Daniyel 3 - Bible en Guidar

Wən məɗiyən vi kawgagdakan zəgakamaŋgəlva na meleŋge

¹ Məlĩ Nabukodonozor azaɓək zəgakamaŋgəlva na meleŋge: wəɓay nan tay metər kaklaw hoku, slosloprok nan, metər hoku. Aziwginik zəga van a təki məpəlayya na Dura, aka kivadələv na Babilon.

² Yas məlĩ Nabukodonozor aslin maslənɗe vi kakkelet ɗiy na sləma, deyeɗe na bərzləŋna-kivadəlva, deyeɗe na kivadəlva, məzusəɓaŋgə, mərmaŋ deleɗi, məsənaŋ mahenziŋ, mətawaŋwəna gəm məɗɗaŋ wəza na kivadələv pakə, dəzzoŋgən vi wəzləra nawtəŋ əgagdakan zəgakamaŋgəlva məs məlĩ Nabukodonozor aziwgin naka.

³ Ndəni ɗiy na sləma, deyeɗe na bərzləŋna-kivadəlva, deyeɗe na kivadəlva, məzusəɓaŋgə, mərmaŋ deleɗi, məsənaŋ mahenziŋ, mətawaŋwəna gəm məɗɗaŋ wəza naka kivadələv asapaŋ vi wəzləra nawtəŋ əgagdakan zəgakamaŋgəlva məs məlĩ Nabukodonozor azaɓ naka, yas aziweŋ aba zəgakamaŋgəlva məs Nabukodonozor aziwgin naka.

⁴ Məzutəl ma aŋgəzlək vaŋvəl dayadaya: «Vanday net ɗiyi, dəlveŋge gəm ma temtemi, aŋki məɗi sukum wən nani!

⁵ An kəprəmənək ɓaɓəlma mohõ, pozloro, Gaŋgara, Gəzləŋtəndəŋ, Gazaŋvəla dit zeŋvit zəgeɗ nasmay mbirti, kəppu'oŋgən afuŋ, kəgagdakanəngən zəgakamaŋgəlva na meleŋge məs məlĩ Nabukodonozor aziwgəni.

⁶ Ɗəf an dəppu' afuŋ vi kawgagdakan ɓa, kasgani kakaŋ kakaŋ addəv movoro offo zilim zilimi.»

⁷ Aka as ləŋ, səza ɗiy beymet aprəmən ɓaɓəlma Mohõ, Pozloro, Gaŋgara, Gəzləŋtəndəŋ, Gozloro, Gazaŋvəla gəm net zəgeɗ nasmay zeŋvit mbirti, vandayɗe net ɗiyi, dəlveŋge gəm ma temtem pak appu'oŋgək afuŋ, agagdakanənək zəgakamaŋgəlva na meleŋge məs məlĩ Nabukodonozor aziwgin naka.

Beynegiɗ Daniyel tahəŋ təstəs də Maŋgəlva

⁸ Aka as ləŋgə, ɗiy na Babilon azzoŋ əzəm kiyit mə Yudeɗi.

⁹ Agəmənək wəpel də wənah sən məlĩ Nabukodonozor na: «Məlyã! Ənziya nok dəsan hã faɗə!

¹⁰ Is məlĩ zək noktə kəɗi wən nan də wənah na, ɗəf pak dəprəm ɓaɓəlma Mohõ, Pozloro, Gaŋgara, Gəzləŋtəndəŋ, Gozloro, Gazaŋvəla gəm zəgeɗ nasmay mbirit dəskotgən əppu' dəgagdakangən zəgakamaŋgəlva na meleŋge,

¹¹ ya an ɗəf aɓoŋko, dəppu' dəgagdakan ɓa, kazgani addəv movoro offo mərman zilim zilimi.

¹² Mə Yudeɗ tahəŋ məs kəɗi dədawgənəngən an dəsan aka kivadələv na Babilon: Sadrak, Mesak gəm Abed-Nego. Ɗiyiski, məlyã, dulanən an kəpel va wən azet ɓa: aɓoŋgoŋgək də wəɗɗa wəza sit meŋgilvet noko ya dəgagdakanən zəgakamaŋgəlva na meleŋge məs kəziwgin nak ɓa.»

¹³ Addəv ədagədəv də herɗe, Nabukodonozor, anahək dəkisiningin may Sadrak, Mesak gəm Abed-Nego. Yaŋ məki ɗiy nek abani.

¹⁴ Nabukodonozor attoketik na: «Sadrak, Mesak, gəm Abed-Nego, gesiŋgi kəɓogoŋgək, kəgegdeketin na meŋgilveɗ naw gəm zəgakamaŋgəlva na meleŋge məs nəziwgənəŋ ɓa sa?

¹⁵ Ya kakaŋ na məsla zukum, an kəprəmənək ɓaɓəlma Mohõ, Pozloro, Gaŋgara, Gəzləŋtədəŋ, Gozloro, Gazaŋvəla gəm na zev zəga nasmay pak na, kəɓe'eŋgən əppu' aba zəgakamaŋgəlva məs nəzaɓ kawgagdakani. An kəppu'oŋ ɓa na, kazgokumi kakaŋ kakaŋ addəv movoro offo zilim zilimi. Zev maŋgəlva awani nawkogukum səvaw di?»

¹⁶ Sadrak, Mesak, gəm Abed-Nego azlanənək ama məlĩ Nabukodonozor aɓɗaŋ na: «Mam tay aka əzlan suk əpel aka wənəs ɓa.

¹⁷ An Maŋgəlva nam mədawgagdakanəŋ tay na, waɓap wəkõhgəm səddəv movoro offo gəm səmmba voko, məlyã!

¹⁸ An dəkõhgəm ɓa, asəna məlyã, məgagdaket meŋgilveɗ nok ɓa, ya məppu' na aba zəgakamaŋgəlva na meleŋge məs kəziwginiŋ ɓa'a.»

¹⁹ Ndəni makra Nabukodonozor asəkəkə, ki haran kpaŋ rosros aket may Sadrak, Mesak gəm Abed-Nego. Aɗiyək wən nan vi karman movoro offo day ki an ɗayɗay gap təl buhul.

²⁰ Yas anah sit məs gambareɗ səret məzəlpaŋ nan dəɓɓrukingin may Sadrak, Mesak gəm Abed-Nego, kazget addəv movoro offo naka.

²¹ Yaŋ məɓruk ɗiy nek də bergeme ammbeti, lukut məgbəŋtəŋgə, kulpupu neti, gəm lukutɗe neti, yas məzget addəv movoro offo naka.

²² Aka va məlĩ aziwginəska, mərmani movoro offo nak sawɓa, ɗiy məs dəzgetin may Sadrak, Mesak, gəm Abed-Nego addəvən amtaŋ sən henzil offo.

²³ Sadrak, Mesak gəm Abed-Nego, neti, askotoŋguk hokogit pak məɓrukit addəv movoro offo.

Ɗiy na bayna zit hoku məkõhgit səddəv movoro offo

²⁴ Yaŋ məlĩ Nabukodonozor asan gərəŋgə, yas asil hosu. Apeli, aɓsit məzusəɓaŋ sənən na: «Namna Ɗiy hoku məɓruku, yas məzget addəv movoro offo ɓa sa?» Yas azlanən sənən məlĩ də wənah na: «Vaski, məlyã!»

²⁵ Yaŋ azlani, amna: In tat ula ɗiy poɗo əbbalaŋ addəv offo də meti, məza vaŋvi tay azet ɓa, ya mopoɗo'it tay va maslay.

²⁶ Nabukodonozor adderək go'o ama movoro offo naka. Aye amna, Sadrak! Mesak! Gəm Abed-Nego! Məɗɗaŋ wəza sən Maŋgəlva Məsəɗəɗə, migili! Mide! Ndəni may Sadrak, Məsak gəm Abed-Nego agilyoŋ səkoffo.

²⁷ Ɗiy na sləma, deyeɗe na bərzləŋna-kivadəlva, deyeɗe na kivadəlva gəm məzusəɓaŋ sənən məlyã, akkalaŋka. Asəŋgletin ɗiy veti: offo dərəŋgən gəɓa zit ɓa; muhur kiyit dəzlə ɓa; lukut nazet tay va lahəŋka, miŋginit enene tay azet ɓa.

²⁸ Məlĩ Nabukodonozor anahək na: Gagdak aza Maŋgəlva na Sadrak, Mesak gəm na Abed-Nego, aslənək maslay nan wəkõhgit məɗɗaŋ wəza nani vi aɗiyənək wəɗɗum net akani. Dəɓe'eŋ sənən əpel na məlĩ ɓa, atafənək əvəl kiziti, appu'oŋ na aba maŋgəlva maɓɓan an neti ɓa ɓa.

²⁹ Ya kakaŋ na nəɗiyək wən nani, vanday awandi pakə, dələv awandi awaniɓa məpel ma maɓɓani, an apelik mbərayən aka Maŋgəlva net may Sadrak, Mesak gəm Abed-Nego, kawbəlani, ya gəla nan tamə kaɓzluni, vi maŋgəlva tay mbərən nawkõhgən ɓa.

³⁰ Yas məlĩ aɗi Sadrak, Mesak gem Abed-Nego a təki an gagdak day ki an lahəŋka addəv kivadələv na Babilon.

Əssine na məlĩ masula'ən: wəlaŋga metiŋgini

³¹ Məlĩ Nabukodonozor aslənək əpel sit vandayɗe pakə, dəlveŋge gəm sit maɗe dəssoŋ aka dəlvafuŋ pakə. Zazay metiŋgin dəsan akokum!

³² Adahək nərbetigin seserge gəm sekeneɗ an Maŋgəlva Məsəɗəɗə agəɗ viwəŋka,

³³ Seserge nan metiŋgini, ya sekeneɗ nan, tahəŋ də gbogboŋgo! Əzəm məlĩ nan tay hã faɗə, gagdak na məlĩ nan tay va sayit ɗiy asan pakə.