Əŋɗa 6 - Bible en Guidar

Mahenziŋ aka əsway naɗɗa wəza sən Daya

¹ Yawe apel sənək Moyis amna:

² «Apel sit mə Israyelɗe, anah sit na: an ɗəfa awaniɓa gulku, aynanək napsən kiyzən sən Yawe də əsway ammbani,

³ asna adawsa mbazla na megezlembirke may zəga məhəsən ɓa: adawsa moɗokroy ɓa gəm zəga nawsa məhəsən ɓa, adawsa mbazla na megezlembirke məɗotit ɓa, adawzəm kirtin megezlembirke məddəketi may məkliwit ɓa.

⁴ Hã pay an aɗi naɗɗa wəza sən Daya van gapə, adawzəm zəga tətaka dayday məɗɗan də uwa na megezlembirke may də mahayən awaniɓa də gəban ɓa.

⁵ Hã pay an aɗi asway naɗɗa wəza sən Daya van gapə, slambər adawrəŋgən kiyən ɓa; hã ənziya məs aynan nappan kiyzən sən Yawe gərakə, məɗiyən ta' adawsani, dəppangən muhur kiyən əɓay dəvani.

⁶ Hã pay an aɗi dawɗi kiyzən ta' naɗɗa wəza sən Yawe van gərak, adaddan aza ɗəf məmtən ɓa.

⁷ Dəsan kigəbay na afəni awaniɓa nat mani, na məlməni awaniɓa nat məlmən zlaŋ, adawki heslepe azan də əne' ezet an amtaŋgək ɓa, vi tay də zəga narban əwel na Maŋgəlva nan aka kiyən.

⁸ Hã pay an aɗi naɗɗa wəza sən Daya van gərakə, wasan məwelin sən Yawe.

⁹ An ɗəf amtək gurzik a maŋgavan pal, azlzlaɓanək kiyzən məs apsən Daya nak na, dəfaɗgən kiyən van pay əslslayən; dəfaɗgən aka pay mabuhuloni,

¹⁰ pay madodopoɗon na, dəkigən mukuɗuŋguleɗ sula awaniɓa kirtit biŋgeɗ na maha sula sən məsdələv ama gizlirke nalma də Maŋgəlva;

¹¹ məsdələv dətawgən an taka ammba mambraya, an mbərən tam ammba nawzla kurmbuɗuku, dəzaɓgən-Maŋgəlva navvuyon mambray aka ɗəf vani, vi mambray an agəɗ də wən na ɗəf məmtənəŋ ka. Pay dəpaska'a ɗəf van adaslslaya,

¹² dəmsakgən əppan kiyzən sən Yawe addəv ənziya məs aynan nassa məwele nanəŋka, dəkigən ndargayãk na wəzva taka nawtaw nawzaɓan wəna. Əvoŋɗe en dətoŋgoŋ tahəŋ addəv əŋɗa ɓa, vi ənziya nassan ka məwele azlzlaɓka.»

¹³ Mahenziŋ dəwəl sən məwele yaŋka: pay ənziya nassa məwele nan aggrakə, kawkini yi ama gizlirke nalma də Maŋgəlva,

¹⁴ dəkigən əvəl nan sən Yawe: ndargayãk məs wəzva taka məza heslepe azat ɓa ka nawzla kurmbuɗuku, wət təmaŋgək muguluŋgut na wəzva taka məza heslepe azat ɓa, nawzaɓ-Maŋgəlva navvuyon mambraya gəm ndargayã məza heslepe azan ɓa nawzaɓ-Maŋgəlva kawki zazaya;

¹⁵ peŋ kəkgəl məza wuɗo ɓa mədan də gəpa kukuɗo, gəpa məpəpla məllaɓən də mẽlẽ gəm paŋkasu məza wuɗo ɓa də mẽl azani, sap də əvəla may zəga məŋgla nawpesl afuŋ.

¹⁶ Məsdələv dəkegin aba Yawe dəzaɓgən-Maŋgəlva navvuyon mambraya də an na əvəl nawzla kurmbuɗuku.

¹⁷ Dəwəlsən ndargayã na, dəzaɓgən-Maŋgəlva sən Yawe, sap də peŋ kəkgəl məza wuɗo ɓa naka vi kawrəh zazaya; əmpa na, məsdələv dəgəɗgən əvəl də gəpa gəm əvəl an məŋgla nawpesl afuŋ.

¹⁸ Məwele dəfaɗgən kiyən məs aɗiyəŋ kan ama gizlirke nalma də Maŋgəlva, dəgəmgən muhur naka kiyən məs aɗiyəŋka, dəzgangən aka offo məzuzla ammba əzaɓ-Maŋgəlva nawrəh zazay naka.

¹⁹ Məsdələv dəgəmgən papaya na ndargayã nak aka adəka, də gəpa məpəpla səddəv kəkgəla gəm paŋkasu məza wuɗo ɓa; dəɗigən pakəs aka dagrakay va ɗəf məwele naka, ɓa'sa nan van afaɗək muhur məzərban əwel nan vani.

²⁰ Məsdələv dərbetgin sən Yawe də əzoketi; zəga na matuya məs nawsan ka na məsdəlvi yi, sap aza makran məs adawzokon naka gəm mettile məs adawgəma. Səɓɓa asna, məwele na Daya van waɓap əsa mbazla kana.

²¹ Aski mahenziŋ dəwəl sən ɗəf məwele na Daya məs dədaswaya; aski əvəl an adaɗɗa sən Yawe ammba ənziya nani, mbəksa an adawɓap əɗɗa na kiyən. Dədawgən aka an asway də əzban mahenziŋ na məwele məs atoŋ wən nanəŋka.

Əpel na əɓuhma

²² Yawe apel sənək Moyis amna:

²³ «Apel sən Aron dit kirtini, anah sit na: vaŋki əpel an kədawpeleŋ nawki əzaɓ aket mə Israyelɗe:

²⁴ “Kəta Yawe dəprikgin əzaɓ akokum, dəgukum!

²⁵ Kəta hara Yawe dəkekeɓekum, dupsukum mbəlembəle!

²⁶ Kəta Yawe dəsilgin haran akokum, dəpsukum zazaya!”

²⁷ Dəyanəngən iya naw vas aket mə Israyelɗe, in vat nədawɗi əzaɓ naw aketi.»