Əŋɗa 25 - Bible en Guidar

Mə Israyelɗe tay əppanən zit sən maŋgəlva an ɗarə

¹ Mə Israyelɗe aziyənək gəla a Sitim, yaŋ ɗiy atəŋgaŋ əɗɗa polkoyo dit gil na Mo'ab.

² Gil vet ayenin ɗiy aka əzaɓ-Maŋgəlva sit meŋgilveɗ neti; ɗiy azəmaŋgə, agdukoŋ abet meŋgilveɗ net adaka.

³ Israyel kan kulo' ammba təl Ba'al na Pe'or, ndəni gədəv Yawe adə akani.

⁴ Yawe aɓsən Moyis na: «Arme ɗiy gugriɗe na weleŋgit ɗiy beymeti, alew aba Yawe heret sek aka paya; vi herɗe na Yawe dəffeteŋgən səka Israyel.»

⁵ Moyis aɓsit mətawaŋwən na Israyel na: «naway di pak sərokuməŋ, dəbey ɗiy nan məs dəguloŋ ammba təl Ba'al na Pe'or əŋki!»

⁶ Ya daka' na, mə Israyel mbərən tay əzzan dət mə Madiyankə, agap addekit milmiŋgiɗni; as pak a mahara Moyis gəm ŋgboŋ net kirtin Israyel beymeti, aka tay əhəmaŋ a metive na gizlirke nalma də Maŋgəlva əŋki.

⁷ Dəka ulan vas naka, yaŋ məsdələv Pinhas wətən Ele'azar wət Aron, hõs sə weleŋgit ɗiy də tulhõ ammba vani,

⁸ azban mə Israyel a tuzoŋ, amboket sulegit pakə, mə Israyel dət guluk vat, a tuzoŋ naka. Yaŋ ləŋ gəbay aɓət dawbey mə Israyelɗe.

⁹ Ɗiy en dəmtaŋ sən gəbay vanəs əŋɗa net agəɗek 24 000.

¹⁰ Yawe apel sənək Moyis amna:

¹¹ «Məsdələv Pinhas, wətən Ele'azar, wətən Aron, affetetik herɗe naw səket kirtin Israyel, adan arban kotorok a gəlaw aweleŋtiŋka. Vini, də herɗe aɗɗuwən pak na, nəzet kirtin Israyel ɓaŋka.

¹² Ya kakaŋka, anah na: in yaŋkəŋ əɗɗi wənmiyna naw nassa zay dəndəni.

¹³ Wənmiyna van wasan vini gəm viyit kirtin naddəvən. Wapsit mahenziŋ na wəza net məsdəlveŋge ammba vet faɗə, adan arban kotorok ammba Maŋgəlva nani, aɗɗa mahenziŋ naskoɓ mambray embet kirtin Israyeləŋka.»

¹⁴ Mə Israyel məs məbayən, an məbayən dət mə Madiyan kəŋka, iya nan na Zimri, wətən Salu, ɗəf metiŋgini addəv mahəlfa na Simeyon.

¹⁵ Guluk mə Madiyanək akən məbaya, iya nat na Kozbi, wətən Sur, nan van daya na mahəlfayi, mahəlfa sə Madiyan.

¹⁶ Yaŋ Yawe apel sən Moyisi, amna:

¹⁷ «Məwak sit mə Madiyanɗe, mərbə siti.

¹⁸ Vi akayanənək mokum də kuket məs aɗɗaŋ abokum də wən na Pe'or gəm wən nat Kozbi, wətən daya na Madiyan, milmit akən məbayət pay na gəbay məs dəgəɗ aka wən na Pe'or nakə.»

Əmsa əver mahəlfa na Israyel təl masula'ən

¹⁹ Dərɓaga gəbayəs na,