Əŋɗa 23 - Bible en Guidar1 Balam aɓsən Balak na: «Arkə su təki nawzaɓ-Maŋgəlva aŋ buhul, akay su medgeɗgeɗe buhul gəm ndergeyẽɗ buhul ahəŋ vanəŋka.» 2 Balak aɗɗak va Balam anahə; aka matuya takataka pakə, ndəɗaŋ sulegit pak azaɓaŋgək-Maŋgəlva də medgeɗge taka gəm ndargayã taka. 3 Balam aɓsən Balak na: «Aziw a maŋgava əvəl nawzla kurmbuɗuk noko, naw wanəzar faraɗa. Kuzuŋ Yawe wade ələm suwa; əpel an adaprəman suwa, va asan pak wanəman suko.» Ndən mbat akat mossorguk məkkãhta. 4 Maŋgəlva pay ələmsən Balam, Balam aɓsən na: «Nərkək matuyaɗe buhul, mətawi wəla medgeɗge gəm ndargayã amet takataka pakə.» 5 Yaŋ kan Yawe agul əpel ammba hərzlum Balam, aɓsən na: «Amil aza Balak, kəpelgən vaska.» 6 Ndən həmndak aza Balak, arəh ziwwe a maŋgava əvəl nawzla kurmbuɗuku gəm ɗiy gugriɗ na Mo'ab. 7 Yaŋ Balam apel əpel na kəleŋ nan vaŋka: «Balak akiwək sə Aram; səket mossorgoɗe nammba pay nampum məlĩ na Mo'ab ayuwa: “Ade! Agəɗ su mefɗeke aka Yakob! Ade! Ədda suw ma Israyel!” 8 Mbarmbar nədaraygən ɗəf məs Maŋgəlva dəraygən ɓa di? Mbarmbar nədawda ma ɗəf məs Yawe dəda man ɓa di? 9 Nəsawək a dadwar kiyit milɓeɗ uleti, Nəsəŋgləketik nəsaw aket mossorgoɗe; ɗiy net ənziya net tay temme, awsapaŋ azet ɗiy meɓɓet ɓa. 10 Naway nawɓap əŋɗan burɗuk na Yakob may kuɗiskuɗis na Israyel di? Kəta naw van nəmtə əmta net ɗiy təstəsə, kəta əgrak naw dəsan va nani!» 11 Balak aɓsən Balam na: «Mi kəgəɗ suwəŋ di? Nəkiyuk na kawreygit messeŋgiɗwi, ya yaŋ kəɗɗa əzaɓ aketi.» 12 Balama azlanka: «An nawpel na, nədawɗi kiyu aka an Yawe adawgulsu ammba hurzlumuw ɓa sa?» Əzaɓ məs Balam azəɓet masula'ən 13 Balak amsakək əpele, amna: «Kamə ade dam a təki mbərən kulegin sədaka, mbərawwa kədawla səzeti, kawlet gərak ɓa, kəraygit sugən sədaka!» 14 Akak aka təki nawga a dadwar ki Pisga, arkə matuya buhul, aka matuya takataka pakə, azaɓ-Maŋgəlva də medgeɗge taka gəm ndargayã taka. 15 Balam aɓsən Balak na: «Aziw aŋ a maŋgava əvəl nawzla kurmbuɗuk noko, naw tam ndaw əgan ada'ə.» 16 Yawe pay ərəh Balam yaŋ agul sən əpel ammba hərzlumən, aɓsən na: «Amil aza Balak, kəpelgən vaska.» 17 Balam mile aza Balak, arəh ziwwe dit ɗiy gugriɗ na Mo'ab a maŋgava əvəl nawzla kurmbuɗuk nani. Balak assohõni amna: «Mi Yawe anah di?» 18 Yaŋ kan Balam apel əpel na kəleŋ nan vaŋka «Asili Balak, aprəma, apak sləmok ammba əpel nawa wətən Sippor! 19 Maŋgəlva ɗəfi ka ndən kawa wən ɓa, wətən Adam ka ndən kakkpaŋgan man ɓa, waynə wən məza əziw akan ɓa sa? Wapel məza kaɗɗan ɓa sa? 20 Naw nətafək əprikgin əzaɓa, vi aprikginik əzaɓa; nəmsak na əkkpaŋgan ɓa. 21 Mambray tay awəl aza Yakob ɓa, dəwəl heslepe a Israyel ɓa. Yawe, Maŋgəlva nan tay dəndəni; əɗɗəla tay əprəm ananda va ana məlĩ da. 22 Maŋgəlva agilginik sə Eziptə; tay də gbogboŋ na təgənə. 23 Garzlaw watər ammba Yakob ɓa, may ula helig ammba Israyel ɓa: məs Maŋgəlva adaɗɗa na, də pay nan adawnah sənən Yakob may sən Israyel. 24 Ɗiy yeŋ məzusulyoŋ va ɓoolu məgolən, dədawziweŋ va ɓoolu mizilin. Awvoŋgoŋ tak dəmpərnən slu net məs armaŋ, may dəsenin mbel net zegeɗ məs abayaŋ ɓa ɓa.» 25 Balak aɓsən Balam na: «An kəraygit na ɓa, asna kədawzeɓet ɓa!» 26 Balam azlansən Balak, amna: «Nənah suk na: “An Yawe anah su nədaɗɗa gərakə ɓa sa?”» Əzaɓ məs Balam azeɓet mohokoni 27 Balak aɓsən Balam na: «Kamə ade! Nəkuk a təki mbərni; kuzuŋ sədak na Maŋgəlva wataf kəraygit sugini.» 28 Balak kan mah əka Balam a dadwar ki mossorgo na Pe'or məs dədawla sə ma hara kapta-muyã! 29 Balam aɓsən Balak na: «Arkə su Təki nawzaɓ-Maŋgəlva aŋ buhulu, akay su medgeɗgeɗe buhul gəm ndergeyẽɗ buhul ahəŋ van tusso.» 30 Balak aɗɗak va Balam anahə; aka matuya takataka pakə, azaɓ-Maŋgəlva də medgeɗge taka gəm ndargayã taka. |
All right reserved
Bible Society of Cameroon