Əŋɗa 4 - Bible en Guidar

Wəza net mə leviɗe Kirtin Kehat

¹ Yawe apel sit may Moyis də Aron dawnəh na:

² «Məver mə leviɗe en zev Kehat aza mahəlfa neti, aza məlma na ziti,

³ məs dəɗɗaŋ wəzva kaklaw hoku əmbat aza kaklaw sle' pak Kawndeti naɗɗa wəza addəv gizlirke nalma də Maŋgəlva.

⁴ Wəza net Kirtin Kehat addəv gizlirke nalma də Maŋgəlva na, wəzga sləma aket zəgeɗ en məɗiyit ta' ammba wəza na matuya kaka'ə.

⁵ Pay sən mə Israyelɗe adawsilyoŋ malaka na, Aron dit kirtin dəzzoŋgən tagay əpprət gabaga məherin narslan nawtawan gizlirke, dəsərətəngən akoti məs məɗi ɗerewel na wənmiyna addəvən;

⁶ dəpakəngən gəba na kilif metiŋgin məs adawyaŋ na dofeŋ akani, siske na, dəsərətəngən bayman də gabaga mənɗerit va əffuyo na muŋgus. Dəgulningən zleŋɗe na təbəz nawslan tabəl van dənɗaŋ.

⁷ Dəpakaŋgən gabaga mənɗerin va əffuyo na muŋgus, dəɗiyaŋgən mawayɗe, hiliŋgiɗ net iŋkile, hinziwɗe gəm bəbərɗe nawpesl zəga aka tabəl vani.

⁸ Aka zəgas sapgən na, Dəpakaŋgən gabaga lelekeɗek pepreŋ witwiti, dəsərətengən də gəba kilif metiŋgin adawyaŋ na dofeŋ; siske na, dəgulningin zleŋɗe na təbəz nawslan tabəl van dənɗaŋ.

⁹ Dəgəmaŋgən gabaga mənɗerin va əffuyo na muŋgus, kawsərət zəga nawɗi lalamɗe akan, dəsangən zəga nawkekeɓe' təkiya; dit lalamɗe nani, mərmaɗe nani, kasliɗe na moŋglo nani, may bəbərɗe temtem na mẽl məs dədawtər aza əzaɓani.

¹⁰ Dəziningən zəgeɗis beymet addəv gabal na gəba kilif metiŋgin məs adawyaŋ na dofeŋ, dəɗinəngən aket ɓeɓele.

¹¹ Dəpakaŋgən gabaga mənɗerin va uffuyõ na bəbərət mətəwək aka təki na meleŋge naɗɗa matuya; dətərnəngən də gəba kilif metiŋgin adawyaŋ na dofeŋ, dəgulningin zleŋɗe nani.

¹² Siske na, dəndeningin zəgeɗ naɗɗa matuya dənɗaŋ addəv gəla salala beymeti, dəsəritingin də gabaga mənɗerin va uffuyõ na muŋgus, dəpakəngən gəba kilif metiŋgin adawyaŋ na dofeŋ, dəɗiningin aket ɓeɓeleɗi.

¹³ Dəndanəngən moŋglo sə matuya, dəpakəngən gabaga pepreŋ witwit aka təki vani;

¹⁴ Dəɗiningin zəgeɗ naɗɗa matuya dənɗaŋ beymet akani, va: mazaŋzaŋɗe, zəga ma yorkok nampa slu sə koffo, ziginɗe, hĩlĩŋgiɗ nakso' zəga, zəgeɗ na təki nawzaɓ-Maŋgəlva gərakə. Dəpakəngən gəba na kilif metiŋgin məs adawyaŋ na dofeŋ akan bayman, dəgulingin zleŋɗe na təbəz nawslan təki nawzaɓ-Maŋgəlva vani.

¹⁵ Aka ɗiy tahəŋ əsilyoŋ əmbat na, Aron dit kirtin dəgrakanəngən ətər təki nawzaɓ-Maŋgəlva dit zəgeɗ na wəza nan pakə; siske kan na, kirtin Kehat dəzzoŋgən əkanəni. Adawrəŋgənən gizlirke nalma də Maŋgəlva ɓa, vas ɓa wamtaŋgə. Aski an kirtin Kehat adawslaŋgə.

¹⁶ Ele'azar wətən məsdələv Aron dəzgəgən sləma aka mẽl na zəga nawkekeɓe' təkiya, tursan nawzla, əzaɓ-Maŋgəlva naɗɗa pay pak də zəga na mabardaw an məɗɗa pay pakə may mẽl nappay na mahenziŋ; ndəni nazlga sləma aka təki nassa də man nani gəm zəgeɗ en naddəvən beymeti, may aka gəla salala dit zəgeɗ en dulaŋ sənəni.»

¹⁷ Yawe aɓsit may Moyis də Aron na:

¹⁸ «Kədawzanən zev Kehat əɗohən sə weleŋgit mə leviɗe ɓa.

¹⁹ Aŋ kədaɗɗaŋ viyti, vi dəssoŋgən medereti, əmta adawgimit dadder aza təki naslslər ɓa: Aron dit kirtin dəzzoŋgən əɗiyit nawaydi pak aka wəza nani, aba zəga an adawsla.

²⁰ Vasna, azzoŋ na ula gəla salala addəv ənziya siɗikke dayday, ndəɗaŋ kamtaŋ ɓa!»

Zev Gerson

²¹ Yawe aɓsən Moyis na:

²² «Aziwgin əŋɗa net kirtin Gerson aza məlma na ziti, aza zeŋviti.

²³ Aver zel en də wəzva kaklaw hoku əmbat aza kaklaw sle'i, məs nawɓapaŋ əɗɗa hara wəza neti, va ənah na əɗɗa wəza addəv gizlirke nalma də Maŋgəlva.

²⁴ Wəza na zeŋvit Gersonɗe yaŋ an adaɗɗaŋgə may an adawslaŋgə:

²⁵ dəsletingin zəgeɗ nawsərət aka təki nassa, gəm gizlirke nalma də Maŋgəlva də zəga nawsəret akani, ana zəga an nawsərət akan na gəba kilif metiŋgin, adawyaŋ na dofeŋ məs dədawɗaman naka, may gabaga na metive na gizlirke nalma də Maŋgəlva,

²⁶ gabagaɗe nawbay gawla sən daŋgla, gəm məzlzlara na maddamba na kirit memeŋgle məs tərwəsl ki təki nassa də təki nawzaɓ-Maŋgəlva, sap may helegeɗ neti dit zəgeɗ na wəza net beymeti: bayman an məpsit mə Gersonɗe naɗɗa wəza neti.

²⁷ Wəza net mə Gersonɗe pak dəka əpel na Aron dit kirtin adawsan, an adawslaŋ dəsle də an adaɗɗaŋ dəɗɗe pakə: kəŋɗan sitingən an adawslan pakə.

²⁸ Aski wəza naɗɗa dəwəlsən məlma net kirtin Gerson addəv gizlirke nalma də Maŋgəlva, ndəni wəza an adaɗɗaŋ aba məsdələv Itamar wətən Aron.»

Zev Merari

²⁹ «Dəwəl sit kirtin Merari na, kəvergin aza mahəlfa neti gəm aza məlma na ziti.

³⁰ Kəvergin zel en də wəzva kaklaw hoku gap aza kaklaw sle'i, məs naɗɗaŋ hara wəza net addəv gizlirke nalma də Maŋgəlva.

³¹ An dəsan ka nawsla net yaŋka, ndəni wəza an dəwəl sit gərak addəv gizlirke nalma də Maŋgəlva: dəsletingin marzeɗ na təki nassa, məziyeɗ nani, dədəkeɗ nani, tilit dədəkeɗ veti,

³² dədəkeɗ məs dəherin daŋgla, də tilti, məmpa afuŋ neti, helegeɗ neti dit zəgeɗ temtem məs adaɗɗaŋ wəza dənɗaŋ pakə. Kərban sənəngən nawaydi pak zəga nawsla məs dəwəlsəni.

³³ Aski wəza na zev Merari, ndəni wəza gərak an dəwəl sit naɗɗa addəv gizlirke nalma də Maŋgəlva aba məsdələv Itamar wətən Aron.»

Əŋɗa net mə leviɗe naka wəza

³⁴ Moyis də Aron gəm ɗiy gugriɗ na mahəlfa averinik kirtin Kehat aza zeŋviti gəm aza məlma na ziti,

³⁵ zel en də wəzva kaklaw hoku gap kaklaw sle', naɗɗaŋ wəza addəv gizlirke nalma də Maŋgəlva.

³⁶ Sap na zeŋvit pak agəɗək zel 2 750.

³⁷ Aski sap na zeŋvit Kehatɗe beymet məɗɗaŋ wəza addəv gizlirke nalma də Maŋgəlva, en Moyis də Aron avereŋ dəka əpel məs Yawe appan wən nan ava Moyisi.

³⁸ Sap net kirtin Gerson yaŋka. An məŋɗeti aza zeŋviti gəm aza məlma na ziti,

³⁹ beymet en də wəzva kaklaw hoku gap aza kaklaw sle', məs naɗɗaŋ wəza net addəv gizlirke nalma də Maŋgəlva na:

⁴⁰ sap na zeŋvit aza məlma na zit agəɗək zel 2 630.

⁴¹ Aski sap na məlma na zeŋvit mə Gersonɗe, beymet en məɗɗaŋ wəza addəv gizlirke nalma də Maŋgəlva, məs naddəv əver an Moyis də Aron avereŋ dəka əpel na Yawe.

⁴² Sap net kirtin Merari yaŋka: an məŋɗeti aza zeŋviti gəm aza məlma na ziti,

⁴³ beymet en də wəzva kaklaw hoku gap aza kaklaw sle', məs naɗɗaŋ wəza addəv gizlirke nalma də Maŋgəlva na,

⁴⁴ sap na zeŋvit agəɗək zel 3 200.

⁴⁵ Aski sap na zeŋvit kirtin Merari addəv əver an may Moyis də Aron avereŋ dəka əpel na Yawe məs apel də ma Moyisi.

⁴⁶ Sap net mə Leviɗe beymet yeŋki, məs Moyis də Aron gəm ɗiy gugriɗ net mə Israyelɗe avereŋ, də əŋɗa aza zeŋve gəm aza məlma

⁴⁷ net məs wəzva kaklaw hoku gap aza kaklaw sle', məzəɗɗaŋ wəza narma biyna may nawslan zəga addəv gizlirke nalma də Maŋgəlva.

⁴⁸ Sap net agəɗək zel 8 580.

⁴⁹ Nawaydi pak məŋɗan səni zəga an adaɗɗa də an adawsla, əzban va Yawe appan wən nan ava Moyisi; nawaydi pak tay də wəza məs Yawe aɗi wən nan ava Moyisi.