Əŋɗa 20 - Bible en Guidar

Iŋkile na Meriba

¹ Ɗiy na Israyel pak agapaŋgək a kapta-muyã na Sin, aka təla maddaabəŋ, ampanənək gizlirke a Kades. Adaki Miryam təmtə, məndəkta.

² Iŋkile tahəŋ adak nawsa net ɗiy ɓa, ndəni akkalaŋ ləŋgəs aket may Moyis də Aron.

³ Aklopoŋ sənən Moyisi, aɓɗaŋ na: «Ɗəɗah va məmtək aka pay milmiŋgiɗim amtaŋ aba Yawe naka!

⁴ Kami kəkinən əkkal net ɗiy na Yawe a kapta-muyãŋ di? Vi məmtəgən aŋ mənam dit zəgeɗ memeyẽɗ namə!

⁵ Kami kəgilgəmən sə Eziptə kəkimən a təki mbəraynəŋ di? Təki nazlga zəgay dayday ɓa, na sokoyoy ɓa, na megezlembirkey may net tonzokɗe ɓa; iŋkile nawsa mododgom dayday tahəŋ ɓa.»

⁶ Moyis də Aron mbagitin ɗiyi, ndəɗaŋ tek a metive na gizlirke nalma də Maŋgəlva; ndəɗaŋ gbuduk hã mirbizit afuŋ, yaŋ gagdak na Yawe arban zən ezeti.

⁷ Yawe apel sən Moyis amna:

⁸ «Agəm zleŋge noko, akkelet ɗiy də məlmuk Aron; kəpeleŋ sənəngən milɓe a mahereti, wagilgit iŋkile nani. Kəgilgit sitigin iŋkile zohõ səddəv milɓe, kəpsitigin ɗiy dəsaŋgəni gəm sit zəgeɗ memeyẽɗ neti.»

⁹ Moyis agəmək zleŋge məs dəsan aba Yawe va məɗi sən wən nani.

¹⁰ Moyis də Aron ɗiy kəkalgit aba milɓe, yaŋ aɓsitin na: «Mənokum məɓoŋkum məprəm kana! Waməɓap əgilgit sukum iŋkile zohõ səddəv milɓeŋ sa?»

¹¹ Moyis van le'gini; arga milɓe nak təl sula də zleŋge nani. Iŋkile səddəvən zohõ əgulyoŋ, ɗiy dit zəgeɗ memeyẽɗ asaŋgə.

¹² Yawe aɓsit may Moyis də Aron na: «Adan kəprəmnən maw ɓa, kərbanən təstəs naw abet mə Israyelɗe ɓa na, asna kəkenin na aka dələv məs nədapsitiŋ ɓa.»

¹³ Eskiŋgə iŋkile na Meriba va ənəh na əklopo. Adaki mə Israyelɗe akayaŋ əklop də Yawe, arban təstəs nan adaka.

Məlĩ na Edom tay əɓoŋ dappan Israyel ətoŋgo

¹⁴ Sə kades iyi Moyis aslən maslənɗe aza məlĩ na Edom kawnah sən na: «Əpel na məlmuk Israyel yaŋka: kəsinik tatwãhɗe məs mələm dənɗaŋ pakə.

¹⁵ Efiŋgiɗəm apirkeŋgək a Eziptə, məsamək adak wəzveɗe diyɗa, ya mə Eziptiɗ azəmgəmənək sahã, mənam dit efiŋgiɗmə.

¹⁶ Məhəm sənək Yawe, yaŋ aprəm wəlamə: aslən səm maslay vi kawgilgəm sə Eziptə. Gəgaŋ na, mənam yakəŋ a Kades, walaŋgəla məs dəsan aket meŋge də dələv noko.

¹⁷ Appam kan mətoŋ dəka dələv noko! Mətoŋ na diddivit gulyeŋɗe may diddivit megezlembirkeɗ ɓa; məsə na iŋkile məs kəso'oŋ ɓa; Tive tive mədadawa məza mənam əmzlah səkan dəka dəzəŋ may dəka zlaɓay ɓa məlyã hã mənam ki dələv dəgarə.»

¹⁸ Yaŋ Edom azlan sən na: «kətoŋ na dənawda ɓa, vas ɓa wanəgil abokum dit masalamɗe.»

¹⁹ Mə Israyelɗe aɓsənən na: «Tive tive mədadawa; an məsək iŋkile noko, ina may zəgeɗ memeyẽɗ nawa, wanəfaɗ suk va an dəslə. Tay nəŋgəl mbərən, abbər ətoŋ də təlu kaka ɓa.»

²⁰ Yaŋ məlĩ na Edom azlan na: «Kətoŋ na ɓa!» Ndən vit aban dit ɗiy ammban ɗəŋkəlɗəŋkələ ərbanən gbogboŋ neti.

²¹ Adan Edom aɓoŋ dappan Israyel ətoŋ dəka dələv nani, Israyel səzan zarə.

Əmta na Aron

²² Addoŋguk sə Kades, sap net mə Israyelɗe beymet agapaŋgək aba mossorgo na Hor.

²³ Aba mossorgo na Hor, aket meŋge də dələv na Edom, Yawe apel sit may Moyis də Aron amna:

²⁴ «Abe aŋ na, Aron wamtə kazbet migilni, vi adawtoŋ aka dələv məs nədapsit mə Israyelɗe ɓa, adan kəɓoŋgoŋ dazban əpel naw a met iŋkile na Meriba.

²⁵ Agəm Aron də Ele'azar wətəni, anah sit dəpeŋgeŋ aka mossorgo na Hor.

²⁶ Kəkgbukgin lukutɗe na Aron, kəgulsingən Ele'azar wətəni; asna Aron wazbet migilni, wamtə adaka.»

²⁷ Moyis aɗɗak va Yawe aɗi sən wən nani, apeŋgeŋ keret ɗiy aka mossorgo na Hor.

²⁸ Moyis agbuk lukutɗe na Aron, agulsin Ele'azar wətəni; Aron amtə adak, a dadwar ki mossorgo. Siske na, Moyis də Ele'azar amsak əpirkeŋ səka mossorgo.

²⁹ Səza Əsap net ɗiy pak awla na, Aron abayək man, gəla na Israyel bayman agəɗək əvoŋ kaklaw hoku aka wəhəm kiyən.