Əŋɗa 5 - Bible en Guidar

Mahenziŋɗe də tivenanziya temtemi ( 5:1—8:26 ) Tive nawgilgit ɗiy məs heslepe ezeti

¹ Yawe apel sənək Moyisi, amna:

² «Aɗi wən nan sit mə Israyelɗe dəgilginən ɗəf məskokolo, ɗəf məs ban adayma, awaniɓa məs dərəŋgən ɗəf məmtən pak sə dibirgidiki.

³ Kəgilgitingəni, ɗəf mizilini, gulku, kəgilgitingin sə dibirgidiki. Adarnokonən dibirgidik net mə Israyelɗe məs nəsaw aweleŋtiŋ ɓa.»

⁴ Vas mə Israyelɗe aɗɗanəni; agilgitinik sə dibirgidiki. Mə Israyelɗe aɗɗanənək va Yawe anah sən Moyisi.

Əfaɗ aka mambraya

⁵ Yawe apel sənək Moyisi, amna:

⁶ «Anah sit mə Israyelɗe na: an ɗəfa awaniɓa gulku aggarək ki mahenziŋ na Yawe, araygən sənək ɗəf mbərən, ɗəf nan tay də wən akani.

⁷ Ɗəf van dərban mambray an agəɗə; dəmndagangən zəga van sən afən nani gəm taka səddəv sle'na əlbah nan azan sapə.

⁸ An afən zəga van ɗəf nan na gugo tay nawfaɗ sən ɓa, zəga vanəs wasan ka na Yawe, va wənah na, na məsdəlva, mbəksa ndargayã məfaɗ naɗɗa matuya navvuyon mambray na ɗəf məs wən akan dəndəni.

⁹ An məgəm səddəv əvəl na matuya net mə Israyelɗe pak, zəgeɗ na mahenziŋ məs adawkiyaŋ sən məsdələv pak na məsdələv vanəŋgə.

¹⁰ Əvəl na matuya məs ɗəf aki pak kapsəni məsdəlev vani, məs ɗəf apsən məsdələv pak nani yi.»

Mahenziŋ aka kotoroku

¹¹ Yawe apel sənək Moyisi, amna:

¹² «Apel sit mə Israyelɗe anah sit na: waɓap əɗɗa aka ɗəfa, kuzun guluk nan tat ənziya moggon ɓa, təsat viyən kaka' ɓa,

¹³ mbaraka ɗəf mbərən məza zələt əsənən akan ɓa avoŋgətəka, yaŋ təsat də haramba mahaɗama, məza ɗəf əsən wən nan ɓa, məza ɗəf əggbot akat ɓa;

¹⁴ an əɗɗum na kotorok adek aka ɗəf vani, yaŋ adassel akat a makrani, dəka tat də haramba gesiŋ, awaniɓa an əɗɗum na kotorok adek aka ɗəf vani asselik akat a makran dəka tat də haramba ɓa,

¹⁵ ɗəf van dəkətəgən ɗak nan vat aba məsdəlva. Dəkəgən əvəl məs məŋgla ammbat ɗak vatə: ndəni gəpa na palga kilo hoku. Adawmə' mẽl aka gəpa van ɓa, adawɗi tursan babar akan ɓa, vi əvəl ammba kotoroki yi, əvəl ammba əssaka, məs dədawgilgin mbərayən appaka.

¹⁶ Məsdələv dəkətəgən guluk vat ziw aba Yawe.

¹⁷ Məsdələv dəzigin iŋkile na matuya addəv mesteɓe na dəlva, dəndəgən burɗuk səfuŋ sə təki nassa, dəzigən eret iŋkile veti.

¹⁸ Məsdələv dəziwgətgən guluk vat aba Yawe, dəppasgən muhur kiyta; dəɗigən əvəl nammba əssak nak a dagrakay vata, va ənah na əvəl ammba kotoroku, dəka nan van tam tay dit iŋkile tatrãhɗe ammba van, məs mefɗeke ereti.

¹⁹ Məsdələv dəswaygətəgən guluk vat də ənah sət na: An gesiŋ ɗəf tay dəvoŋguk ɓa, kəzlzlaɓan ənziya nok ɓa, kəgəɗ zəga net wil kəmakan zəluk ɓa na, kəta mefɗeke neret iŋkile nasaŋ adarmukun ɓa.

²⁰ Ya an mbaraka kəkəwək a gizbe, kəraygənək kiko, ɗəf temme məza zəluk ɓa avoŋguk də isi.

²¹ Məsdələv dəswaygətəgən na mefɗeke də ənah sət na: kəta an mefɗeke də əsway adaɗɗaŋ na, Yawe dərban də is aweleŋgit ɗiy noko: Yawe dəkkpoŋgok ndarzlaykə, dəska gədəvuk təmbəwə.

²² Iŋkile məs mefɗeke eretiŋ watoŋgoŋ aka zlem zuk kaska gədəvko, kakkpoŋgok ndarzlaykə. Guluk vat təzlangən na: Dəsan vaska, dəsan vaska.

²³ Siske na, məsdələv dəvergin mefɗeke vet dəveri, dəskoɓigin eret iŋkile net mefɗeke.

²⁴ Dəpsətəgən iŋkile tatrãhɗe məs mefɗeke eret nek sət guluk vatə, təsegəni; iŋkile də mefɗeke eret vetis watoŋgoŋ aka zlem zət kawraygəta.

²⁵ Məsdələv dətafgən əvəl nammba kotorok nak səvat guluk vatə, dərban səngən Yawe, asna dəɗigən aka təki nawzəməɗ matuya.

²⁶ Məsdələv dəndəgən gəpa an məvəl dəndən van humsuku, dəsangən va zəga naɗɗumoni, dəzlagən aka təki nawzəməɗ matuya; səɓɓan na, dəpsətəgən iŋkile vet sət guluk vat təsegini.

²⁷ An apsətək iŋkile vet təseke, an dədarba yaŋka: an tat də haramba gesiŋ təsat vi zələt kaka' ɓa, iŋkile məs mefɗeke eretiŋ wakkpaŋgaŋ tatrãhɗe dawtoŋgoŋ aka zlem zəta; gədəvət waskə, gəlet kirin warayə. Guluk nat watəkkpaŋ ka zəga narban əray net mefɗeke aweleŋgit ɗiy nata.

²⁸ Ya an mbaraka guluk vat tərbə wil ɓa, tay amat ɓa, asna zəga tay nawgəɗsət ɓa, watəwə.»

²⁹ Aski mahenziŋ an dəwəlsən wən na kotorok, akat guluk məs təraygən ətawwən, təmbəɗan zələt təppan zət əɗɗa əku a gizbe,

³⁰ awaniɓa aka ɗəf məs əɗɗum na kotorok ade akani, dədassel akat a makran na, dəkət aba Yawe, məsdələv dədawgəngən memeɗeŋ na mahenziŋ vanəska.

³¹ Zələt asan na də wən akan ɓa, nat guluk na, watəzəm sahã aka mbərayən nata.