandapani gəm wasər kuɗkuɗu.

²⁴ Mohon kəlawiŋki: Milyeŋge kəlaw wagilyoŋ səddəv məlĩ aŋka; sədərɓegeti məlĩ mbərən wampə. Nani, wasan temme dit en maddaabəŋ; waska wəlet məlyeŋge hoku;

²⁵ Wapel mbərayən aka Məsəɗəɗə, wazəmgit sahã net ɗiy salala na Məsəɗəɗə, waynan a makran vi kaddəɗan əŋɗa na wəzva gəm mahenziŋ, kepsini ɗiy salala na Maŋgəlva ammba van addəv wəzva hoku də mani.

²⁶ Səɓɓan kan na wətawwən wagəɗə, kaggbukni gagdak nani, kawzani dəzəgən kakãhə.

²⁷ Gagdak gəm mẽmẽtiŋ net milyeŋge naka dələv pak kapsiti sit ɗiy salala na Məsəɗəɗə. Gagdak na məlĩ nan gagdak nawsan faɗi yi; ɗiy gugriɗ naka dələv pak wagagdakanəni gəm waɓe'eŋ sənəni.

²⁸ Vaski əssine naw abaymani. In Daniyel, əɗɗum naw atapawka vi nəgeslne'ək sawɓa, nəpokuk barə, nəzaɓanək wən nan a makrawa.