Əŋɗa 27 - Bible en Guidar

Va gil adawzəmaŋ gəla

¹ Yaŋ kirin muguluŋgit azzoŋgu, anet kirtin selofehad wətən Hefer, Hefer wətən Galad, Galad wətən Makir, Makir wətən Manase; səddəv məlma maɓɓan na Manase wətən Yosef əŋgə. Iya net na: Mahla, Nowa, Hogla, Milka gəm Tirsa.

² Arbanənək ki zit aba Moyis, aba məsdələv Ele'azar, abet ɗiy gugriɗe gəm əsap net ɗiy pak a metive na gizlirke nalma də Maŋgəlva.

³ Aɓɗaŋ na: «Afəm amtək a kapta-muyã; dəsan eret ɗiy naddəv vanday məs dətemeŋ aka Yawe ɓa, addəv vanday na Kore ɓa; vi mbərayən nani kaka' amtə. Ya wətən tay mizilin ɓa.

⁴ Vasna iya na afəm dəzə səddəv mahəlfa nan vi dərah wətən mizilin ɓa sa? Apsəm təki səm anam va net madiyeŋgiɗmə.»

⁵ Moyis mah əka wən nan aba Yawe.

⁶ Yaŋ Yawe aɓsən Moyis na:

⁷ «Wəpel net kirtin Selofehad təsiyi; kəpsitigən təki nawzəmgəla va net mediyeŋgiɗti, kəgorgən sitigən zəga nawzəmgəla na afiti.

⁸ Kənahsitgin mə Israyelɗe na: “Pay ɗəf amtə məza əppa wətən mizilin ɓa na, kəgorgənəngən zəga nawzəmgəla nan sət wətəni.

⁹ An tay dət wətən ɓa na, kəpsitingin zəga nawzəmgəla nan sit milmiŋgiɗin mezeŋgleketi.

¹⁰ An milmiŋgiɗin tahəŋ ɓa, kəpsitingin mediyeŋgiɗni.

¹¹ An afən tay dit milmiŋgiɗin ɓa, kəpsəngən məlma na gugo məs dəsan addəv mahəlfa nani: ɗəfəska, ndəni nawzəmgəla aza zəga vani.” Dəsangən azet mə Israyelɗe va mahenziŋ nawziwgin ənziya, məs dəslə də an Yawe aɗi wən nan sən Moyisi.»

Tay əwelnən Yosuwa dəsangən a gəla Moyisi

¹² Yawe aɓsən Moyis na: «Apeŋ a dadwar ki mossorgo neret en na Abarim əŋka, awla dələv məs nədapsit mə Israyelɗe.

¹³ Kulagəni, siske na kawgəmkuy nok van tamə, vi kəzbetgin ɗiy nok va na məlmuk Aron.

¹⁴ Asan vasna, vi a kapta-muyã na Sin, gala əsap net ɗiy akayanən mawã, kəprəmənən maw aka nədawnah sukum kərbanəngən gagdak naw dawɓih iŋkile a maheret ɓa.» As aka wən net iŋkile na Meriba na Kedes a kapta-muyã na Sin adawpele.

¹⁵ Moyis apel sənək Yawe amna:

¹⁶ «Yawe, Maŋgəlva, afən əmpəs na zəga məzəməɗən pak, awel ɗəf nawsan abet ɗiyi,

¹⁷ ɗəf nawgilyen nazzan abeti, nawgilgiti, nawmilgiti; vasna əsap net ɗiy na Yawe asan na va timeŋgiɗ məza məzutaɗa net ɓa ɓa.»

¹⁸ Yawe azlan sənək Moyis na: Agəm Yosuwa wətən Nun; ɗəf məs də əmpəs akani. Kəɗigən vok akani,

¹⁹ Kəziwgingən aba məsdələv Ele'azar gəm əsap net ɗiy pakə, kəɗigən aka wəza a mahereti.

²⁰ Kəpsəngən gagdak səzan noko, vi mə Israyelɗe pak dəɓe'eŋ sənəngəni.

²¹ Dəziwgən aba məsdələv Ele'azar, nan van dəssõhongən wən nan aba Yawe də zəga adawyaŋ Urim. Səza an dədarbaski kan adawgulyoŋ, adawmbataŋ eŋgili, ndən dit mə Israyelɗe: Əsap net beymeti.

²² Moyis aɗɗak va Yawe aɗi sən wən nani; agəm Yosuwa, aziwgin aba məsdələv Ele'azar gəm aba əsap net ɗiy pakə.

²³ Aɗi van sulagən akani, aɗi aka wəza nan va Yawe apel wən nan də ma Moyisi.