Əŋɗa 19 - Bible en Guidar

Moŋglo na wasli pepreŋge

¹ Yawe apel sənək Moyis gəm Aron, amna:

² Əɗɗa na mahenziŋ yaŋka, va Yawe aɗi wən nani: Anah sit mə Israyelɗe dəkiyaŋ sukun wasli muguluŋgun pepreŋge məza heslepe azan ɓa, məs məklaki ɗah zuk ama wəlan ɓa.

³ Kəpsənəngən məsdələv Ele'azar; dəgilginəngən a baŋgla, dətawəngən wəlan abani.

⁴ Məsdələv Ele'azar dəkaygən mbel nan də pərəm vani, dəkso'igin təl buhul kəla ma gizlirke nalma də Maŋgəlva.

⁵ Kawzlani wasli muguluŋgun van ama harani; kawzlani gəbani, slu nani, mbel nani də senseni.

⁶ Məsdələv dəgəmgən wəlaŋga ɓəɓəl adawyaŋ na Sedər, gəm gaslamba na wəlaŋga adawyaŋ na isop, gəm gabaga məhəməni, dəzgetgin aka slay offo holɓoɓ a təki məs wasli muguluŋgun adawzla naka.

⁷ Siske na, məsdələv dəskoɓigin lukutɗe nani, dəslslaygən eret iŋkile; səɓɓan kan adamdan a dibirgidiki, də vas pak heslepe wasan azan hã moskoyo.

⁸ Ɗəf məs dəzla wasli van dəskoɓigin lukutɗe nani, dəslslaygən eret iŋkile; də heslepe adawsan hã moskoyo.

⁹ Ɗəf an məza heslepe azan ɓa, dəndagən moŋglo na wasli muguluŋgun naka, dəlgən əɗiyən a təki salala a ma poho na dibirgidik. Moŋglo van wasan sit ɗiy na Israyel zaɓ ammbet iŋkile naskoɓ heslepe. As matuya navvuyon mambrayi.

¹⁰ Ɗəf an dənda moŋglo na wasli muguluŋgun vani, dəskoɓigin lukutɗe nani; wasan də heslepe azan hã gap moskoyo. Wasan mahenziŋ an faɗ viyit mə Israyelɗe dit molhõyẽɗ məs dəssoŋ aret də gəla.

Mahenziŋ aka əbburo

¹¹ «Ɗəf məs dərəŋgən ɗəf məmtən, ana kigəbay ɗəf titir pakə, səɓɓan na wasan də heslepe hã pay buhulu.

¹² Dəslslaygən dit iŋkile vetis aka pay mohoko'ən asna aka pay mabohulon na wasan salala. Ya an dəslslay aka wəsɓəta mohokon ɓa na, asan na salala aka pay mabuhulon ɓa.

¹³ Ɗəf awandi pak məs dərəngən ɗəf məmtən, ana kigəbay ɗəf titir məs dəmtə kakaŋkakaŋka, yaŋ dəbbur heslepe səzan ɓa na, warnokon təki nassa na Yawe: ɗəfəs kawgilgini yi sə Israyel. Adan məksu' səni iŋkile nabbur heslepe ɓa na, məs heslepe yi, heslepe nan wasan azan slippe.

¹⁴ Mahenziŋ yaŋka: pay ɗəf amtə addəv gizlirke, ɗəf an dəsan a gizlirke də ɗəf an dətoŋ a gizlirke pak məs heslepeŋgə addəv pay buhulu.

¹⁵ Mesteɓe məs məmsani man səsl ɓa na, wasan də heslepe.

¹⁶ An a muyã, ɗəf ataŋgbãyək aza ɗəf məbayən də masalam, awaniɓa aza ɗəf məmtən, awaniɓa azet sleŋsleŋɗe na ɗəf titire, awaniɓa aza magamasə, də heslepe adawsan addəv pay buhulu.

¹⁷ Ammba ɗəf məs heslepe vanəs na, kawnday moŋglo sə gəla offo məzaɓ-Maŋgəlva vi mambray naka, kawziyən addəv mesteɓe, kawmə' iŋkile miyma akani.

¹⁸ Ɗəf məs dəbbur dəŋgohgən kiva wəlaŋga adawyaŋ na isop, dəyopgən eret iŋkile naddəv mesteɓe naka, dəksu'gin aka gizlirke məs ɗəf amtə addəvən vani, dit zəgeɗ naddəvən pakə, may ɗiy en dəssoŋ adak pakə, may ɗəf an dəne' ezet sleŋsleŋɗe na ɗəf titire, aza gəbay məbayən, aza kigəbay ɗəfa, awaniɓa aza magamasə.

¹⁹ Ɗəf an salala dəksu'igin iŋkile aka ɗəf məs heslepe də pay mohoko'ən gəm mabuhuloni; aka pay mabuhulon na, wara əbbur sən mambray nan səzani. Asna ɗəf məksu' sən iŋkile dəskoɓgən lukutɗe nan kana, dəslslaygən eret iŋkile, də moskoy nan na wasan salala.

²⁰ Ya an ɗəf dəslslər də heslepe dəbbur heslepe səzan ɓa, zev ɗəf as kawgilgini yi sə weleŋgit ɗiy na Israyel, vi warnokon gəla na Yawe; Adan məksu' səni iŋkile naskoɓ mambray ɓaŋ na, məs heslepe yi.

²¹ Wasan sukum mahenziŋ an faɗə. Dəwəl sən ɗəf məksu' iŋkile naskoɓ mambray na, dəskoɓgin lukutɗe nani. Ɗəf məs dərəŋgit iŋkiles naskoɓ mambray pak wasan məs heslepe hã moskoyo.

²² An ɗəf məs heslepe adawrəŋgən pak də heslepe adawsan, ɗəf məs dərəŋgən pak wasan də heslepe hã gap moskoyo.»