Əŋɗa 9 - Bible en Guidar

Wəzləra na Pak masula'ən ( 9:1—10:10 ) Pay na wəzləra na Pak

¹ Yawe apel sənək Moyis a kapta-muyã na Sinay; dasək na, aka təla madədaabəŋ na wəzva məs dəzban an mə Israyelɗe agulyoŋ sə Eziptə akani yi. Daya amna:

² «Mə Israyelɗe dəɗɗanəngən wəzləra na Pak aka pay məs məɗiyən.

³ Aka əvoŋ kəlaw kiyən poɗo na təlaŋ də moskoy təki zay kədaɗɗanni, kəɗɗanəngən dəzban mahenziŋ na wəzlera na Pak dit tiveɗnanziya nan təstəsə.»

⁴ Moyis anah sitik mə Israyelɗe dəɗɗanəngən wəzləra na Pak.

⁵ Aɗɗanənək wəzləra na Pak van a kapta-muyã na Sinay aka əvoŋ kəlaw kiyən poɗo na təla maddaabəŋ də moskoyo təki zayə. Mə Israyelɗe aɗɗanənək va an Yawe aɗi wən nan sən Moyisi.

⁶ Ya mbaraka ɗiy meɓɓet tahəŋ də heslepe ezeti, vi arəŋgənənək kigəbaya; vi aski dəɗɗaŋ wəzləra na Pak pay nan ɓa. Yaŋ addoŋ dəpas dəpas ərih may Moyis də Aron.

⁷ Aɓsənən na: «Mənam tat də heslepe azamə, vi mərəŋgənək kigəbaya; mə dəray mətakəm dawki əvəl nam sən Yawe aka pay məɗiyən ta' amban va net mə Israyelɗe pakəŋ di?»

⁸ Moyis azlan sitik na: «Məga tagayɗa, nəprəm an Yawe adawpel aka wən nokumə.»

⁹ Yawe apel senək Moyis amna:

¹⁰ Apel əpeliŋ sit mə Israyelɗe: «Pay ɗəf asan də heslepe vi arəŋgən kigəbaya awaniɓa tay a malaka faraɗa, wənəŋ tay vikum gəm viyit kirtukum naddəvkum, waɗɗa wəzləra na Pak sən Yawe.

¹¹ Ya də əvoŋ kəlaw kiyən poɗo na təla masula'ən də moskoy təki zay ɗiy vetis adaɗɗanən wəzləra vani; dəzəməgən wət time mizilin də peŋ məza wuɗo ɓa gəm teɓ gaslamba tatrahã.

¹² Adambraŋ mezveŋge ɓa, adaŋzlaŋ sleŋsleŋ na zəga məmayã van taka dayday ɓa. Dəɗɗanəngən mahenziŋ na wəzləra na Pak van təstəsə.

¹³ Ya kan na, pay ɗəf an məs heslepe tay azan ɓa ya a malakay ɓa, dəzgə sləma aka əɗɗa wəzləra na Pak ɓa na, ɗəfəs nawgilgini səret ɗiy nani; vi dəka əvəl nan sən Yawe aka pay məs məɗiyən ɓa, ɗəfəs wardə də tatwãh na mambray nani.

¹⁴ An molhõyõ dəssan anokum da tay əɗɗa wəzləra na Pak sən Yawe na, dəzbangən əɗɗa na wəzləra na Pak van də mahenziŋ nani; əɗɗa nan məstaka adawsan sukum, na molhõyõ va na wətdəlva.»

Ernene agulənək gizlirke nalma də Maŋgəlva

¹⁵ Aka pay məmpa təki nassa na, slaybuwən aguluk təki nassa, va wənahən na gizlirke nalma də Maŋgəlva, məs ɗerewel nawsler asan addəvən nak sərətə. Də moskoy na, ndəɗaŋ kpaŋ kerker va offo aka təki nassa hã təki dadaŋgə.

¹⁶ Agəɗək vas ammba zəni; slaybuwən aguluk təki nassa, də dəfəɗ na, tahəŋ ulan kerker vit va offo.

¹⁷ Va slaybuwən aslan zən a disiŋ kiy gizlirke nalma də Maŋgəlva pakə, mə Israyelɗe əsmeŋ sə gəleti; a təki slaybuwən aziwi, adaki mə Israyelɗe adawvernən dibirgidik neti.

¹⁸ Dəka əpel na Yawe mə Israyelɗe adaddoŋgu. Dəka əpel na Yawe adawvernən dibirgidik neti. Va slaybuwən anziy aka təki nassa pak net tahəŋ dikke.

¹⁹ An slaybuwən anziyək diyɗa aka təki nassa na, mə Israyelɗe əganən Yawe, awzaraŋ ɓa.

²⁰ Pay mbərən slaybuwən əɗɗa əvoŋ siɗikke kaka' aka təki nassa. Dəka əpel na Yawe ndəɗaŋ əssoŋ dikke; dəka əpel na Yawe ndəɗaŋ əmbataŋgə.

²¹ Mbərən na, slaybuwən van əsan təŋ də moskoyo hã gap də mompumo kaka'ə; an aslanək zəni də mompumo na, ndəɗaŋ əmbataŋgə. Awaniɓa na, slaybuwən əsan huruɓ hã kimi; an aslanək zəni ndəɗaŋ əmbataŋgə.

²² An slaybuwən anziyək aka təki nassa pakə, dəsan əvoŋ sula may təla awaniɓa ənziya diyɗa zlaŋgə, mə Israyelɗe əssoŋ dikke awmbataŋ ɓa; an slaybuwən aslanək zəni, ndəɗaŋ əmbataŋgə.

²³ Dəka əpel na Yawe adawteheŋgi; dəka əpel na Yawe adawmbataŋgə. Tahəŋ əɗɗanən wəza na Yawe də əzban va Yawe aprəman sit də ma Moyisi.