Əŋɗa 21 - Bible en Guidar

Əska wəla net mə Israyelɗe aket mə Kana'anɗe

¹ Arad məlĩ net mə Kana'anɗe də gəla a Negev, aprəmək na Israyel tay əzzan dəka tive na Atarim; awakaŋ sənənək Israyel, armaŋgək ɗiy ka mə fərsəneɗ səreti.

² Yaŋ kan Israyel aynan man aba Yawe vaŋka: «An kətafək əpsiw ɗiyiŋ ammba vawa, wanəkkẽh walaŋgəleɗe gugriɗe neti.»

³ Yawe aprəmək wəla Israyel, apsinik mə Kana'anɗe ammba vani. Akkẽhike, ndəɗaŋ dit walaŋgəleɗe gugriɗ neti. Məpsəni iya na Horma sən təki vani.

Dohõɗe məs muwəna

⁴ Addoŋguk səba mossorgo na Hor dəka tive na pehe net vəlarɗe, əsuləkaŋ ki Edom, ya mekret ɗiy amtək aka tive.

⁵ Ɗiy təŋ əpeleŋ aka Maŋgəlva gəm aka Moyisi aɓɗaŋ na: «Kam kəkimən sə Eziptə di? Vi məmtəgən a kapta-muyãŋka! Vi zəga nawzəm tay aŋ ɓa, iŋkile ɓa, zəga nawzəm na sahãŋ akiyək mamə!»

⁶ Yaŋ kan Yawe aslin dohõɗe məs offo aket ɗiyi, abəletini. Ɗiy diyɗa amtaŋgək a Israyel.

⁷ Ɗiy azzoŋguk ərəh Moyis də ənah sən na: «Məgəɗək mambəray dawpel mbərayən aka Maŋgəlva may akokuŋka; akkaman Yawe vimə, dəzergitigən dohõɗe sə walaŋmə!» Moyis akkam viyit ɗiyi,

⁸ Yawe aɓsən Moyis na: «Azaɓ zev dohõ məs offo, aynan aza wəlaŋga a disiŋ: ɗəf an dohõ abəl pak an awlak na, wamtə ɓa.»

⁹ Moyis azaɓ dohõ na təbəz pepreŋge, aynan aza wəlaŋga a disiŋ. An dohõ abələk ɗəfa, ndən ula aza dohõ na təbəz pepreŋ naka, asna amta ɓa.

Gəla əteh hã gap a Pisga

¹⁰ Mə Israyelɗe addoŋko, ateheŋ a Obot;

¹¹ addoŋ sə Obot a teheŋ a Iye-Abarim, a kapta-muyã məs dəsan a mahara Mo'ab, dəmmba pay nampum.

¹² Addoŋ siske, a teheŋ ama məlpa na Zered.

¹³ Addoŋ siske, ateheŋ dəgar ki Arnon, məzutoŋ kəla kapta-muyã dawpirken səka dələv net mə Amorɗe; Arnon vani dərban meŋge na Mo'ab a walaŋ Mo'ab dit mə Amorɗe.

¹⁴ Ndəni məpelin addəv ɗerewel net wəgayɗe na Yawe na: «Waheb-en Sufa gəm məlpeŋge nani; Arnon

¹⁵ gəm lolohẽɗ nan məzupirkeŋ kəla walaŋgəla na Ar, əzbanən meŋge na Mo'ab.»

¹⁶ Siske addoŋ a Be'er vov net iŋkile. Be'er as vani məs Yawe anah sən Moyis adak na: «Akkelet ɗiyi, wanəpsit iŋkile naka.»

¹⁷ Ndəni Israyel kan aɓap gabba gəlya na: «Iŋkile dəgulyoŋ zohõ səddəv vov neti, məɗɗələ!

¹⁸ Vov net iŋkile məs milyeŋge aso'oŋgu, məs gebbet milyeŋge atilikeŋ dit zleŋɗe na məlĩ neti, dit mikkeɗe neti.» Sə kapta-muyã na, addoŋ a Mattana;

¹⁹ sə Mattana a Nahaliyel, sə Nahaliyel a Bamot,

²⁰ sə Bamot a walaŋ na muyã na Mo'ab; dadwar ki Pisga van zigiɗ zigiɗiyi aka kapta-muyã.

Tay əskanən wəla məlĩ Sihon gəm məlĩ Og

²¹ Israyel aslənək maslənɗe aza Sihon məlĩ net mə Amorɗe də wənah sən na:

²² «Appam kan mətoŋ dəka dələv noko! Mətoŋ na diddivit gulyeŋɗe may diddivit megezlembirkeɗ ɓa; məsə na iŋkile məs kəso'oŋ ɓa; Tive metiŋ mədazba məza mənam əmzlah səkan dəka dəzəŋ may dəka zlaɓay ɓa məlyã hã mənam ki dələv dəgarə.»

²³ Ya Sihon dəpəl sən tive sən Israyel dətoŋgən dəka dələv nan ɓa, ndən ɗiy nan kakelgit pakə, yas agil ələmsən Israyel a kapta-muyã. Ndən gap a Yahas, agay də Israyel.

²⁴ Israyel abəl də masalam nani, amõh dələv nan təŋ sə Arnon hã gap Yabok hã aket meŋge net kirtin Ammon, vi mə Ammonɗe ampannək tilti.

²⁵ Israyel amõhik walaŋgəleɗe gugriɗ pakə; asanək a walaŋgəleɗe net mə Amorɗe beymeti, a Hesbon də təki an dədawzlan aman pakə.

²⁶ Vi Hesbon van walaŋgəla na Sihoni yi, məlĩ mə Amori məs dəgay də məlĩ na Mo'ab an maddaabəŋ, agəm dələv nan bayman hã gap a Arnon.

²⁷ Ndəni məzəlvaŋ də əya gəlya anahaŋ na: «Məde a Hesbon! Məmsak mərka walaŋgəla na Sihon, məzaɓan va laŋka!

²⁸ Offo asilik sə Hesbon, sə ki-gəla na Sihoni hərzlum offo məs dəzəm Ar sə Mo'ab, gəm migil mossorgoɗe na Arnon.

²⁹ Wəray akoko, Mo'ab! Kəzaŋka, ɗiy na Kemos! Məkkpeŋgeti kirtukum mezeŋgleket ka məs dənzoŋgu, kirtukum muguluŋgit tam ka məfərsineɗ na Sihon, məlĩ mə Amori!

³⁰ Muhẽk Amorɗe dit herɗe; Hesbon azək hã gap a Dibon. Mərɓəzluwək təki hã a Nofa, walaŋ dəmbat hã gap a Madaba.»

³¹ Israyel asanək də gəla aka dələv net mə Amorɗe

³² Moyis aslən ula walaŋgəla na Yazer; Amõhnən təki məs dədawzlan aman temtemi, yaŋ Moyis arɓehet mə Amorɗe məs dəssoŋ də gəla adaka.

³³ Siske na, aziynən heret də təki mbərən, agəmnən tive na Basan. Og məlĩ na Basan vit dit ɗiy nan ələmsit vi kawgay dənɗaŋ a Edrey.

³⁴ Yawe aɓsən Moyis na: «Kəgeslne' sən ɓa! In tat əpsuk ammba voko, ndəni, ɗiy nan beymeti gəm dələv nani; Kəɗɗa səngən va kəgəɗ sən Sihon məlĩ net mə Amorɗe məs dəsan də gəla a Hesbon naka.»

³⁵ Askanənək wəlan anan dit kirtini gəm ɗiy nan pakə, ɗəf tay dəmbər madaran təttaka dayday ɓa; ndəɗaŋ dələv nan mõhu.