Əŋɗa 28 - Bible en Guidar

Tive nawzaɓ-Maŋgəlva An nawda pay pakə

¹ Yawe apel sənək Moyisi, amna:

² Aprəman sit mə Israyelɗe: kənah sitgən dəzgaŋgən sləma aka əkisu hara əvəl an dəwəl su də pay məs məɗiyən, ndəni way nawzəm naw məzlan məs məŋgənən adannek zuwa.

³ Kənahsitgən na: Way an kədapsənən Yawe yaŋka: pay pak kirtit timeŋgiɗ mezeŋgleket sula na wəzva takataka məza heslepe azet ɓa, ammba əvəl nawzla kurmbuɗuk məs gabban appa ɓa.

⁴ Wət time mizilin taka kəfotgən də pummo, wət time mizilin an masulani kəfotgən də pay piriŋpiriŋgi,

⁵ gəm əvəl də gəpa kilo hoku məllaɓən də mẽl an salala litər taka də wəɗak nani.

⁶ Ndəni əvəl nawzla kurmbuɗuk an ɗayɗayə, va mədan aggərəm na Sinay məŋgənən affeteŋ makrani, way məhhətən sən Yawe yi.

⁷ Mbazla nawpesl nan ammba wət time mizilin an də mompumo na, litər taka də wəɗak nani. Ndəni mbazla nawpesl tatrãh napsən Yawe a təki nawzaɓ-Maŋgəlva.

⁸ Wət time mizilin masulani, kəfotgən də pay piriŋpiriŋgi kapsən sap də əvəl an də zəga na mabardaw də mompumo, mbazla nawpesl nan ammbani, kəɗɗaŋgən anan ka way məhhətən məs məŋgənən nek naffeten makra Yawe.

An nawda ammba pay naffete

⁹ Pay naffet na, kəziyaŋgən mbel dit kirit timeŋgiɗ mezeŋgleket sula na wəzva takataka, məza heslepe azet ɓa gəm əvəl də gəpa kilo sləre məllaɓən də mẽlẽ gəm əvəl an məŋgla nawpesl afuŋ.

¹⁰ Ndəni əvəl nawzla kurmbuɗuk məs aza pay naffet pak na, ndən əddan əsap də əvəl nawzla kurmbuɗuk an ɗayɗay də əpesl ambanəŋka.

An nawda də ətəŋ na təlaper

¹¹ Ətəŋ na təla ama gərəm pak na, kədaŋgən əvəl nawzla kurmbuɗuk sən Yawe, dit medgeɗgeɗe sula, ndargayã taka, gəm ndergeyẽɗ na wəzva takataka buhulu, zəgeɗ net dəssoŋ məza heslepe azet ɓa.

¹² Medgeɗge taka pak dəsangən də əvəl də gəpa kilo vaytak məllaɓən də mẽlẽ; na ndargayã na, əvəl də gəpa kilo sləre məllaɓən də mẽlẽ;

¹³ nat ndargayãk taka pak na, əvəl də gəpa kilo hoku məllaɓən də mẽlẽ. Əvəl nawzla kurmbuɗuk məs məŋgənən adanneki yi, way məzlan sən Yawe yi.

¹⁴ An məŋgla nawpesl afuŋ na ndən yaŋka: aza medgeɗge pak mbazla litər hoku, litər sula ammba ndargayã, litər taka də wəɗak nan ambat ndargayãk taka pakə. Aski əvəl nawzla kurmbuɗuk ammba ətəŋ na təlaper, məs naɗɗa də ətəŋ na təla ama gərəm addəv wəzva pakə.

¹⁵ Gəm əmpa kətawgən wəla porsok sən Yawe nawəzaɓ-Maŋgəlva ammba mambraya; kapsən dəsapgən aza əvəl nawzla kurmbuɗuk ɗayɗay də mbazla nawpesl ammbani.

An nawda ammba wəzləra na Pakə

¹⁶ Aka təla maddaabəŋ də əvoŋ makəlaw kiyən poɗo nan na, wəzləra na Pak iyi nawgagdakan Yawe.

¹⁷ Pay makəlaw kiyən sle'en na təla van na, pay na wəzləra yi: addəv pay buhul na, peŋ məza wuɗo ɓa kədawzəmaŋgə.

¹⁸ Əvoŋ maddaabəŋ na, kəyaŋgən əkkal salala, wəza tay kədaɗɗaŋ dəpas ɓa.

¹⁹ Kəpsənəngən way nawzəm an məzlan kurmbuɗuk sən Yawe: medgeɗgeɗe sula, ndargayã taka, ndergeyẽɗ na wəzva takataka buhul, kərmaŋgən zəgeɗ məza heslepe azet ɓa;

²⁰ medgeɗge taka pak dəsangən də əvəl də zəga na mabardaw gəpa kukuɗ kilo vaytak məllaɓən də mẽlẽ; na ndargayã na, gəpa kukuɗ kilo sləre.

²¹ Ambat ndargayãk takataka va assoŋ buhul pak, kawkayi kilo hoku hoku.

²² Gəm əmpa porsok nawzaɓ-Maŋgəlva na mambraya, kaɗɗa mahenziŋ navvuyon mambray ambokum.

²³ Məs kədaɗɗaŋgəs pak dəsapgən aza əvəl nawzla kurmbuɗuk də mompumo, ndəni əvəl nawzla kurmbuɗuk ɗayɗay.

²⁴ Vas kədaɗɗaŋ pay buhul aka əpsən way məzlan va peŋ məs əŋgənən adanneken zə Yawe; kəpsənəngən sap də əvəl nawzla kurmbuɗuk an ɗayɗay də mbazla nawpesl ammbani.

²⁵ Pay mabuhulon na, kəyaŋgən əkkal na mahenziŋ; wəza tay kədaɗɗaŋ dəpas ɓa.

An nawda ammba wəzləra na Paŋtekot

²⁶ «Pay dadabiya agapə, an kawkanən zəga dəsəɓ maddaabəŋ ka əvəl sən Yawe dəndən na, kəɗɗaŋgən əkkal na mahenziŋ, wəza tay kədaɗɗaŋ dəpas ɓa.

²⁷ Kədaŋgən əvəl nawzla kurmbuɗuk məs məŋgənən nenek sən Yawe dit medgeɗgeɗe sula, ndargayã taka, gəm ndergeyẽɗ na wezva takataka buhulu.

²⁸ Medgeɗge taka pak dəsangən də əvəl də gəpa kilo vaytak məllaɓən də mẽlẽ; na ndargayã na, əvəl də gəpa kilo sləre məllaɓən də mẽlẽ,

²⁹ kilo hoku tam ambat ndargayãk taka va assoŋ buhul gərakə.

³⁰ Kətawaŋgən wəla porsoku'e, vi kaɗɗa sukum mahenziŋ navvuyon mambraya.

³¹ Sap aza əvəl nawzla kurmbuɗuk məs naɗɗa ɗayɗay də əvəl də zəga na mabardaw ammban naka. Kəzaɓəŋgən-Maŋgəlva dit zəgeɗ memeyẽɗ məza heslepe azet ɓa də mbazla nawpesl ammbani.»