Əŋɗa 35 - Bible en Guidar

Walaŋgəleɗe net mə leviɗe

¹ Yawe apel sənək Moyis a təki məpəlayya na Mo'ab go'o də Yurden, dakadaka də Yeriko, amna:

² «Anah sit mə Israyelɗe dərslaŋgən hara dələv net sit mə leviɗe, walaŋgəleɗe gugriɗ məs adassoŋ adak də gəla. Kəpsitingən təki nawtaɗ kiyit walaŋgəleɗe gugriɗ vet tərwəslə.

³ Walaŋgəleɗe gugriɗ vet wassoŋ ka teki nassa net də gəla, təki nawtaɗ dəsangən sən zəga mamayã neti, may aryeɗ net temtemi.

⁴ Təki nawtaɗ net walaŋgəleɗe kədapsitin mə leviɗe vetis na, dətəŋgən səza metər səkat sle' tagay səba zlava tərwəslə.

⁵ Deppaka na walaŋgəla van na, kərslaŋgən metər gabal-gabal dəmmba pay nampum, də dohoŋ, dəmmba pay na moskoyo gəm də disiŋ, walaŋgəla kan addak təkiya. Aski təki nawtaɗ məs adawrəhaŋ ki walaŋgəleɗe net tərwəslə.

⁶ Walaŋgəleɗe gugriɗ kədarslaŋ sitin mə leviɗe vet na, ndəɗaŋgə walaŋgəleɗe gugriɗ sləre nanza sit piɗe, kəɗiningin ammbet məbayaŋ gəbay dərəhaŋgən təki nawɗam adaka; kərslaŋ sitingən walaŋgəleɗe gugriɗ meɓɓet kaklaw poɗo kiyit sula ezeti.

⁷ Walaŋgəleɗe gugriɗ kədarslaŋ sit mə leviɗe na, wassoŋ sap pak kaklaw poɗo kiyit dədopoɗo, taka pak də təki nawtaɗ nani.

⁸ Walaŋgəleɗe gugriɗ vet məs kədarslaŋ səddəv hara dələv net mə Israyelɗeŋ na, kərslaŋgən diyɗa səzan net ɗiy məs net diyɗa, siɗikke səzan net ɗiy məs net siɗikke. Mahəlfa pak dərsləgən walaŋgəleɗe gugriɗ nan sit mə leviɗe ulan aza slosloprok na dələv an məpsəni.»

Walaŋgəleɗe gugriɗe nanza sit piɗe

⁹ Yawe apel sənək Moyis, amna

¹⁰ «Anah sit mə Israyelɗe na: pay kədaggaraŋ ki Yurden kawtoŋ a Kana'an na,

¹¹ Kəweleŋgən walaŋgəleɗe gugriɗ məs nassoŋ sukumən ka walaŋgəleɗe gugriɗ na təki nawɗama. Ɗəf məs mandara agəɗ avani, dərahgən təki nawɗam adaka.

¹² Walaŋgəleɗe gugriɗ vet watəraŋ sukumən nawɗam vi kawkõh səva məmpəl ki piɗe. Kawbayni məbaygəbay van tak dəziw abet ɗiy pak nawtaw wən akan ɓa ɓa;

¹³ Walaŋgəleɗe gugriɗ nawɗam adak kədawɗiyaŋ wassoŋ sləre.

¹⁴ Kəɗiyaŋgən dəgar ki Yurden hoku, gəm hoku aka dələv na Kana'an. Dəssoŋgən Walaŋgəleɗe gugriɗ na təki nawɗama.

¹⁵ Walaŋgəleɗe gugriɗ sləre vetis watəraŋ nawɗam net mə Israyelɗe məstaka də molhõyõ may malaka mədaw tive na waleŋti; naway di pak məs mandara agəɗ avani warah təki nawɗam adaka.

¹⁶ An də təbəz arga, ɗəf van zamə, asna məbay gəbayi; kawbayni məbaygəbay vani.

¹⁷ An askak də gərəm gala nawbay ɗəfa yaŋ amtə, asna məbay gəbayi, kawbayni məbaygəbay vani.

¹⁸ Awaniɓa argak də wəlaŋga gala nawbay ɗəfa, məbay gəbayi; kawbayni məbaygəbay vani.

¹⁹ Məmpəl ki piɗe dədawbay məbaygəbay vani: an aləm sənək na, dəbaya.

²⁰ An ɗəf van dəslaŋ aslaŋgan ɗəf an dəmtə van də wəzele, awaniɓa wəlaŋga azləmbrakan na daraw yaŋ abaya,

²¹ an də van humsukhumsuk argak də əzel addəvən yaŋ abaya, ɗəf məs dərga van kawbayni yi: məbay gəbayi. Məmpəl ki piɗe pay aləm sən na, dəbaygəni.

²² Ya an dəvani ɓa, məza də əzel ammban aslaŋgan ɓa, awaniɓa azgan zəga akan məza na daraw ɓa,

²³ awaniɓa, haran dula ɓa, yaŋ askan gərəm gala nawbayən, yaŋ gərəm van abət akan amtə, an aɗɗa sənək vas məza də daraw addəvən ɓa, məza əŋgəlsən mbərayən ɓa,

²⁴ sap net ɗiy dətawgən wən na walaŋ ɗəf an dərga ɗəfa də məmpəl ki piɗe, əzban azet tiveɗnanziyeŋki.

²⁵ Sap net ɗiy dəkõhgəngən məbaygəbay səva məmpəl ki piɗe, dəmndagangən a walaŋgəla-metiŋ nawɗam sit piɗe məs aɗam adaka. Dəsangən adak hã daya net məsdəlveŋge məs məppay sən mẽl na mahenziŋ zamə.

²⁶ Ya hara kan na, an məbaygəbay agilik səka dələv na walaŋgəla-mətiŋ nawɗam sit piɗe məs aɗam adaka,

²⁷ pay məmpəl ki piɗe arəh dəgar kiyit meŋge na walaŋgəla-metiŋ nawɗam sit piɗe nani, an məmpəl ki piɗe abayəka, məmpəl ki piɗe dəbay gəbay ɓa.

²⁸ Vasna, məbaygəbay dəsangən a walaŋgəla-metiŋ nawɗam sit piɗe nan hã gap əmta na daya net məsdəlveŋge. Dərɓaga əmta na ɗəfəs kan na, dəmndangən aka dələv nani.

²⁹ Dəsan sukumgən ka mahenziŋ nawziwgin wən təstəs aza sayit kirtukum a təki kədassoŋ pakə.

³⁰ Ɗəf dəbay gəbay pak an kawbayni na, dəsan dəka əpel net ɗiy ɓəɓay dəziweŋ aka wən nani. Kawtawi wən nawbay ɗəf vi ɗəf taka aziw aka wən nan ɓa.

³¹ Kədawtafaŋ zəga nawbit ki məbaygəbay məs dədah namta ɓa; əbayi nawbayən zamə.

³² Gəm əmpa na, kədawtafaŋ zəga vi kappan əmbat əkay təki nawɗam a walaŋgəla-metiŋ nawɗam sit piɗe, may kamndan əsan də gəla aka dələv nan tak əmta na daya net məsdəlveŋge ɓa.

³³ Kədaɗɗaŋ heslepe sən dələv məs kəssoŋ akan, vi mbel zəgeɗ məkiyaŋ heslepe sən dəlvəŋgə. Ya əɓap əskoɓ mbel en dəziyaŋ səza dələv na, dit mbel na ɗəf məs dəziyi kaka'ə.

³⁴ Kədarga'an dələv məs kəssoŋ akan də gəla ɓa, məs nəsaw addaknəŋ ɓa, vi in Yawe, in tat aweleŋgit mə Israyelɗe.»