Əŋɗa 24 - Bible en Guidar

¹ Balam awlak na, Yawe man aka əprikgin əzaɓ aka Israyel; dəmbat ula helig va an dətoŋ ɓa, ndən pərvək əkkpaŋ haran sek də kapta-muyã.

² Balam legən haran na, awla Israyel atehik mahəlfa ka zəni. Əmpəs na Maŋgəlva pay akani,

³ yaŋ adawpel əpel nalva nani, amna: Əɗiyma na Balam wətən Be'or, əɗiyma na məwəl heligi,

⁴ əɗiyma na məzəprəm ma Maŋgəlva, məzula an Məzuɓappak adarbəsəni, an tay əppu' na, haran əkolo.

⁵ Gizlirkeɗe nok lelew aɓɗaŋɓa Yakob, gəm təki nassa noko Israyel!

⁶ Tahəŋ əzlalbayaŋ va məŋkparaɗe; məstaka də guli net wəleŋɗe ama məlpa metiŋ; va tigbire məs Yawe ampə, va muguguleɗ a met iŋkile.

⁷ Iŋkile tahəŋ əpislkiweŋ səmet gagiyeɗ nan sulegiti, tay əzlga a təki məs dəbə iŋkile diyɗa. Sləma məlĩ nan wasan day ki na Agag, məlĩ nan wazəm tiki əmbata.

⁸ Maŋgəlva agilginək sə Eziptə; tay də gbogboŋ na təgənə. Tay ərɓizliw meseŋgiɗni, tay əŋzliw sleŋsleŋɗe neti, tay uhẽt dit herɗe nani.

⁹ Tay əsan pipiɗikke, tay əvoŋ va ɓoolu, kəsənək ɓoolu məgolun; naway nokrok sən əsilgin di? Əzaɓ dəsan aka ɗəf nawzoɓoko, mefɗeke dəssoŋ aka ɗəf nawrayguko.

¹⁰ Gədəv Balak adək aka Balam; ndən van pu', yaŋ aɓsən na: «Nəyuk na kəreygit suwəgin meseŋgiɗwi, ya yaŋ na, təl mohoko'ən kədawprikgin əzaɓ aketi!

¹¹ Adan vaski na, go' arma tive dok anokda! Nənahək nawgagdokok kəta; ya yaŋ na, Yawe atakkuk dawrəh gagdak vani.»

Balam tay əpel aka gagdak na Israyel nabe

¹² Balam aɓsən Balak na: «Nənah wat sit metiveɗ məs kəslən su na:

¹³ “Kəta Balak dəpsiw təbəz babar gərak də meleŋge gərak siŋgil ananda na, wanəɓap əggar ki an Yawe aɗi wən nan kaɗɗa zəga moggoni awaniɓa zəga mbərayən dəvaw ɓa, məs Yawe adawpel nədawpele ɓa sa?”

¹⁴ An vaski, gəgaŋ na wanəmbat ezet ɗiy nawa; ya ade, nənah suk dafsən an ɗiyiŋ adaɗɗaŋ sitin ɗiy nok pay an nazzan abe.»

¹⁵ Yaŋ adawpel əpel nalva nani, amna: «Əɗiyma na Balam wətən Be'or, əɗiyma na məwəl heligi,

¹⁶ əɗiyma na məzəprəm ma Maŋgəlva, məs dəsən məɗama na Məsəɗəɗə məzula an Məzuɓappak adarbəsəni, an tay əppu' na, haran əkolo.

¹⁷ In tat ulani, ya naɗɗa gəgaŋki ɓa hara; in tat əsəŋgləkani, məza azan go'o ɓa: ŋgərzla agilik səza Yakob, zleŋge na məlĩ arɗiyək sə Israyel, ndən dəŋgrof kolmboŋ Mo'ab, azetik kirtin Set beymeti.

¹⁸ Waska wəla dələv na Edom; gəm dələv na Se'ir, meseŋgiɗni, Israyel tay ərban gbogboŋ nani.

¹⁹ Məskəwəla arɗiyək səza Yakob; tay əzan ɗəf dəmbər madaran sə walaŋgəla.»

Balam tay əpel aka əza net meseŋgiɗ Israyel

²⁰ Balam awla Amalek əmpa, yaŋ adawpel əpel nalva nan vaŋka: «Amelek adayək kiyit mahəlfaɗe pak də gbogboŋgo! Ya ənziya nan nabe na, əray yi.»

²¹ Siske na, awle mə Kenɗe, yas adawpel əpel nalva nan vaŋka: «Təki nassa nok gboloŋ gboloŋgiyi, va gəla na bəŋga məɗiyən aka milɓe.

²² Də as pak Kayən wasan zəga nawzəm na offo, aza əbay kiyən na, Asiri wakkpaŋgok balam.»

²³ Əgrak nan na, apel əpel nalva nan vaŋka: «Aw əraya! Naway nawkõh səba an Maŋgəlva aziwgin di?

²⁴ Bəlayɗe yeŋ sə Kitim. Wazəmgənən sahã na Asiri, wazəmgənən sahã na Eber; net van zlaŋ əza adoddoŋgu.»

²⁵ Balam le' buryok ananda; Balak tam tive tawə.