Daniyel 6 - Bible en Guidar1 Dariyus, mə Medə apaŋgək aka məlĩ gala asan də wəzva kaklaw sləre kiyən sula. Daniyel addəv vov net Ɓooliɗi 2 Dariyus awlak na lewi nawɗi guvernerɗe səkat də kaklaw sula, dəssoŋgən aka va na məlĩ nani. 3 Aɗiyək deyeɗe aket hoku, Daniyel yi taka nereti, Siti kəta guvernerɗes adawki sitin wən pakə vi ərəh na məlĩ adaddak ɓa 4 Daniyel adayək kiyit deyeɗe gəm kiyit guvernerɗe vi əmpəs vandən tay ɓa tay akani, yas məlĩ aynan wən nawɗiyən daya aka dələv nan pakə. 5 Yaŋ deyeɗe gəm guvernerɗe nek akayaŋ heslepe aza Daniyel dəka wəza nan aba məlyã ya dərahaŋ heslepe may mambray ɓa vi ɗəf məzətaɗ kiyzəni yi, əzgət may mambray tay azan ɓa. 6 Yaŋ ɗiy nek anahaŋ na: «Heslepe tay mədawrah aza Daniyel ɓa, an dəza mahenziŋ na Maŋgəlva nani ɓa ɓa.» 7 Deyeɗe gəm guvernerɗe nek addoŋ də kakara aza məlyã, anahaŋ sənən na, «Məlĩ Dariyus! Asok hã faɗə! 8 Deyeɗe naka dələv nok pakə, deyeɗe na bərzləŋna-kivadəlva, ɗiy na sləma, məzusəɓaŋgə dit deyeɗe na kivadəlva, aslerinək met vi kawnah sən məlĩ dəziwgəngən wən an naɗɗa: Addəv wəvoŋ kaklaw hoku, ɗəf an dəkkaman maŋgəlva nani may ɗəf mbərəni, an anoki kaka ɓa na məlyã, nazgani addəv vov net Ɓooliɗi. 9 Kakaŋ na məlyã! Aziw aka an mətakən, aɗi vok aka an məverin vi adaddəɗ ɓa, va mahenziŋ net mə Medə dit mə Persiɗ addəɗ ɓaŋka.» 10 Vini kan məlĩ Dariyus aɗi van aka ɗerewel məs məver an mətakən. Məzgani Daniyel addəv vov net ɓooliɗi 11 Səza Daniyel aprəm na wən tay məziwgin vaska, atoŋgək eŋgil addəv gəla an na disiŋ, təki tay məppan foŋgo dəza təkzlumun na kəla Yerusalem. Təl hoku a ma əsɓəta adagduk əkkam gəm əgagdakan Maŋgəlva nani, vas assərək əɗɗa tak wənəska. 12 Ndəni ɗiy nek addoŋ də kakara arəhən Daniyel tay əkkam gəm əgagdakan Maŋgəlva nani. 13 Yaŋ ambataŋ aba məlyã, apeleŋ aka an məlĩ atakə. Aɓɗaŋ na: «Afən dəlva, kəziwginək aka dələv noko, addəv əvoŋ kaklaw hoku na, ɗəf dəkkaman maŋgəlva nan may ɗəf maɓɓan pakə, an anok is məlĩ tə kaka ɓa na, nazgani addəv vov net Ɓooliɗi.» Ndəni məlĩ azlani, amna, tay va mahenziŋ net mə Medə gəm mə Persiɗi, addəɗ na ɓa. 14 Yaŋ agəmən əpel anahaŋ aba məlĩ na, «Daniyel, taka nemmbet məsimgit sə Yuda, dəɗiyuk azan va zəga ɓa məlyã, an mətakən kəɗi vok akan dəɗi azan va zəga ɓa. Tay əkkam təl hoku addəv wəsɓəta.» 15 Səza məlĩ aprəm əpel vani, dəl sən kpak ɓa, akayək tive kawkõhgən Daniyel. Hã gap pay bətə agəɗək va adaɗɗa pak kawkõhgəni. 16 Ndəni ɗiy nek addoŋ də kakara aza məlyã anahaŋ sənən na: «Məlyã, kəsənən an dəsan addəv mahenziŋ net mə Medə gəm mə Persiɗi, an mətakən məlĩ aɗi wən nan pak na, addəɗ ɓa.» 17 Məlĩ apsitik tive, akiynən Daniyel vi kazgan addəv vov net Ɓooliɗi. Məlĩ aɓsən Daniyel na: «Maŋgəlva, məs kədawgagdakanəŋ, wakõhguko!» 18 Məkiyi kalaɓə, məmpan ma vov naka, yas məlĩ aɗi ndama nan akani gəm an net məɗɗaŋ wəza nani vi karban na zəga tay naddəɗ aka an dəwəl sən Daniyel ɓa. 19 Məlĩ amndanək eŋgil ananda, avoŋgək dəfəɗ nan kim dəzəm ɓa, gəran təl azan ɓa ya dəɓap wəleŋ ɓa. Daniyel agilik səddəv vov net ɓooliɗ bartata 20 Məlĩ asilik pumu, al də kakara ama vov net Ɓooliɗi. 21 Səza məlĩ adder ama vovu, ayak Daniyel də wəlan sahə amna: «Daniyel! Daniyel! Gawla na Maŋgəlva məs dəsan madarani! Maŋgəlva nok məs kədawgəɗ sən wəza də zuk soksokəŋ akõhgukuk səmet Ɓooliɗ sa?» 22 Yaŋ Daniyel azlan ama məlĩ na: «Məlyã! Ənziya nok dəsan hã faɗə! 23 Maŋgəlva naw aslənək maslay nani, amsanək met Ɓooliɗi, dəɗɗaŋ suwən zəga ɓa, vi naw də mazlibezlibe na maw nani, gəm abok is məlĩ dayday na, mbərayən tay nəgəɗ ɓa.» 24 Məlĩ annekik sawɓa, anahək dəgilgənəngən Daniyel səddəv vov net Ɓooliɗi. Səza agilginin Daniyel, awlanənək na zəga tay dərəŋgən ɓa, vi aɗiyək əɗɗum nan aka Maŋgəlva nani. 25 Məlĩ aɗiyək wən nani, dərmeningin ɗiy məs dəzəmən ki Daniyel, məzget sap dit kirtit gəm gil net addəv vov net Ɓooliɗi. Əgap net a vovu, Ɓooliɗ aveŋgeŋ aketi, aweslnin dit sleŋsleŋɗe neti. 26 Ndəni məlĩ Dariyus aver sit ɗiy pakə, dəlveŋge temtem gəm ma awandi naka dələv pak na: Zazay dəsan akokum! 27 Nəɗiyək wən nani, aŋga aka dələv pakə, ɗiy dəgeslne'eŋ də əkker sən Maŋgəlva na Daniyel. Vi ndəni Maŋgəlva madarani, tay hã faɗə. Məlĩ nan agrak na ɓa, gagdak nan wasan hã faɗə. 28 Ndəni məbit ɗəfa gəm məkõhgən ɗəfa; Ndəni məgəɗ seserge gəm sekeneɗ a disiŋ də aka dəlvafuŋ, Adan akõhgənək Daniyel sə met Ɓooliɗi. 29 Daniyel arahək gagdak aka pay na məlĩ Dariyus gəm aka pay na məlĩ Sirus mə Persiya. |
All right reserved
Bible Society of Cameroon