Əŋɗa 31 - Bible en Guidar

Mə Israyelɗe awakaŋ sitinik mə Madiyanɗe

¹ Yawe apel sənək Moyis amna:

² «Ampəlkiyit mə Israyelɗe aka mambray məs mə Madiyanɗe aɗɗaŋ sitiniŋka. Dərɓagan wakəsap dit ɗiy noko.»

³ Yaŋ Moyis apel sit ɗiy amna: «Məwel zel na dula suwalaŋkum, dəddoŋgən əwak sit mə Madiyanɗe, kampəlkiya na Yawe aka Madiyan.

⁴ Kəweleŋgən məzəlpaŋ gabal-gabal səddəv mahəlfa takataka sə Israyel gərak.»

⁵ Səddivit gabalɗe net mə Israyel, məweli məzəlpaŋ gabal-gabal səddəv mahəlfaɗe pakə, sapgit na, aɗɗaŋgək gabal kəlaw kiyit sula minan dedeket nawgaya.

⁶ Moyis aslinik mahəlfaɗe gabal ama wəgaya, məsdələv Pinhas, wətən Ele'azar dəlhẽt dit zəgeɗ na təki nawzaɓ-Maŋgəlva gəm gozloro avani.

⁷ Awakaŋ sitinik mə Madiyanɗe, va Yawe aɗi wən nan sən Moyis, aŋgroɓnin zel beymeti.

⁸ Sap azet ɗiy en abayaŋgə, abeyinik milyeŋge na Madiyan sle'egiti, də masalam anet may: Evi, Rekem, Sur, Hur, də Reba, gəm Balam wətən Be'or.

⁹ Mə Israyelɗe ermennik gil dit kirtit mə Madiyanɗe ka belemɗe, andenin zəgeɗ memeyẽɗ neti, may arya neti, də zəga nawrəh net pakə.

¹⁰ Aɗiyaŋgək offo sit walaŋgəleɗe neti gəm dibirgidikɗe net beymeti,

¹¹ siske asaknən zəga məs arəhaŋ səma wəgaya, ɗiyi dit zəgeɗ memeyẽɗ məs armaŋgə.

¹² Mə Israyelɗe akeninik belemɗe, zəgeɗ memeyẽɗi gəm zəga an andaŋ səma əgay pak abet may Moyis, məsdələv Ele'azar gəm əsap net mə Israyelɗe. Akeninik a dibirgidik dəsan a təki məpəlayya na Mo'ab, a ma məlpa na Yurden, a mahara Yeriko.

¹³ Moyis, Ele'azar məsdələv dit ɗiy gugriɗe na mahəlfa baymeti, agilyoŋguk sə dibirgidik ədawləmsiti.

¹⁴ Gədəv Moyis adək aket deyeɗe net vandayɗe net məzəlpaŋ gabal, dit deyeɗe net məzəlpaŋ səkat, məs dədawmilyoŋ səma əlpa vetiski.

¹⁵ Moyis aɓsit na: «Miyi! Kəppetin gil medereti!

¹⁶ Kəsənnən lewlew na, ndəɗaŋgə addəv wən na Balam dəreɗin mə Israyelɗe əɗɗa zəga mbərayən aba Yawe addəv wən na Pe'or; təŋ siskeyi gəbay mbərayən aprik aket ɗiy na Yawe.

¹⁷ Yaŋ na, məbey kirin mezeŋgleket beymet dit gil en dəɗiyaŋ zel pak gəgaŋkəŋka.

¹⁸ Kirin gorɗeŋge en ŋgbuɓɓo na, məppet mederet ka nokumə.

¹⁹ Nokum, məssoŋ a mapoho na dibirgidik əvoŋ buhulu. Mənokum məs kəbayaŋ ɗəfa, awaniɓa dərəŋgənən kigəbaya, kəbburungən zukum aka əvoŋ mohoko'ən gəm mabuhuloni. Wən vanəs awəl sukumuk gəm gorɗeŋge məs kərmaŋgə.

²⁰ Vas kədabburnin gabagaɗe beymeti, zəgeɗ en na kətəw beymeti, zəgeɗ na deɓeke na hãw beymeti gəm zəgeɗ na wəlaŋga beymeti.»

²¹ Yaŋ məsdələv Ele'azar aɓsit ɗiy en deddoŋ ama wəlpa na: «Wən an də mahenziŋ akan məs Yawe aɗi sən Moyis yaŋka.

²² Zəga tay balsən təbəz na meleŋge, təbəz Babara, təbəz pepreŋge, təbəz titire, way təbəza də təbəz adawyaŋ na eteŋ,

²³ zəgeɗ məs offo azle na ɓa pakə, anet kədawguloŋ akoffo, ya yopsa eret iŋkile na mahenziŋ adassoŋ mubburti. Zəga məs offo adawɓap əzla pak na, kəyopnəngən eret iŋkile na mahenziŋ;

²⁴ Kəskoɓingin lukutɗe nokum aka pay mohoko'ən, asna wakəssoŋ məbburkum; səɓɓan na, kəddoŋgən a dibirgidiki.»

Uɗak na ərəh na ma wəgaya

²⁵ Yawe aɓsən Moyis na:

²⁶ «Isi gəm məsdələv Ele'azar, sap də əbbah net ɗiy gugriɗ na mahəlfa na, məŋɗan zəga an mərəh səma wəgay bayman, ɗəf titire dit zəgeɗ memeyẽɗ pak məs mərma.

²⁷ Siske na, kuɗakangən pərasl sit ɗiy en dəlpaŋ də madembirgit ɗiy pakə.

²⁸ Kəgəmgən nzalaka səvet ɗiy en dəddoŋ ama wəlpa sən Yawe: də əgəm ɗəf titir taka səddəv səkat sle'i, vaska'e net zəgeɗ memeyẽɗi, va wasliɗe, korɗe, timeŋgiɗi, gəlewi.

²⁹ Aski kədawgəmaŋ səza wəɗak an haran neti, kəpsənəngən məsdələv Ele'azar ka nzalaka sən Yawe.

³⁰ Səza wəɗak an napsit mambirgit mə Israyelɗe na, kəgəmgən taka səddəv kaklaw sle'i, səret ɗiyi, wasliɗe, korɗe, timeŋgiɗ dit gəlewi gəm zəgeɗ memeyẽɗ meɓɓeti; kipsitigin mə leviɗe məɗɗaŋ wəza a təki nassa na Yawe.»

³¹ May Moyis də məsdələv Ele'azar aɗɗannək va Yawe aɗi wən nan sən Moyisi.

³² An məmõh səma wəgay, məs dəmbər sə dərɓaga məzəlpaŋ agəmən haran net na, agəɗək: gəlew dit timeŋgiɗ 675 000,

³³ wasli 72 000,

³⁴ gəm korɗe 61 000;

³⁵ dəwəlsən ɗəf titire, va gil məs dəsənaŋ ɗəf mizilin ɓa na, aɗɗaŋgək pak 32 000.

³⁶ Wəɗak məs məpsit ɗiy en dəddoŋ ama wəlpa na, agəɗək: gəlew dit timeŋgiɗ 337 500;

³⁷ nzalaka na Yawe an məgəm səddivit gəlew dit timeŋgiɗ agəɗək: 675,

³⁸ wasliɗe 36 000 məgəm səret 72 ka nzalaka sən Yawe;

³⁹ korɗe 30 500, məgəm 61 ka nzalaka sən Yawe;

⁴⁰ ɗəf titir 16 000 məgəm 32 ka nzalaka na Yawe.

⁴¹ Yaŋ Moyis agəm nzalaka an məgəm sən Yawe, apsən məsdələv Ele'azar va Yawe aɗi sən wən nani.

⁴² Dəwəlsən wəɗak an mipsit medembirgit mə Israyelɗe, məs Moyis andə səvet ɗiy en dəddoŋ ama wəlpa na,

⁴³ wəɗak məpsit ɗiy vanəs agəɗək gəlew dit timeŋgiɗ 337 500,

⁴⁴ wasliɗe 36 000,

⁴⁵ korɗe 30 500

⁴⁶ gəm ɗəf titir 16 000.

⁴⁷ Moyis agəm səran net mə Israyelɗe takataka səddivit ɗiy kaklaw sle' sle'i, vaska'e səddivit gəlew dit timeŋgiɗi, apsit mə leviɗe məɗɗaŋ wəza a təki nassa na Yawe va Yawe aɗi sən wən nani.

Əvəl də makra sən Maŋgəlva

⁴⁸ Yaŋ ɗiy en dədawgənən dula ama wəlpa va deyeɗe net məzəlpaŋ gabal gəm deyeɗe net məzəlpaŋ səkat azzoŋ aza Moyisi,

⁴⁹ aɓsənən Moyis na: «Məŋɗetik məzəlpaŋ məs dəssoŋ ammba vamə, ɗəf taka tay dəzə səret ɓa.

⁵⁰ Vasna mənam tat əki əvəl nam sən Yawe kaɗɗa matuya navvuyon mambray səka zəknam aba Yawe dit zəgeɗ na meleŋge va: mipa'aɗe, ndemeɗi, metendeŋɗe naza sləma ɗəfa gəm everzleɗ məbaya məs takataka nam pak arahə.»

⁵¹ May Moyis də məsdələv Ele'azar atafənək meleŋge vanəs səveti, zəgeɗ məzeɓit dəzaɓəŋgə kaka'ə.

⁵² Ŋzalaka na meleŋge məs agəmaŋ sən Yawe agəɗək kilo 170, məs deyeɗe net məzəlpaŋ gabal dit deyeɗe net məzəlpaŋ səkat apsənni.

⁵³ Məzəlpaŋ en sawã na, net zəga məs amõhoŋ pak asanək ka neti.

⁵⁴ May Moyis də məsdələv Ele'azar atafənək meleŋge an səvet deyeɗe net məzəlpaŋ gabal gəm səvet deyeɗe net məzəlpaŋ səkatə; akanən addəv gizlirke nalma də Maŋgəlva vi dəsangən ka zəga naɗɗumet mə Israyelɗe aba Yawe.