Əŋɗa 32 - Bible en Guidar

Mahəlfaɗə hoku dəmmba pay nampum na Yurden

¹ Kirtin Ruben dit kirtin Gad tahəŋ dit gazlaŋɗe ɗəkɗəkə. Aza ula dələv na Yazer gəm dələv na Galad, arəhənək na, kivadələv nan aslək aza təki nawtaɗa.

² Yaŋ Kirtin Gad dit kirtin Ruben azzoŋgu, anah sitin may Moyis, məsdələv Ele'azar gəm ɗiy gugriɗ na mahəlfa aɓɗaŋ na:

³ «Atarot, Dibon, Yazer, Nimra, Hesbon, Eleyale, Sebam, Nebo gəm Be'õn,

⁴ dəlvəs məs Yawe aska wəlan səbet mə Israyelɗeŋ, dələv nan aslək aza təki nawtaɗa; ya mənam tat dit gazlaŋɗe.»

⁵ Aɓɗaŋ əmpa na: «Va wakətafsəm na, apsəm dələv van ka hara təki namə; kədaggargəm ki Yurden ɓa.»

⁶ Yaŋ Moyis Azlan sit kirtin Gad dit kirtin Ruben, amna: «Mbara! Milmiŋgiɗkum waddoŋ ama wəlpa, kəŋglaŋ na mənokum aŋ gurom sa?

⁷ Vi miyi kədawbayən mekret mə Israyelɗe daddoŋ aka dələv məs Yawe adapsit di?

⁸ Vaski migilkum aɗɗaŋ, gala nəslin sə Kades-Barneya, ədawsəŋgləkan dəlva.

⁹ Apeŋgeŋ hã a təki məpəlayya na Eskol, səza asəŋgləkanən dələv van na, yaŋ abaynən mekret mə Israyelɗe dawtoŋ aka dələv məs Yawe apsit səkay naka.

¹⁰ Pay dəpas na, herɗe aɗɗanənək Yawe diyɗa, yaŋ asway dawnah na:

¹¹ “Ɗiy dəpeŋgeŋ sə Eziptəŋ məs wəzva net kaklaw sula ədda abe awlanən na dələv məs nəsway napsit may Abraham, Isak gəm Yakob ɓa, adan aɗɗaŋgək dədək dazbawa.

¹² Kaleb, wətən Yefunne səddəv zev Kenaz, gəm Yosuwa wətən Nun kaka' dədawtoŋgoŋ adaka, vi net azbanənək Yawe məza dədək ɓa.”

¹³ Herɗe aɗɗanənək Yawe diyɗa aket mə Israyelɗe, ndəni appet wəzva kaklaw poɗo slorslor a kapta-muyã, hã sayit ɗiy məs dəɗɗaŋ zəga an dənnek zə Yawe ɓa amtaŋ gərakə.

¹⁴ Ya yaŋ na, gebbet ɗiy mbəreyti, mokum aka əzban tilit efiŋgiɗkum, kawsilgin ədagədəv na Yawe aka Israyel!

¹⁵ Vi an kəppanənək əzban na, wazzeken ənziya net ɗiy na Israyel a kapta-muyã; vasna ɗiyiŋ wakəzetin pak aka batamkum.»

¹⁶ Ɗiy nek aza Moyis dədereŋgə, aɓsənən na: «Wamərkə gazlaŋ sit timeŋgiɗ dit gilew namə gəm walaŋgəleɗe gugriɗ sit kirtəm aŋka.

¹⁷ Asna, mənam sən kiyəm kpak mədawnda gulomɗe də kakara vi kadaw abet mə Israyelɗe hã mənam toŋgit enedda. Kirtəm wassoŋ aŋ addivit walaŋgəleɗe metiŋgit na korgu, vi kawtirit səvet ɗiy naka dəlvəŋka.

¹⁸ Məmil na anamda tak mə Israyel pak dərəh təki an haran nan ɓa ɓa.

¹⁹ Haran nam asan na dənɗaŋ dəgar ki Yurden ɓa, vi təki haran nam tay nazzadəŋka, dəmmba pay nampum na Yurden.»

²⁰ Yaŋ Moyis aɓsit na: «An kəɗɗanənək vaska, an kəgəmənək gulom aba Yawe vi kawmbat ama wəlpa,

²¹ an ɗiy nadda wəlpa nokum aggaraŋgək ki Yurden aba Yawe hã ndən meseŋgiɗin sə ban beymet rəɓəhə,

²² an ka'sa əska wəla dələv van aba Yawe kədamndoŋgu, asna wən tay akokum aba Yawe may ebet mə Israyelɗe ɓa, dələv vanəŋ wasan ka haran nokum aba Yawe.

²³ An kəɗɗanən vas ɓa hara na, mbərayən kəɗɗaŋ sən Yawe. Məsən na mbərayən nokum tay əzbokum.

²⁴ Mərke walaŋgəleɗe gugriɗ sit kirtukum, may gazlaŋɗe sit gəlew dit timeŋgiɗ nokum; ya məɗɗa an kepeleŋ də mokum hara.»

²⁵ Kirtin Gad dit kirtin Ruben apeleŋ sənənək Moyis, aɓɗaŋ na: «Gewleɗ nok waɗɗanən va kəɗi səm wən nani, daya.

²⁶ Gil nam dit kirtəmə, gazlaŋɗe gəm zəgeɗ memeyẽɗ nam beymet wassoŋ aŋ a walaŋgəleɗe gugriɗ na Galad.

²⁷ Asna gewleɗ nok dinanən dədekit nadda ama wəlpa waddoŋ wəlpa aba Yawe va kəɗi səm wən nani, daya.»

²⁸ Moyis appanək wən an aɗi dəwəlsit naɗɗa avet may məsdələv Ele'azar, Yosuwa wətən Nun gəm ɗiy gugriɗ net mahəlfaɗe na Israyel.

²⁹ Moyis aɓsit na: «An kirtin Gad dit kirtin Ruben aggaraŋgək ki Yurden də mənokum, minan dədeket nadda ama wəgay aba Yawe, pay kəskanən wəla dələv vani, asna kəpsitingən dələv na Galad ka haran neti.

³⁰ Ya an dəggaraŋ də gulom sap də mənokum ɓa hara na, hara dələv net dəsangən arokum aka dələv na Kana'an.»

³¹ Kirtin Gad dit kirtin Ruben azlanənka, aɓɗaŋ na: «Waməɗɗa məs Yawe anah sit gewleɗ noko.

³² Mənam sən kiyəm mədaggar dit zəgeɗ nawgay aka dələv na Kana'an aba Yawe; ya nam na, dələv nawsan ka nam dəsan hara Yurden nazza dəŋka.»

³³ Moyis agəmək dələv na Sihon, məlĩ metiŋ net mə Amorɗe, gəm dələv na Og, məlĩ metiŋ na Basan apsit kirtin Gad dit kirtin Ruben gəm sən wəɗak na mahəlfa na Manase wətən Yosef; dələv dit walaŋgəleɗe gugriɗ nan va meŋge net asan, dit walaŋgəleɗe gugriɗ na dələv an kiyit sulək pakə.

³⁴ Kirtin Gad arkanənək Dibon, Atarot, Arower,

³⁵ Atrot-Sofan, Yazer, Yogboha,

³⁶ Bet-Nimra gəm Bet-Haran; arketinik walaŋgəleɗe na korgu gəm gazlaŋɗe net gilewi.

³⁷ Kirtin Ruben tam arkanənək Hesbon, Eleyale, Kiryatayim,

³⁸ Nebo, Ba'al-Me'on məs iya net addəɗə gəm Sibma. Yaŋ apsitin iyaɗe teme teme sit walaŋgəleɗe məs erketini.

³⁹ Kirtin Makir wətən Manase tam mbataŋ a Galad, amõhnən dəlva, arɓihnin mə Amorɗe dəssoŋ adaka.

⁴⁰ Yas kan Moyis apsən dələv na Galad vanəs sən Makir wətən Manase, asan adak də gəla.

⁴¹ Yaŋ Yayir wətən Manase, ambat əmõh dibirgidik neti, alvan na dibirgidik na Yayir.

⁴² Nobah tam tek kenat mõh əmõhən də kiva nan pakə. Yaŋ alvan na Nobah, də iya nan tusso.