Əŋɗa 22 - Bible en GuidarIsrayel aka muyã na Mo'ab ( 22:1—36:13 ) Balak tay əya Balam 1 Kirtin Israyel asilyoŋguk əmpa; ateheŋ a təki məpəlayya na Mo'ab, dəgar ki Yurden, dakadaka də Yeriko. 2 Balak wətən Sippor, awlak an Israyel agəɗ sit mə Amorɗe pakə. 3 Adan Mo'ab adawle ɗiy vetis zletete na, geslne armaka; səza Mo'ab awle kirtin Israyel na, akkerik sən geslne 4 yaŋ Mo'ab aɓsit ɗiy gugriɗ na Madiyan na: «Yaŋ na, dulaŋ waɓɓut zəga səkam tərwəsl va wasli adawzəm kevile amawtaɗa.» Balak wətən Sippor vani yi məlĩ na Mo'ab aka dəpaska. 5 Ndən slən maslənɗe aza Balam wətən Be'or a Petor, ama məlpa metiŋ, aka dələv an muwani, dəyagən də wənah sən na: «Mənam tat dit ɗiy aŋ yaŋ dəgulyoŋ sə Eziptə, aknəhənək təkiya: yeŋ də gəla a maharawa! 6 Ya kakaŋ na, kamə ade ɗa, araygit su ɗiyiŋki, vi guromɗeŋ day kiwa; kuzuŋ wanəɓap kan əska wəlet karɓehet səka dəlvəŋka. Vi nəsənka, ɗəf məs kəŋgəl sən əzaɓa wazaɓə, ɗəf məs kəraygəni, warayə.» 7 Ɗiy məsɓet na Mo'ab dit en na Madiyan, mbataŋ kan də zəga evet nawfaɗ sən məwəl helig vani. Səza agapaŋ ana Balam da na, aman sənənək əpel na Balak. 8 Balam aɓsit na: «Məvoŋ aŋka; wanəprəman sukum əzlan nan səza an Yawe adawnah suwa.» Ɗiy məsɓet na Mo'ab kan gurom ana Balam da. 9 Maŋgəlva pay aza Balam, aɓsən na: «Ɗiy mədəŋgaŋ anokdaŋ di?» 10 Balam aɓsən Maŋgəlva na: «Balak, wətən Sippor məlĩ na Mo'ab dəslən ənah su na: 11 ɗiy yeŋ dəgulyoŋ sə Eziptə dəknəhən təkiya. Ade ɗa areygit suwa; kuzuŋ wanəɓap kan əska wəlet karɓeheti.» 12 Maŋgəlva aɓsən Balam na: «Kədaddok dənɗaŋ ɓa, kədawraygit ɗiy vet ɓa, vi əzaɓ tay aketi.» 13 Də mompumo nan na, Balam le' isilyeni, aɓsit ɗiy məsɓet na Balak na: «Məmndoŋ aka dələv nokum, vi Yawe aɓoŋguk dappaw əmbat də mənokum.» 14 Ɗiy məsɓet na Mo'ab le' əsilyoŋ amndoŋ aza Balak; aɓsənən na: «Balam dəŋger əzzan də mənam ɓa.» 15 Yaŋ Balak aslən deyeɗe diyɗa məs də gagdak meɓɓet əmpa daykiyit en maddaabəŋ. 16 Agapaŋ aza Balam, aɓsənən na: «Əpel na Balak wətən Sippor yaŋka: Kamə, kəɓoŋ dazzok anawda ɓa! 17 Vi wanəpsuk gagdak diyɗa, wanəɗɗa an kənah su pakə. Ade kan areygit su ɗiyiŋ ɗa.» 18 Yaŋ Balam azlan sit ɗiy məsɓet na Balak nek na: «Ya kəta Balak dəpsu təbəz babara gəm meleŋge gərak səŋgil ananda na, zəga tay nədaɗɗa siɗikke awaniɓa diyɗa məs nazlzlaɓan an məs Yawe Maŋgəlva naw aɗi wən nan ɓa. 19 Mənokum vat pak məssoŋ aŋ dəfɗəŋka, dayawga an Yawe arah nawnah su əmpa.» 20 Maŋgəlva pay aza Balam dəfɗa, aɓsən na: «An ɗiyiŋ iyuk azzoŋ na, asili dok dənɗaŋ. Ya an nədawnah suk kaka' kədaɗɗa hara.» 21 Vit pummo pum na, Balam le'i, mazaŋga aka met koro nan kiyak kiyakə, ndən mbat dit ɗiy məsɓet na Mo'ab neki. Koruk na Balam 22 Ya gədəv Maŋgəlva adək dawlan dawmbata, maslay na Yawe aka tive ziw, vi kawtak man aka tay akat koruk nan əddan dit gewleɗ nan sulaŋka. 23 Koruk tulak maslay na Yawe ziwwe aka tive, dəndə masalam məptuwən avani; ndət mbəzlah səka tive əmbat də maksafə. Balam arbəsətək korku, vi kawmilgət aka tive. 24 Maslay na Yawe kan ziw aka tive kitikke, məzutoŋ dəddəv guli net megezlembirkeɗ kəla weleŋgit zleveɗe na dələv sula. 25 Koruk tulak maslay na Yawe: ndət zət bay aza zlava na dəlva. Adan təsər təl Balam aza zlava na dəlva, ndən təŋ ərbəsəta. 26 Maslay na Yawe kiyit toŋ əmpa, ambat əziw akki tive asan feŋge, məs təki tay namzləh dəka dəzəŋ may dəka zlaɓay ɓa. 27 Koruk tulak maslay na Yawe; ndət səmmba Balam ɗuf əvoŋgo, gədəv Balam fiyõ əda, argət də zleŋge. 28 Yawe apelgət korku, yaŋ təɓsən Balam na: «Mi nəgəɗ suk nargu təl hoku vaŋ di?» 29 Balam aɓsət koruk na: «Vi va mokrok aŋgəl kədaɗɗa də ina! Va masalam tay avaw na, kəta nəbaykuk ɓəlohu!» 30 Koruk təɓsən Balam na: «Koruk nok nənan ɓa sa, məs kədawpeŋ akat far hã pay dəpaŋ ɓa sa. Vas nəsərək əɗɗa də is sa?» Amna: «Awwo» 31 Yawe kan hara Balam kol əkol səni, dəwəl na, maslay na Yawe tay ziwwe aka tive, masalam ndororo məptuwən avan kãwwã; ndən ɓe', agduk hã mirbizin afuŋ. 32 Yas kan maslay na Yawe aɓsən na: «Vimi kərgət koruk nok təl hoku di? Kulaka, intə nəde ətak moko, vi in ulan na malaka van na taptapi. 33 Nat Koruk na, tuluwəka, təl hoku təmzlah suwa. Va təmzlah su ɓa na, kəta nəbaykuko, nat in kappat zayə.» 34 Balam aɓsən maslay na Yawe na: «Nəgəɗək mambraya, vi nəsən na istə kəziw abaw aka tive ɓa. Yaŋ na, an malaka van dəlsuk ɓa na, wanəmil dirɓe.» 35 Yas maslay na Yawe aɓsən na: «Dok dit ɗiyiski, ya əpel an məs nədawnahsuk kaka' kədawpel hara.» Balam kan mbat dit ɗiy gugriɗ naba Balak. Əlma Balam də Balak 36 Adan Balak aprəm na Balam tay əzzani na, Balak tek ələmsən a Ir-Mo'ab, aket meŋge en məɗiyit də Arnon dəsan a metteɓ ma dələv nani. 37 Balak aɓsən Balam na: «Nəslən ɗiy diyɗa iyuk ɓa sa? Vimi kəde ɓa di? Mbaraka nəgap gala nawgəɗ suk zəga tektek ɓa sa?» 38 Balam azlan sənək Balak na: «Ya nədek hã azok kana; yaŋkəŋ na, in tat də tive nawpel wən sən kiyu fẽt sa? Əpel məs Maŋgəlva agulsu amaw nədawpele.» 39 Balam mbat də Balak, agapaŋ a Kiriyat-Husot. 40 Yaŋ Balak azaɓ-Maŋgəlva də wasliya gəm time, aɓsit haran net may Balam dit ɗiy gugriɗ nabani. Balam tay əɗi əzaɓ aket ɗiy na Israyel 41 Vit pummo nan pum na, Balak mah əka Balam, apeŋgin aket gəleɗe-nettuyeŋge a Bamot-Ba'al, a təki məs nawɓap ule ɗiy mbəraw səzeti. |
All right reserved
Bible Society of Cameroon