Daniyel 5 - Bible en Guidar

Waynabaya na məlĩ Belsazar

¹ Məlĩ Belsazar adək waynabaya, ayek məɗɗaŋ wəza nan gap gabal, yas asaŋ mbazla matakə

² Aka adawsaŋgə, Belsazar aɗiyək wən nan dəkisiningən hiliŋgiɗ na meleŋge gəm na təbəz babar məs Nabukodonozor afən andə səddəv gəla na Maŋgəlva na Yerusalem vi dəsaŋgən mbazla dənɗaŋgə. Sən məlĩ vani, məɗɗaŋ wəza nani, gəreŋgiɗin gəm gil məɗɗaŋ wəza nani.

³ Yaŋ məki hiliŋgiɗ na meleŋge məndet səddəv gəla na Maŋgəlva sə Yerusalem neki, məlĩ vani, məɗɗaŋ wəza nani, gəreŋgiɗin gəm gil məɗɗaŋ wəza nan asaŋgək mbazla dənɗaŋ.

⁴ Asaŋgək mbazla yas agagdeketin meŋgilveɗ məɗɗet də meleŋge, də təbəz babara, də təbəz pepreŋge, na təbəz titire, na wəlaŋga gəm na gərma.

⁵ Go'ləŋ pərəŋgiɗ va ɗəf arbaŋka: yas adawvereŋ go'o də təki nawɗi lalam aza gəla na məlĩ məkkəɗən babara. Yas məlĩ awla va ɗəf məzuver naka.

⁶ Hara məlĩ apokuk barə, əɗɗum nan attapanka, sergezlen patpatə, yas takpran adargisleŋgi.

⁷ Məlĩ aŋgəzlək vaŋvəl dayadaya vi kawye məɗɗaŋ tetele, mə Kaldiyeɗi, gəm məkosonən wən net ŋgərzleɗi. Məlĩ anah sitik məsmaɗɗulet na Babilon na: «Ɗəf an dəɓap wəŋɗan an məverniŋka, an aboton suwək gabbani, wagul lukut məhəmən pepreŋge, warah everzleɗ na meleŋge awlani, wasan mohoko'o də gagdak addəv əzəm məlyã.»

⁸ Məsmaɗɗulet na məlĩ pak atoŋgoŋko, ya dəɓapən wəŋɗan an məverin vi kawnah sən məlĩ an aŋgəl wənah ɓa.

⁹ Məlĩ Belsazar asanək gərəŋgə, hara məlĩ apokko, mbagit məɗɗaŋ wəza nan met hã'kpumɓu.

Daniyel abotonək an məverin

¹⁰ Səza Ma'ãy, təprəm əpel na məlĩ gəm net məɗɗaŋ wəza nani, tətoŋguk addəv gəla na waynabaya, yas tənah na: «Asok hã faɗə məlyã! Əɗɗum nok attapok ɓa, zuk asan sirip ɓa.

¹¹ Ɗəf tay aka dələv noko məs Zeŋgile salala na Maŋgəlva akani. Aka pay na afuk na, ɗəf van arbək na tay də wəsən moggon akani, də wəsən nawkoson gabba wəna, də maɗɗula akan va net meŋgilveɗi. Yas afuk, məlĩ Nabukodonozor, aɗi daya aket məskaŋ heligi, məɗɗaŋ tetele, mə Kaldiyeɗi, gem məkosonən wən net ŋgərzleɗi.

¹² Tay də əmpəs na sekene akani, wəsən nawgohon zəga, nakkpumon əɗɗum kawbotet əssineɗi, nawsən asənasəna gəm nawzaɓan wəna. Dəya sukun Daniyel məs məlĩ alvan na Beltasar kakaŋka, ya waboton suk an aŋgəl kawnahã!»

¹³ Məkani Daniyel aba məlyã, məlĩ apel sən Daniyel aɓsən na: Istə Daniyel səmmbet ɗiy məsimgit sə Yuda məs məlĩ afu aki sə Yudaŋ sa?

¹⁴ Nəprəmək na is tat də əmpəs na Maŋgəlva salala, is tat də wəsəna, də wəsən nakkoson gabba wəna, maɗɗula tay va ndən ɓa tay akoko.

¹⁵ Məsmaɗɗulet gəm məɗɗaŋ tetele azzoŋgək lahəŋ aŋka, vi kanɗan an məverən gəm kawboton su gabbani, ya dəɓapən əboton suwən gabba əpel van ɓa.

¹⁶ Naw nəprəmək akok na, nok wakəɓap wəbotet wənɗe gəm ətawwən na asənasəna. An kəŋɗanək an məverin, kənah suwək va aŋgəl kawnahã na, wakərah lukut məhəmən moggon pepreŋge, verzleɗ na meleŋge awloko, wakəsok mohoko'o də gagdak addəv məlĩ nawa.

¹⁷ Ndəni Daniyel azlani, anah aba məlĩ na: Zəgeɗ an kədawvay na vaw dəsoŋ sukuni, en kədawvay na makaryam na epsin ɗəf mbərni. Ya an məvernəŋ na, wanəŋɗan sən məlyã, wanəboton sən gabbani.

¹⁸ Məlyã, Maŋgəlva Məsəɗəɗə dəpsən məlyã, mẽmẽtiŋge, gagdaka gəm əwiɗ sən Nabukodonozor afuko.

¹⁹ Vi mẽmẽtiŋ məs apsəni, vandayɗe pakə, dəlveŋge gəm ma awandi pak tahəŋ əkker sən geslne' səni: tay əbay ɗəf va aŋgələ, tay əppan ɗəf madaran va aŋgələ; tay əɓaygən ɗəf an aŋgələ gəm əprikgin ɗəf sə təki məs asan va aŋgələ.

²⁰ Səza aɓaygən kiynə, aɓɓəlan kiyən hã ndən əkaɓa, məzgani səka mazaŋga na məlĩ nani, məggbukni gagdak nani.

²¹ Mərɓahni faraɗa sə weleŋgit ɗiyi, makran kpaŋ va net zəgeɗ nawra. Ataɗək dit Korɗe nawra, azəmək kevile va net wasliɗe, minɗe aziyaŋgək akani, hã gap ataf na Maŋgəlva Məsəɗəɗə yi daya aka məlĩ net ɗiyi, tay əɗi ɗəf an aŋgəl pak aka məlyã.

²² Ya is Belsazar wətəni, də kəsən alabaras zlaŋ na kəŋgəm əɓe'gən kiyuk ɓa.

²³ Kərgak mokrok də Daya na disiŋ, yas kigilgit hiliŋgiɗ na meleŋge səddəv gəla na Maŋgəlva. Isi, məɗɗaŋ wəza noko, gəreŋgiɗko gəm gil məɗɗaŋ wəza nok kəsaŋ mbazla dənɗaŋ. Yas kəgagdeket məŋgilveɗ na təbəz babara, na meleŋge, na təbəz pepreŋge, na təbəz titire, na wəlaŋga gəm na gərma, də aɓapaŋ na ula ɓa, əprəm ɓa, əɗɗum ɓaŋ pakə. Kəgagdakan Maŋgəlva məs əmpəs nok gəm tiveɗ nok pak assoŋ avan ɓa.

²⁴ Vi vaski aslən va ɗəf dəvergən əverəŋka.

²⁵ An məverin van yaŋka: Mene, Mene tekel gəm Parsin.

²⁶ Aŋki məs aŋgəl kawnahã: Məne, Məŋɗani: Maŋgəlva aŋɗanək ənziya na əzəm məlyã noko yas aziwgini.

²⁷ Tekel, wəsla gagdaka: məslani gagdak nok aka məsləgagdaka ya gəsi.

²⁸ Peres, Uɗaka: Məlĩ nok awɗakka, yas məpsit sit mə Medə gəm mə Persiyeɗe.

²⁹ Yaŋ Belsazar anah dəskansənəngən lukut məhəmən pepreŋ sən Daniyel gəm everzle na meleŋge awlani. Anahaŋ aka wən nan na dəsangən mohoko'o də gagdak aka dəlva.

³⁰ Addəv dəfɗəska'e, məbay Belsazar məlĩ na Babilon.