Daniyel 12 - Bible en Guidar

Pay na əkgraka ( 12:1-13 ) Pay na tatwãh metiŋgin gəm nawsilye sə təki əmta

¹ Pay nani, Mikayel daya net maslayɗe, məga net ɗiy nok warban zəni. Pay nan wasan na tatwãh metiŋgini, zeŋvin dəgəɗ ɗah ɓa təŋ səza ɗiy assoŋgu aka dəlvafuŋ hã gap pay dəpaŋka. Dəpas na, ɗiy nok məs iya net məverin addəv ɗerewel wakõhoŋgu.

² Ɗiy diyɗa səret ɗiy mimtit wasilyoŋgu, ɗiy mbirti vi zeŋgile nassa hã faɗə, mbirit tamə vi zəga net wili gəm wəray an faɗə.

³ Məs əsən aket wawiɗeŋ va təki kerŋgeŋge na disiŋ, en dəbbah sitin ɗiy diyɗa dəssoŋgən təstəsə, wakasakaŋ va gərzleɗ hã faɗə.

⁴ Isi Daniyel, arma əpelis haɗamə, atip ma ɗereweləska hã gap pay na əgrak adazzani. Ɗiy diyɗa wakayanən wekweki ya əsən wanzlərə.

Pay nagrak na wən məɗamay

⁵ Naw in Daniyel nəwələk ɗiy meɓɓet sula, tahəŋ ziwziwi: aka mabuzgum na məlpa metiŋ daha daha.

⁶ Taka səmmbeti aɓsən ɗəf dəgul lukut na ngərayã məs ziwwe aket iŋkile na məlpa metiŋ nak na: «Hã dehey wəgrak net zəgeɗ na sekenes adazzan di?»

⁷ Nəprəmək ɗəf dəgul lukut na ngərayã məs ziwwe aket iŋkile na məlpa metiŋ naka, atələk van sulagən pak a disiŋ, aswayək də an dəsan madaran faɗə: «Wəzva hoku dəman watoŋgu, pay gbogboŋ net ɗiy naw salala adagrak tutu' na, zəgeɗis pak wabayən meti.»

⁸ Naw nəprəməka ya nəsən gabban ɓa, yaŋ nəmna: «Daya nawa, mbar wəgrak net adassan di?»

⁹ Yas azlan na: «Doko Daniyel, vi wəpelis na məɗamni ya wasan tərra hã gap pay na wəkgraka.

¹⁰ Ɗiy diyɗa na kabburti, kakkpeŋgeti salala, gəm kappayni heslepe sezeti. Ɗiy mbəreyit wazbanən əɗɗa mbərayən, ɗəf mbərayən pak zəga tay adaprəm ɓa, ya məs əsən aket na, net waprəmən an dədawtoŋgo.

¹¹ Təŋ səza adawtakən əzaɓ-Maŋgəlva an ɗayɗay gəm kawɗi zəga daryaw an dədawraygən təkiya, əvoŋ gabal də səkat sula də kaklaw vaytak watoŋgoŋgu.

¹² Zazay aza ɗəf an dədawgan, dədawgap əvoŋ gabal də səkat hoku də kaklaw hoku kiyən sle'.

¹³ Nok na, dok ha burusu. Wakəmtə, wakəsil vi kawrəh haran nok pay əgrak hara.»