Daniyel 11 - Bible en Guidar

¹ Gala Dariyus ɗəf na Medə asan məlĩ aka əzva maddaabəŋ nani, naw nəsawək vi kasɓan gəm kawzeŋ arani.

² Yaŋkəŋ na wən gegesiŋ nədawnah suko. Milyəŋge temtem hoku wazəmaŋ məlĩ aka Persiya, məlĩ mopoɗet wade, nan wagəɗ arya diyɗa daykiyit an net pakə. Pay adawrəh gbogboŋ də arya nan vani, wasilgit ɗiy pak kawgay də məlĩ na Gərek.

Wəgay net milyeŋge na kəla disiŋ dit en na dohoŋ

³ Ya məlĩ məs makran wasan aka məlyã; wazəm məlĩ nan də wəɗɗa va makran aŋgələ.

⁴ Aka adawsan ziw ɓəlɓələ, məlĩ nan waskotu, wawɗak aka tapaslay pay poɗo, asan na sit kirtin ɓa, gagdak nan waddakə, wazə, ɗiy meɓɓet wazəmaŋ məlĩ a gəlani.

⁵ Məlĩ na dohoŋ wasɓan zəni. Ya taka səmmbet deyeɗe net məzəlpaŋ nan wasan də gbogboŋ day kini, məlĩ nan wasan də gagdak metiŋgin diyɗa.

⁶ Dərɓagan wəzva siɗikke, məlĩ na dohoŋ wapsənət wətən sən məlĩ na kəla disiŋ vi karma bayna, kawslerəŋgi, ya təzanək gagdak nata, uwa nat tay nawziw ɓa, ya kawbeyti beymet pak dəpaska: ndəta, ɗiy en dəlhãtəni, afəta gəm məzəbbah səta.

⁷ Ya taka səddəv mazlalwat wasan aka məlyã. Watoŋ addəv walaŋgəla mərka kiyən na məlĩ na kəla disiŋ, wagay dit məzəlpaŋ nani, waska wəleti.

⁸ Zəgeɗkameŋgilvet net məhəsit na təbza, zəgeɗ na sləma net na təbəz babara gəm na meleŋge wake a Eziptə ka zəga nawrəh səma əgaya. Wasan faraɗa səza məlĩ na kəla disiŋ wəzva ɓaɓay.

⁹ Siske na, məlĩ na dohoŋ wagul dələv na məlĩ na kəla disiŋ, asna wamndan aka dələv nani.

¹⁰ Kirtən məlĩ na kəla disiŋ watəŋgən əɗɗa wəgaya, wakkeletin məzəlpaŋ aɓɓet diyɗa sawɓa. Asna wade əgul dələv va məlpa adawgul təkiya. Siske na, watəŋ wəgay hã gap ndən toŋ addəv walaŋgəla mərka kiyən.

¹¹ Də wədagədəva, məlĩ na dohoŋ wagil əgay də məlĩ na kəla disiŋ məs nawsan də vanday net məzəlpaŋ ammban diyɗa, ya vanday van wabət ammba va məlĩ a dohoŋ.

¹² An akak vanday vani, məlĩ van waɓaygən kizəni, də abay məzəlpaŋ diyɗaŋ pakə, ya askə na wəla ɓa.

¹³ Məlĩ na kəla disiŋ wakkal məzəlpaŋ diyɗa day ki lahəŋka. Dərɓaga wəzva siɗikke, wamndan dit məzəlpaŋ diyɗa gəm də arya diyɗa.

¹⁴ Aka payəs pak na, ɗiy diyɗa watemeŋ aka məlĩ na dohoŋ. Məkayaŋ mama neret ɗiy noko, waɓoŋgoŋ vi an dərbə addəv hənhən dəgəɗgəni, ya ahhar na ammbet ɓa.

¹⁵ Məlĩ na kəla disiŋ wade əgul walaŋgəla məs mərka kini, wakkpotoŋ dəlva, wazəmən walaŋgəla-metiŋ na korgu naka. Məzəlpaŋ na dohoŋ də vanday net an tekteki wassoŋ də gbogboŋ nawziw ɓa.

¹⁶ Məzuzel an dəde akan nak wagəɗ va aŋgələ, ya ɗəf tay nawziw aban ɓa. Waziw aka dələv an moggon də wəzan an aŋgəl pakə.

¹⁷ Məlĩ na kəla disiŋ waynan a makran kazzan də gagdak na məlĩ nan pak vi karma bayna dəndəni, wapsənət wətən sən məlĩ na dohoŋ ka guluk vi kawzani, ya wən nan aziw na ɓa, agəɗ na akan ɓa.

¹⁸ Səɓɓani, wazi haran dəket dilveŋge na mətəwəra na pehe ya waska wəlet diyɗa səmmbeti. Məlĩ na guw watak əkaɓ nani də əmndeget wil akani.

¹⁹ Məlĩ van waman haran aket walaŋgəleɗe mərka kiyit naka dələv nani, waddakə, waskotu, wazə.

²⁰ Məlĩ mbərən wasan a gəlani, waslən ɗəf tatrãh addəv walaŋgəla gagdak naka dələv nani, ya əvoŋ siɗikke sə dərɓagan na kawbayni məza də ədagədəv ɓa məza də əgay ɓa'a.

²¹ Sə dərɓagani, ɗəf tekteki ɓa, məs nawɗi kini ɓa, wade aka ɗiy tahəŋ də maɗɗuleti, wagəɗ vurum, wamõh məlyã, wasan a gəlani.

²² Waŋgreɓ məzəlpaŋ səbani gəm wabay daya na wənmiyna.

²³ Dəka wəsler nan dit ɗiy mbirti, wagəɗ kekete, wasan gboŋgboŋ də ɗiy ammban siɗɗike.

²⁴ Aka pay ɗiy tahəŋ kiyit foŋgo, watoŋ addəv kivadələv məs də ba'arə, wagəɗ zəga an efiŋgiɗin dit efiŋgiɗit efiŋgiɗin dəɗɗaŋ ɗah ɓa: wamõhon dəlva, wawɗak zəga nawrəh səma wəgay sit ɗiy nani, wakay keket nawmbat aket walaŋgəleɗe na korgu, ali na an siɗikkeyi ɓa ɓa.

²⁵ Wasɓan zən gəm makrani, wasilgit məzəlpaŋ kawgay də məlĩ na dohoŋ. Məlĩ na dohoŋ tamə, wakkelet məzəlpaŋ diyɗa, gboŋgboŋgu, vi kalpa. Ya waɓap ɓa vi waynaŋ keket akani.

²⁶ Məzuzəmaŋ dəndən warslanən təlni. Kawgulti məzəlpaŋ nani, ɗiy səmmbet wamtaŋ diyɗa.

²⁷ Milyeŋge sula waziwginin a mekret kaɗɗa mbərayən, wawaŋ hiyaw aza ziti də adawzəmaŋ akki taka zlaŋgə. Ya wambat abe ɓa vi pay məs məɗiyən dəgap ɓa.

²⁸ Məlĩ na kəla disiŋ wamndan aka dələv nan dit zəgeɗ səddəv wəgay diyɗa. Waɗɗum mbərayən a makran aka wənmiyna salala, waknahani, wamndan aka dələv nani.

²⁹ An pay məɗiyən agapka, wawaksən dələv na dohoŋ əmpa, ya əbayman asan na va an maddaabəŋ ɓa.

³⁰ Ɗiy də bəlay nawgay wazzoŋ sə Kitim, wawaksənəni, makran wamtə, wamndan dərɓe. Gədəvən wamsak əda aka wənmiyna salala; wakkpaŋ kawtəp man dit ɗiy en dəzganən wənmiyna.

³¹ Ɗiy səmmbet məzəlpaŋ nan warnokonən Gəlamatuya na Maŋgəlva mərka kini. Waziwginin əzaɓ-Maŋgəlva nawda ɗayɗay sən Maŋgəlva ya waɗiyaŋ zəga daryaw məraygən təkiya.

³² Də keket nani, məlĩ wahheɗet ɗiy dəzganəngən wənmiyna. Ya ɗiy en dəsənən Maŋgəlva net na, net wassoŋ ɓəlɓəl addəv zəga naɗɗa neti.

³³ Məs maɗɗula aket neret ɗiy waprəman sitin ɗiy diyɗa. Ya kawbayi səmmbet də masalam gəm də offo, mbirti kawketi aka balamə, mbirit tamə kawmõhẽti pay pakə.

³⁴ Addəv əzəmsahã netis na, warahaŋ əbba siɗikke, ɗiy diyɗa wasapaŋ azet də əbay heret ɗarə.

³⁵ Kawbayə səret məsmaɗɗuleti, əmta net wasan ka zəga nappay heslepe səzeti, nabburti, nakkpaŋget salala hã gap pay na wəggraka, vi pay məɗiyən van abe yi.

³⁶ Məlĩ wagəɗ va makran aŋgələ. Wagagdakan zəni gəm wawla zən va adayək ki zəga adawyaŋ maŋgəlva pakə. Wapel na əku aka Maŋgəlva net meŋgilveɗi, warah gagdak hã gap pay Maŋgəlva adarban ədagədəv nani, vi an aziwgin pak wagəɗə.

³⁷ Məlĩ aɗi na kiyit meŋgilveɗ net efiŋgiɗin ɓa, may ki an gil aŋglaŋ day ɓa may maŋgəlva awandi pak ɓa, vi waɓaygən kizən aket pakə.

³⁸ Ya dərəŋ kan na wagagdakan maŋgəlva məzuga walaŋgəleɗe mərka kiyti, wagagdakan maŋgəlva məs efiŋgiɗin dəsənnən ɓa də wəpsən meleŋge, təbəz babara, gərmeŋɗe na sləma gəm zəgeɗ na sləma zeŋvit temtem pakə.

³⁹ Wawaksit walaŋgəleɗe na korgu də əbbah na maŋgəlva na guwəska. Waɗi kiyit ɗiy en dətafən dəsangən daya aketi, waɗi ka deyeɗe aket ɗiy diyɗa, gəm wawɗak sit dələv ka zəga na veti.

⁴⁰ An pay nagrak agapka, məlĩ na dohoŋ wargisl dəndəni, məlĩ na kəla disiŋ waderze akan dit mawteɗ nawgaya, məŋkoroŋ pilseŋge gəm bəlayɗe diyɗa. Watoŋ addivit dəlveŋge diyɗa, wagule, va məlpa adawgul təkiya, watoŋgu.

⁴¹ Watoŋ aka dələv lelewe, wabay ɗiy diyɗa, ya dələv na Edom, Mo'ab gəm en dəmbraŋ səmmbet mə Ammonɗe na, net wakõhõŋ səvani.

⁴² Wapak van aket dəlveŋge diyɗa, dələv na Eziptə na, wakõh əmpa ɓa.

⁴³ Wagəm ərah na Eziptə pak ka nani, meleŋge, təbəz babara dit zəgeɗ məvotit na sləma pakə. Ya Libi də Etiyopi pak wassoŋ ammba tələni.

⁴⁴ Ya alabaraɗe dəzzoŋ sə dohoŋ gəm sə disiŋ wazlahgənən makrani: Wadə gədəv sawɓa, wagil vi kawbay gəm kawzet ɗiy diyɗa.

⁴⁵ Wampe gizlirkeɗe na məlĩ nan awaleŋgit peheɗ də mossorgo an salala, adaki əmta adawrəhən, wamtə məza ɗəf əbbah sən ɓa.