Əŋɗa 8 - Bible en Guidar

Va məɗi lalamɗe

¹ Yawe apel sənək Moyis amna:

² «Apelsən Aron, anah sən na: pay kədasɗe lalamɗe na, lalamɗe en buhul dəkekeɓe'ingən ba təki nawɗi lalam.»

³ Aron aɗɗak vaska: asɗek lalamɗe aba təki nawɗiyit va Yawe aɗi wən nan sən Moyisi.

⁴ Vaŋki məzaɓ təki nawɗi lalam vani: Məbayni təki nawɗi lalam van də meleŋge təŋ səza gabbani hã gap uffiyo nani va zev an Yawe arbə sən Moyis addəv issine.

Əwel net mə leviɗe

⁵ Yawe apel sənək Moyisi, amna:

⁶ «Awel mə leviɗe səret mə Israyelɗe aslsleye.

⁷ Vaŋ kədawgəɗ sit naslsleyti: akso' iŋkile naskoɓ mambray aketi; dəkkratən gəba zit təh də slambər, dəskoɓin lukutɗe neti, asna wabburongu.

⁸ Dəgəmaŋgən medgeɗge taka, gəm əvəl an məŋgla na gəpa məllaɓən də mẽlẽ. Kəgəmgən medgeɗge masula'ən ammba matuya vi mambraya.

⁹ Kəddergitigin mə leviɗe aba gizlirke nalma də Maŋgəlva, kəkkeletigin mə Israyelɗe beymeti.

¹⁰ Kəddergitigin mə leviɗe aba Yawe, asna mə Israyelɗe dəɗinəngən vet aketi.

¹¹ Asna Aron dərbetigin mə leviɗe va əvəl məs mə Israyelɗe arbaŋ sən Yawe, dəssoŋgən vi ədawgən wəza naba Yawe.

¹² Mə leviɗe dəɗinəngən vet aka kiyit medgeɗgeɗe neki. Kipsiningin medgeɗgeɗe vet sən Yawe; taka na matuya na mambraya, an mbərən tamə, na matuya nawzla kurmbuɗuku, vi kaɗɗa mahenziŋ navvuyon mambray aket mə leviɗe.

¹³ Kəziwgitigən mə leviɗe aba Aron dit kirtini, kərbetigin va əvəl mərban sən Yawe.

¹⁴ Kəɗohigin mə leviɗe temme səweleŋgit mə Israyelɗe, dəssoŋgən ka nawa.

¹⁵ Sədərɓagan kan na, mə leviɗe dəzzoŋgən əɗɗa wəza addəv gizlirke nalma də Maŋgəlva. Kəslsleyigin kana, kipsugin də əzoket va əzokon əvəla,

¹⁶ vi mipsiwti kpak səweleŋgit mə Israyelɗe nəzeɓetik ka naw a gəla en muwa na uwa maddaabəŋ pakə va wənahən na a gəlet tiziɗe net mə Israyel beymeti.

¹⁷ Vi tizi net mə Israyelɗe pak nawi, na ɗəf titire də an na zəga mamayã pakə. Aka pay nəbey tiziɗe naka dələv na Eziptə beymet na, nəzeɓetik ka nawa.

¹⁸ Vi nəgimik mə leviɗe a gilet tiziɗe net mə Israyelɗe pakə,

¹⁹ nəpsinik sən Aron gəm sit kirtini, səweleŋgit mə Israyelɗe na, mə leviɗeŋgə mipsit mə Israyelɗe vi dəɗɗanəngən wəza a gilet addəv gizlirke nalma də Maŋgəlva, gəm dəɗɗanəngən mahenziŋ navvuyon mambray aketi. Vasna, gəbay arme na mə Israyelɗe əmpa vi agapaŋ a matuya ɓa.»

²⁰ As vani may Moyis, Aron də əsap net kirtin Israyelɗe pak aɗɗaŋ sit mə leviɗe. Mə Israyelɗe aɗɗan sitinik səɗek va Yawe aɗi wən nan sən Moyis aka an dəwəl sit mə leviɗe.

²¹ Mə leviɗe abburunən kiziti, askoɓinik lukutɗe neti. Aron epsinik sən Yawe də əzoket va əzokon əvəla, aɗɗak mahenziŋ navvuyon mambray aket vi kabburti.

²² Siske kan na mə leviɗe addoŋguk əgəm wəza net addəv gizlirke nalma də Maŋgəlva, aba Aron dit kirtini. Məɗɗani va Yawe aɗi wən nan sən Moyis aka an dəwəl sit mə leviɗe.

²³ Yawe apel sənək Moyis amna:

²⁴ «Mə levi pak təŋ səza wəzva kaklaw sula kiyən sle' na, dədegən əɗɗa wəza nan naddəv gizlirke nalma də Maŋgəlva, aski an dəwəl siti.

²⁵ An wəzva nan agapək kaklaw sle' na, dəppangən wəza vani, kawgəɗ səni vavyak naɗɗa wəza əmpa ɓa.

²⁶ Wabbah sit milmiŋgiɗin ədawgən wəza addəv gizlirke nalma də Maŋgəlva, ya vavyak tay azan əmpa naɗɗa wəza ɓa hara, Aski mahenziŋ kədawɗi aka an dəwəl sən wəza net mə leviɗe.»