Daniyel 4 - Bible en Guidar

¹ In Nabukodonozor, in tat də maɗɗulaw eŋgil anawda, zu paparpapar addəv gəla na məlyã.

² Aka nəsaw ɗuffo aka zəga nafna nawa, nəssinke, ya azlahgənək makrawa, əssine naw van atapawka.

³ Nəɗiyək wən nan kawki məsmaɗɗulet naka dələv na Babilon pak abawa, vi dəboton suwəngən gabba əssine nawa.

⁴ Yaŋ məskaŋ heligi, məɗɗaŋ sekene, mə Kaldiyeɗi gəm məkosonən wən net ŋgərzleɗ atoŋgoŋgu, nənah sitik əssine nawa, ya dəɓap wəbotoŋ suwən gabban ɓa.

⁵ Dərɓedərɓe faɗ na, Daniyel məs adawyaŋ na Beltasar va iya na maŋgəlva nawa, dətoŋ azawa; əmpəs na Maŋgəlva tay dəndəni, nənah sən əssine vani.

⁶ Nəɓsən na: Beltasar, daya net mulaŋ heligi, nəsənək na əmpəs na Maŋgəlva salala tay akoko, nok kaprəm gabba an dəsan məɗamən pakə. Aboton su gabba əssine nawa!

⁷ Aka nəsaw aka zəga nafno nawa, an nəwəl addəv əssine naw yaŋka: wəlaŋga məɓayən diyɗa məmpan addak dəlva.

⁸ Wəlaŋga van məblahəni ɓəɓəla: agapək hã disiŋ, awla hã sə təki dələv abaymani.

⁹ Gaslamban tay moggoni, uwa akan zlomsok zlomsoku: əzəm na zəga pak tay akani. Zəgeɗ memeyẽɗ nawra assoŋ ammba zeŋgile nani, aka kivan biŋgeɗ azaɓənək gəla neti, ndəni məzuzəmgən zəga məzəmpəs pakə.

¹⁰ Aka nəsaw ɗuffo aka zəga nafna əɗɗumon an nuwələ, nulak Maslay na Maŋgəlva, məsla zən dawpirken sə disiŋ.

¹¹ Aŋgəslək vaŋvəl dayadaya yas anah na: məbəl wəlaŋga, mərslan kivani! Məhor vani gəm məndol kirtini! Zəgeɗ memeyẽɗ dənzoŋ səmmbani, ya biŋgeɗ tam səka kivani!

¹² Ya məppan gbuŋgburun də siwerin afuŋ, mətəwəɗ ngiyamɗe na təbəz titire gəm na təbəz pepreŋ akani, məppan a kevile awra! Minɗe dəziyaŋgən akani, dəzəmgən kevile nafuŋ va zəgeɗ memeyẽɗi.

¹³ Makran waddəɗə, asan na va na ɗəf ɓa, kapsəni makra na zəga mamayã wasan əzva buhul awra.

¹⁴ Aski əpel maslay aziwgini, ya əpel van səmet ɗiy en salala ade vi ɗiy dəsənəngən na Məsəɗəɗə, ndəni məlĩ aka məlĩ net ɗiyi, tay əɗi ɗəf məs aŋgələ aka məlyã, dəsan ɗəf məgəsən nammbet ɗiy zlaŋgə.

¹⁵ Aski əssine məs nissini, in məlĩ Nabukodonozor. Kakaŋ na Beltasar aboton su gabbani vi ɗəf tay səweleŋgit məskaŋ helig naw dəɓap wəboton ɓa, ya nok wakəɓapa adan əmpəs na Maŋgəlva salala tay də isi.

Daniyel tay əbotoŋ əssine na məlyã

¹⁶ Yaŋ Daniyel məs adawyaŋ Beltasar, asan gərəŋga ənziya siɗikke, maɗɗulan agrəŋka. Məlĩ amsakək əpel na: «Beltasar, geslne aduk dawboton va əssine van aŋgəl kawnah ɓa!» Beltasar azlanək dawnah na: Məlyã! Kəta əssine van dəsan viyit meseŋgiɗko, ya an aŋgəl kawnah tamə, viyit məzuzelkuni!

¹⁷ Wəlaŋga məs kəwəl məɓayən ɓəɓəl məs əɓay nan hã a disiŋ, dədawla hã sə təki dələv abaymanəŋ,

¹⁸ məs van moggoni, uwa akan zlomsok zlomsoku, məs əzəm na zəga pak asan akani, məs zəgeɗ memeyẽɗ nawra adakkalaŋ ammba zəŋgileni, məs biŋgeɗ azaɓaŋ gəla aka kivanəŋka:

¹⁹ Məlyã istə kəkkpaŋ matuŋguk gəm gboŋgboŋ vani, gagdak na məlĩ nok aɓayka hã agap a disiŋ, gagdak na məlĩ nok anzlərək hã gap a təki dələv abaymani.

²⁰ Məlyã, kulak maslay dawpirken sə disiŋ, kəprəmək an anahə: Məbəl wəlaŋga, mərslani! Gbuŋgburun də siwerin na məppan siwirre aka dəlvafuŋ, mətəwəɗ ngiyamɗe na təbəz titire gəm təbəz pepreŋge, məppan addəv kevile awra; minɗe dəziyaŋgən akani, dəzəmgən va zəgeɗ memeyẽɗ nawra, gap wəsva buhulu.

²¹ «Aŋki məs aŋgəl kawnahã məlyã! An Məsəɗəɗə aziwgin dəgap azoko məlĩ nawa:

²² Karɓuhki sə weleŋgit ɗiyi, wakəsok sap dit zəgeɗ memeyẽɗ nawra; zəga nawzəm nok wasan kevile va net wasliɗe, minɗe waziyaŋ akoko; wakəsok əzva buhul awra, hã an kəsənək na Məsəɗəɗə na, ndəni daya aka məlĩ net ɗiyi, tay əɗi ɗəf məs aŋgəl aka məlyã.

²³ Ya mənahi na məppan gbuŋgburun də siwer wəlaŋga van afuŋgu: Wakəmsak əgəm məlĩ noko an kəsənək na Maŋgəlva na disiŋgi Daya.

²⁴ Vi vaski məlyã! Aprəm əsəɓ nawa! Addəɗan wəza mambray nok də ədaw təstəsə gəm heslepeɗe nok də ulasahã aket məzurayɗe, awsən ɓa məlĩ nok wazzek soko!»

Əssine tay ərba

²⁵ As pak arəhək məlĩ Nabukodonozor.

²⁶ Aka əgrak na təla makəlaw kiyən sula, gala asan balbal aka gəla na məlĩ nan a Babilon na,

²⁷ məlĩ agəmək əpele anahək na: Aŋ Babilon metiŋgin məs nərkə də gbogboŋ gəm də wəɓap naw sən gagdak na məlĩ nawəŋki ɓa sa?

²⁸ Məlĩ dəgrak əpel tagay ɓa, əpel adek sə disiŋ: «Mənah suki, məlĩ Nabukodonozor! Mətafni məlĩ səvoko.

²⁹ Karɓuhki sə weleŋgit ɗiyi; wakəsok sap dit zəgeɗ memeyẽɗ nawra; wakəzəm kevile va net wasliɗe; wakəgəɗ əzva buhul, hã gap an kəsənək na Maŋgəlva Məsəɗəɗə na, ndəni daya aka məlĩ net ɗiy pakə, tay əɗi ɗəf məs aŋgəl aka məlyã.»

³⁰ Pay vanəski əpel nak aknah aka Nabukodonozor: mərɓahni sə weleŋgit ɗiy; azəmək kevile va net wasliɗe, gəɓa zən aləɓək sit minɗe, deɗekeɗ agilyoŋguk azan silipsilip va na Gazla, perzleŋ van aɓayaŋgək va net biŋgeɗi.

Əmbla na Nabukodonozor

³¹ «Səza pay agapə, in, Nabukodonozor, nəslanək haraw a disiŋ, maɗɗulaw adeke. Nəfetik aka Məsəɗəɗə tay madaran hã faɗə, nətibirenike, nəgagdakanəka, vi məlĩ nani məlĩ an faɗə: Əzəm məlĩ nan tay vi sayit ɗiy pakə.

³² Ɗiy naka dəlvafuŋ pak dəgapaŋ zəga azan ɓa: tay əɗɗa va aŋgəl dit məzəlpaŋ na disiŋ gəm ɗiy naka dəlvafuŋgu; ɗəf tay nawɓap ətak van ɓa may nawnah sən na miy kədaɗɗaŋ di ɓa?

³³ Səza nəmbələ, maɗɗulaw adeke nərəhək gagdak naw a gəlan gəm məlĩ nawa. Ɗiy atəŋgaŋ əgagdakawəni; məzusəɓaŋ naw dit məɗɗaŋ wəza naw aŋglaŋgək nəsawgən məlyã. Məɗiwi aka məlĩ a gəlawa, yas nərah gagdak day ki an lahəŋka.

³⁴ Kakaŋ in, Nabukodonozor, nəɗiyək kini, nəkaɓgənəka, nəgagdakanək Məlĩ na disiŋ, vi wəza nan pak gesiŋgin, tive nan təstəsi, tay əɓe'git məɓaygənən kiziti.»