Daniyel 1 - Bible en Guidar

Daniyel dit beyneŋgiɗin ( 1:1—6:29 ) Daniyel dit beyneŋgiɗin a Babilon

¹ Addəv əzva mohoko'ən na Yoyakim, məlĩ na Yuda aka əzəm məlyã, Nabukodonozor məlĩ na Babilon adek əsərŋgəsl Yerusalem.

² Yawe appanək Yoyakim məlĩ na Yuda ammba vani gəm andək zəgeɗ naddəv gəla na Maŋgəlva; akek aka dələv na Sine'ar addəv gəla net meŋgilveɗ nani, akek zəgeɗ vet addəv gəla nawɗi zəgeɗ na sləma net meŋgilveɗ nani.

³ Sədərɓaga aska məlĩ aɗiyək wən nan sən Aspenas, daya net mətawaŋkoyom nani, dəkigin səret kirtit mə Israyelɗe səddəv mahəlfa na məlyã gəm kirtit milyeŋge.

⁴ Gewleɗ məza heslepe azet ɓa, lelewɗe ama hara ɗəfa, məs əsən aketi, məs maɗɗula, dəsənaŋ gabba zəga gəm maɗɗula nawɗakan əsəna, məs də mbel zit naɗɗa wəza aba məlyã, kawyagan sit əvere gəm ma net mə Kaldiyeɗi.

⁵ Məlĩ aziwginik wən na əzəm də wəsa net an ɗayɗay dəsan nawgəm səza an nani, kawyeget addəv əzva hoku, an agrakək na dəziweŋgən aba məlyã.

⁶ Zev Yuda tahəŋ ereti, may Daniyel, Hananiya, Mikayel, gəm Azariya.

⁷ Daya net mətawaŋkoyom apsitik iya: sən Daniyel na Beltasar, Hananiya na Sadrak, na Mikayel na Mesak gəm sən Azariya tamə Abed-nego.

⁸ Mbaraka na, Daniyel aynanək a makran ka adarnokon zən də əzəm way gəm əsa mbazla na məlĩ ɓa. Akkamanək daya net mətawaŋkoyom nak adaska wəlan na gəgay vi karnokon zən ɓa.

⁹ Yas Maŋgəlva aɗɗa ka Daniyel dərahgən mbəlembəle də ki nenek aba daya net mətawaŋkoyom.

¹⁰ Daya net mətawaŋkoyom anah sənək Daniyel na: Makraw tay əzla sən daya məlĩ nawa, məs dəziwgin wən na zəga na əzəm gəm na əsa nokuməŋka; an awlukumuk horokum tay pəhpəh va net geleŋgiɗkum ɓa na, wakkpaŋgan wən nan akawa ka karsla kiyu aka wən nokum.

¹¹ Daniyel anah sən məzugeti, məs daya net mətawaŋkoyom appan wən nawge may Daniyel, Hananiya, Mikayel gəm Azariya avanə.

¹² Kamə, asle gewleɗ nok gap əvoŋ kəlaw; dəpsəmən teɓ ɗar ka əzəm namə gəm iŋkile nawsa.

¹³ Siske na, kulagən haramə gəm heret gewleɗ məzəmaŋ way na məlyã, va kədawrahən, aɗɗa sit gewleɗ nok vaska.

¹⁴ Aka asna aprəmike, yas asle gap pay kəlaw.

¹⁵ A ma əgrak na əvoŋ kəlawə, awlak na, net heret tay pəhpəh, məkirit daykiyit gewleɗ məzəzəmaŋ way na məlyã.

¹⁶ Vini məzuget appan əpsit way də mbazla na məlyã yaŋ adepsit teɓ ɗarə.

¹⁷ Ya sit gewleɗ poɗes na, Maŋgəlva apsitik əsəna, əprəm an dəsan məverin pakə gəm maɗɗula. An dəday əmpa na Daniyel aprəm gabba ula gəm gabba əssine pakə.

¹⁸ Səza pay va məlĩ aziwgin vi karbet sən agrakə, daya net mətawaŋkoyom akek aba Nabukodonozor.

¹⁹ Məlĩ azgək meŋ dənɗaŋ pakə, ya səret pak na dərah ɗəf va Daniyel, Hananiya, Mikayel, gəm Azariya ɓa. Ndəni assoŋ aka wəza aba məlyã.

²⁰ Ya aka zəga an nakkpumon əɗɗum də an nawɗakan zəga pak na, an məlĩ attoketik na, ndən ərəhit na adayagək kiyit məsənaŋ zəga dit məɗɗaŋ sekene naka dələv nan pak gap təl kəlaw.

²¹ Daniyel asanək hã gap əzva maddaabəŋ na Sirus aka məlyã.