Daniyel 10 - Bible en Guidar

Maslən sə disiŋ ( 10:1—11:45 ) Ula mohoko'ən: ɗəf də lukut na ngərayã

¹ Addəv wəzva mohokon na Sirus məlĩ na Persiya, əpel ade sənək Daniyel məs adawyaŋ na Beltasar, əpel van gegesiŋgi, əgay tay metiŋgin. Daniyel aprəmək əpel vani, dəddəv ula aprəm gabbani.

² Pay nan dəpaska, naw in Daniyel, nəgəɗək gəlabay pay buhul təl hoku.

³ Nəzəm əzəm moggon ɓa, sluwa gəm mbazla dətoŋgoŋ amaw ɓa, nəgəɗ tursan azaw ɓa hã gap pay buhul təl hoku nek toŋgoŋgu.

⁴ Addəv wəvoŋ makaklaw sula kiyən poɗo na təla maddaabəŋ na wəzva, nərəhək zu ama məlpa metiŋgin məs adawyan na Tigər.

⁵ Nəslan haraw na, nulak ɗəf də lukut na ngərayã gəm maslapa na meleŋge na Ufaz addakən.

⁶ Zən tay va gərəm na sləma nzoloknzoloku, məɗa haran tay əwiɗe, haran tay əwiɗ va offo. Van də seserin tahəŋ əwiɗeŋ va təbəz pepreŋge məkkãhnə, ɓaɓəlma əpel nan va ɓaɓəlma na vanday net ɗiyi.

⁷ In Daniyel takərgu nula zəga vani. Ɗiy məs dəssoŋ də in na, dulanən ɓa, ya geslne armek sawɓa yas anzoŋ kawɗama.

⁸ Nəsawək takərgu ula zəga metiŋgin vani. Gbogboŋ tay azaw siɗikke dayday ɓa, haraw apokko, zu ləɓayləɓayə.

⁹ Nəprəm wəlani, aka nədaprəm əpel nani, kiyu azlzlaɓka yas nəskot də magədəvu hã mirbizu afuŋ nisi.

¹⁰ Yas va ɗəf arəŋguwa, aɗiyu guduk vaw afuŋ gakgak aka in tat korkoru.

¹¹ Yas anah su na: «Daniyel, ɗəf na makrawa. Aprəm an nədanah suko, aziw a gəloko vi yaŋkəŋ na azok məslənwa.» Səza apel vaska, nəsilik ziw də wəkkere'e.

¹² Yaŋ anah su na: «Daniyel, geslne aduk ɓa. Vi təŋ səza pay kəɗi a mokrok naprəm gəm nawɓe'gən kiyuk aba Maŋgəlva nok na, əpel nok aprəmka, naw nədeŋ na, aka wən na əpel nok vanəski nəde.

¹³ Yas maslay məzuga Persiya atak maw pay kaklaw sula kiyən taka. Ndəni Mikayel, taka səmmbet daya net maslayɗe, ade abbah suwa, yas nəsaw adak amaŋgevet milyeŋge na Persiya.

¹⁴ Nəde na vi kaprəman suk an nazzan aket ɗiy nok abe, vi ula aka an dəwəl sən pay vanəs əmpa.»

¹⁵ Gala adawpelsu əpeləska in kiyu ɓegən afuŋ ɓatɓatə.

¹⁶ Ndəni an dəgil va wətən ɗəf nak ade arəŋgən mawa. Nəkol maw nətəŋ əpele. Nənah sən ɗəf dəziw abaw nəwəl nak na: Daya nawa geslne arməwək sən ula vani hã zu yuwar yuwarə, gbogboŋ tay azaw ɓa.

¹⁷ Mbari in gawla aba ɗəf ɗar nədawɓap əpel də daya naw di? Ya naw kakaŋ na gbogboŋ tay azaw də əmpəs ɓa.

¹⁸ Yas an dəgil va wətən ɗəf addəv ula nak arəŋgu əmpa gəm asɓawa.

¹⁹ Anah su na: «Geslne aduk ɓa ɗəf na makrawa! Zazay dəsan akoko.» Asok zuko! Asok zuko! Səza anah su vaska, nərahək gbogboŋgo yas nənah sən na: «Daya nawa apeli, vi kəsɓawəka.»

²⁰ Anah su na: Kəsənək vimi nəde azok di sa? Kakaŋka wanəmsak wəgay də maslay məzuga Persiya, naw wanəgili ya maslay mezuga Gərek tay əzzani.

²¹ Ya anərban suk an məverin addəv ɗerewel na gegesiŋ. Ɗəf tay təttaka dədabbah su əgay dənɗaŋ dabərki Mikayel maslay nokum ɓa.