Əŋɗa 3 - Bible en Guidar

Wəza na mahəlfa na Levi

¹ Kirtit may Aron də Moyis aka pay Yawe apel sən Moyis aggərəm na Sinay yeŋki:

² Iya net kirtin Aron mezeŋgleket yaŋka: Nadab tiz nani, Abihu, Ele'azar gəm Itamar.

³ Aŋki iya net kirtin Aron, məsdəlveŋge məwelit də əppay sit mẽl na mahenziŋ, meɗiyit aka wəza na məsdəlva.

⁴ Nadab də Abihu amtaŋgək aba Yawe vi akiyaŋ offo na gizbe abani. Amtaŋgək a kapta-muyã na Sinay məza gasan uwa ɓa. May Ele'azar də Itamar dəɗɗanən wəza na məsdələv dara Aron efiti.

⁵ Yawe apel sən Moyis na:

⁶ Anah sən mahəlfa na Levi dəzar aŋka, appet ammba va məsdələv Aron. Mə leviɗe dəbbahaŋ sənəngəni.

⁷ Dəɗɗaŋ sənəngən wəza gəm sit ɗiy pak aba gizlirke nalma də Maŋgəlva, vi kawdawgən wəza a təki nassa.

⁸ Dəzgaŋgən sləma aket zəgeɗ na gizlirke nalma də Maŋgəlva pakə gəm dəɗɗaŋgən wəza a gəlet mə Israyel vi kawdawgən wəza na təki nassa.

⁹ Vasna, epsin mə leviɗe sən Aron dit kirtini; əpsa kədepsin kpak aka iya net mə Israyelɗe.

¹⁰ Kəɗiyəgən Aron dit kirtin aka wəza neti, vi dəɗɗanəngən wəza na məsdəlva; ɗəf ɗar an dədder aza wəza van na, kawbayni zamə.

¹¹ Yawe apel sənək Moyis amna:

¹² «Naw in tat əgəm mə leviɗe səret mə Israyel a gəlet tiziɗe beymeti, a gəlet mə Israyel məwet na uwa maddaabəŋ pakə. Mə leviɗe na, nawəŋgə.

¹³ Tizi pak nawiyi: vi aka pay nəbey tiziɗe naka dələv na Eziptə beymet na, nəwelik tiziɗe na Israyel pak ka nawa, na ɗəf titire dit en na zəga mamayã pakə: net nawəŋgə. Intə Yawe.»

Əver maddaabəŋ na mahəlfa na Levi

¹⁴ Yawe aɓsən Moyis a kapta-muyã na Sinay na:

¹⁵ «Aver zev Levi, aza məlma neti gəm aza mahəlfa neti; kəverigin mə leviɗe mezeŋgleket təŋ də təla taka ədda abe səza məweti.»

¹⁶ Moyis nak averik dəka əpel na Yawe, va arəh əpel na ənziya məɗi səni.

¹⁷ Eŋkiŋ kirtin Levi də iya neti: Gerson, Kehat gəm Merari.

¹⁸ Iya net kirtin Gerson yaŋ aza mahəlfa neti: Libni də Simey.

¹⁹ Kirtin Kehat aza mahəlfa neti: Amram, Yisehar, Hebron gəm Uzziyel.

²⁰ Kirtin Merari aza mahəlfa neti: Mahli gəm Musi. Eskiŋgə mahəlfa net mə leviɗe aza məlma na ziti.

²¹ Zev Gerson: mahəlfa net Libniɗe də mahəlfa net Simeyɗe; eskiŋgə mahəlfa net Gersonɗe.

²² Gala məver na, zel neti gəm kirin mezeŋgleket məs dəɗɗaŋ təla əmbat abe tahəŋ 7 500.

²³ Mahəlfa net mə Gersonɗe ateheŋgək dərɓaga gəla salala, dəmmba pay na moskoyo.

²⁴ Məlĩ net mə Gersonɗe na, Eliyasaf wətən La'el.

²⁵ Hara wəza naza gizlirke nalma də Maŋgəlva an dəwəlsit mə Gersonɗe yaŋka: Gədəvən də gəɓa baŋgla nani. Biyən nani, gabaga an məherin a metive nani,

²⁶ may gabaga məs sulək ki təki nassa də təki nawtaw wəla zəga, helegeɗ en məkkiyak gizlirke vani. Ndəɗaŋ dədazlgaŋ sləma aket zəgeɗiski.

²⁷ Kehat ndəni dihit mə Kehatɗe, məs duɗakaŋ zeŋvit poɗo: an net mə Amramiɗe, mə Yiseharɗe, mə Hebronɗe gəm mə Uzziyelɗe.

²⁸ Pakgit aɗɗaŋgək zel 8 300 sap dit kirin mezeŋgleket məs təla taka əmbat abe. Wəza net na, əzlga sləma aket zəgeɗ na mahenziŋ.

²⁹ Mahəlfa net mə kehatɗe aziyənək gəla də dohoŋ na gəla.

³⁰ Elisafan wətən Uzziyel dəsan məlĩ naka zeŋvit Kehatɗe.

³¹ Avet mə Kehatɗe məppan akoti salala, may tabəl, may zəga nawɗi lalamɗe, may təki nawtaw wəlet zəgeɗi, may zəgeɗ naslən addəv gəla salala, may gabaga nawher addəv gəla vani. Wəza an dəwəlsit zəgeɗis pak avet məppan siti.

³² Ele'azar wətən Aron məsdəlvi yi daya net mə Leviɗe; ndən dədawga wəza an ɗiy adaɗɗaŋ a təki salala.

³³ Merari tam, ndəni dəhit mə Merariɗe, awɗakaŋgək gebbet sula. Gebbet mə Mahliɗe gəm gebbet mə Musiɗe.

³⁴ Gala məver na, əŋɗa net tay 6 200 net zel sap dit kirin memeɗeŋɗe na təla taka əmbat abe.

³⁵ Məlĩ na mahəlfa na Merari na ndəni Suriyel wətən Abihayil. Aziyənək gəla də disiŋ na gəla salala.

³⁶ Wəza net mə Merariɗe na, ndəni wən net marzeɗ na gəla vani, may en nawpak dəpakə, may dədəkeɗi də gebbet ɓəɓirzlike, gəm zəgeɗ mbirit temtem na wəza vani. Ndəɗaŋgə nazlga sləma aka əzeɓet zəgeɗis pakə.

³⁷ Ndəɗaŋ dədazlgaŋ sləma'e aket dədəkeɗi, may gebbet an nampa afuŋgu, məs dəssoŋ ki gəla tərwəslə, gəm təbzeŋge nakkpa' afuŋ dit helegeɗi.

³⁸ May Moyis gəm Aron dit kirtin assoŋguk aba gizlirke nalma də Maŋgəlva, dəmmba pay nampum. Məpsiti wəza naddəv gəla salala a gəlet mə Israyelɗe. An ɗəf aɗɗumək əɗɗa wəza van dəka tay məsdələv ɓa na, ɗəf vanəs nawbayi.

³⁹ Əŋɗa net mə leviɗe beymet, zeli dit kirin mezeŋgleket təŋ səza təla taka əmbat abe agəɗək 22 000. Yawe dəɗi wən nan sit may Moyis də Aron dəverningən aza mahəlfa neti.

Əbit net tiziɗe

⁴⁰ Yawe aɓsən Moyis na: «Aŋɗet tiziɗe net mə Israyelɗe beymeti, aver iya net taka taka, asapan əŋɗa net də iya net təŋ səzet en dəɗɗaŋ təla taka.

⁴¹ Siske na, kəzeɓet sugən mə leviɗe zaɓ a gəlet tiziɗe net mə Israyelɗe dəssoŋgən ka naw in Yawe; vaska'e kədawzeɓet suw zəgeɗ memeyẽɗ net mə leviɗe a gəla uwa na məlviya net zəgeɗ memeyẽɗ net mə Israyelɗe beymeti.»

⁴² Moyis aŋɗetik tiziɗe net mə Israyelɗe beymet va Yawe aɗi sən wən nani,

⁴³ sap net tiziɗe en məver iya net təŋ səza təla taka əmbat abe aɗɗaŋgək 22 273.

⁴⁴ Yawe apel sənək Moyis amna:

⁴⁵ «Ande mə leviɗe dəssoŋgən a gəlet tiziɗe net me Israyelɗe gəm zəgeɗ memeyẽɗ net mə leviɗe, a gəlet zəgeɗ memeyẽɗ na Israyel: Mə Leviɗe nawəŋgə. Intə Yawe.

⁴⁶ An dəwəl sən əbit tiziɗe 273 net mə Israyel dədayaŋ ki əŋɗa net mə leviɗeŋ na,

⁴⁷ Kətafgən koɓo sle' aka ɗəf taka pakə, kəslagən aza əzəm na koɓo naddəv gəla salala, koɓo taka pak ka kilo taka məwɗakan səkatə.

⁴⁸ Kəpsinigin koɓeɗ vet sən Aron dit kirtini, ka əbit tiziɗe en əŋɗa net al tolyõku.»

⁴⁹ Moyis kan akkelet koɓeɗ nawbit tiziɗe en əŋɗa net al tolyõk daykiyit mə leviɗe neki.

⁵⁰ Arahək koɓo an dəslə də an naddəv gəla salala 1 365 aket tiziɗe net mə Israyelɗe.

⁵¹ Moyis apsinik koɓeɗ nawbit van sən Aron dit kirtini, aza va Yawe aɗi naɗɗa, vaski Yawe aɗi wən nan sən Moyisi.