Əŋɗa 18 - Bible en Guidar

¹ Yawe aɓsən Aron na: «Istə dit kirtuk, gəm milmiŋgiɗuk kədawzlanən aka wən net heslepeɗe məs məɗɗa dəwəlsən gəla na Maŋgəlva, istə dit kirtuk kədawzlanən aka wən net heslepeɗe məs məɗɗa dadawgən wəza nokum na məsdəlva.

² Gəm kəkegin milmiŋgiɗuk na mahəlfa na Levi ammboko addəv gəla na Maŋgəlva, ana mahəlfa na afuko dəbbahaŋ sukungəni. Wassoŋ ka masuloko; hara kan na, is dit kirtuk kədawziweŋ aba gizlirke nawslere.

³ Dəssoŋgən aka wəza aboko, gəm ammba wəza na gizlirke baymani, məza ədder hara azet zəgeɗ na gəla na Maŋgəlva may təki nawzaɓ-Maŋgəlva ɓa, vi ɗəf səmmbeti awaniɓa səmmbokum adawka zən ama əmta ɓa.

⁴ Dəssoŋgən masuloko, dədawgənəngən wəza na gizlirke nalma də Maŋgəlva gəm wəzeɗe na gizlirke beymeti; ɗəf məs dəsən gabban ɓa adawsap azokum ɓa.

⁵ Mənokumtə naɗɗa wəza na gəla na Maŋgəlva, gəm an na təki nawzaɓ-Maŋgəlva; vasna tatwãh net herɗe arih na mə Israyelɗe əmpa ɓa.

⁶ Is tat ulani, in sən kiyu nədawgəm milmiŋgiɗkum mə leviɗe səret mə Israyelɗe, nədawvəl sukum dənɗaŋ: mipsini sən Yawe vi kaɗɗa wəzeɗe na gizlirke nalma də Maŋgəlva.

⁷ Isi dit kirtuko, kəɗɗanəngən wəza na məsdələv dəwəl sən təki nawzaɓ-Maŋgəlva bayman gəm an na dərɓaga gabaga məherin; kəŋgohgənəngən wəza nokumə, Nəpsukumək wəza na məsdəlva, aski wəza məs nədapsukum. Ɗəf məs dəsən gabban ɓa dədder azan na, kəbayəngəni.»

Zəga nawrəh net məsdəlveŋge

⁸ Yawe aɓsən Aron na: «awla, in nədap suk wəza nawga zəgeɗ na matuya en məvəl su dənɗaŋ, en məs mə Israyelɗe aɗiyaŋ pakə. Nipsukuko gəm sit kirtuko, mahenziŋ nan addəɗ na ɓa.

⁹ Haran nok yaŋ səza əvəl an dit zəgeɗ na matuya, məs məzleti ɓa: əvəl baymani, va ənəh na əvəl an də gəpa baymani, əzaɓ-Maŋgəlva vi mambray baymani gəm əzaɓ-Maŋgəlva nawsler bayman məs afaɗaŋ suwəni; zəgeɗ na əvəl an nawzaɓ-Maŋgəlva əs na, nokuməŋgə is dit kirtuk mezeŋgleketi.

¹⁰ Kəzimingin a matuya. Zel pak waɓap əzəmaŋgə. Kuleningin va zəgeɗ na matuya.

¹¹ An yaŋkəŋki nok əmpa: an məgəm səza əvəl məs kirtin Israyel, akiyaŋ pakə, səka an məs arban suwən pakə; nəpsukuko, gəm sit kirtuk mezeŋgleket dit muguluŋgiti, mahenziŋ nan addəɗ na ɓa. Ɗiy neŋgil anokda beymet en məza heslepe azet ɓa wazəmaŋgə.

¹² Mẽl an moggoni, mbazla na meketepe an neki gəm haykəmari, uwa net wəleŋɗe en dəsɓaŋ daabəŋ məs məpsən Yawe pakis nəpsukuke.

¹³ Dadabiyeɗ naka dələv net məs məki sən Yawe beymet nokuŋgə'e. Ɗiy neŋgil anokda beymet məs tahəŋ də heslepe azet ɓa na, wazəmaŋgə.

¹⁴ Zəga məs mahenziŋ atak a Israyel pak wasan noko.

¹⁵ Əbayman na, uwa maddaabəŋ məki sən Yawe pakə, na ɗəf titire dit en net zəgeɗ memeyẽɗi, nokuŋgə. Ya hara na, kəmangən tizi na ɗəf titire gəm kəmetigin uwa na məlviya net zəgeɗ memeyẽɗ en mahenziŋ atakə.

¹⁶ Kəmangən an nawman van aka agapək təla taka, kətawgən əlbəh nani, koɓeɗ na təbəz babar sle'i, əzban aza əsla naddəv təki nawzaɓ-Maŋgəlva, təbəz babar taka pak gagdak nan dəsangən kilo muɗakan kəlawə.

¹⁷ Ya kədawman məlviya na wasli ɓa, may na time, may na hãw ɓa: net na mahenziŋgəŋ. Kəfloŋgən mbel net aka matuya, kəzlagən səlhã net ka zəga nawzəm məs əŋgənən nek aka Yawe.

¹⁸ Sluw net dəsangən noko, gəm makran məzokoni də metetilen dəzəŋ.

¹⁹ Əvəl an haran na Yawe məs kirtin Israyel aɗiyaŋ səret əvəlɗe na matuya pak nəpsukuko, suk dit kirtuk mezeŋgleketi gəm muguluŋgiti. Mahenziŋ nan dəsangən faɗə. Aski wənmiyna an wã'ə, hã faɗ a mahara Yawe viko gəm viyit kirtuk naddəvko.»

²⁰ Yawe aɓsən Aron na: «Kərah na zəga nawzəmgəla azani may hara dələv nok a weleŋgit aka dələv net van ɓa. Intə nassaw hara dələv noko də zəga nok nawzəmgəla azan a weleŋgit kirtin Israyel.»

Zəga nawrəh net mə leviɗe

²¹ «Net kirtin levi yaŋka: ka zəga net nawzəmgəla azan na, in tat əpsit makəlaw net zəgeɗ beymet məs məɗi a Israyel a gəla wəza məs adaɗɗaŋ a gizlirke nalma də Maŋgəlva.

²² Vasna, kirtin Israyel addereŋ na əmpa aza gizlirke nalma də Maŋgəlva kawslanən mambray nawkisit əmta ɓa.

²³ Mə leviɗe dədaɗɗanən wəza na gizlirke nalma də Maŋgəlva; wazlanən aket heslepeɗe neti, wasan ka mahenziŋ məza addəɗ ɓa ammbet kirtukum. Arəhaŋ na zəga nawzəmgəla azan a weleŋgit mə Israyelɗe ɓa;

²⁴ ya hara na, ka zəga nawzəmgəla net mə leviɗe azan na, in tat əpsit makəlaw na zəga məs mə Israyelɗe aɗiyaŋ kana Yawe. Vini nənah sit na, arəhaŋ na zəga nawzəmgəla azan a weleŋgit kirtin Israyel ɓaŋka.»

²⁵ Yawe apel sənək Moyis amna:

²⁶ «Kənahsitgin mə leviɗe na: pay kədawtafənən makəlaw zəga məs nəpsukum ka haran nokum səddəv əvəl navet mə Israyelɗe na, kəgəmaŋgən makəlaw nan an Yawe adazbokum.

²⁷ Dəsangən azokum va zəga nawgəma, məstaka va an məgəm səka haykəmari məndan sə kelle may sə ŋgefleŋ sə təki məɗotən.

²⁸ Vasna, nokum van kəgəmaŋgən haran an Yawe adazbokum səka makəlaw məs kədawrəhaŋ səvet mə Israyelɗe pakə. Kəpsənəngən haran an Yawe adazbokum sən məsdələv Aron.

²⁹ Səka əvəl an kərəhaŋ pak na, kəgəməngən zəga an moggon day pak sən Yawe ka əvəl na matuya an adazbokum.

³⁰ Kənahsitgin əmpa na: paysən kədawgəmən zəga an moggon naran day pak na, tay məstaka viyit mə leviɗe, də zəga sə kelle may se ŋgefleŋ sə təki nawɗotən.

³¹ Kəzimningin zəgeɗ vetis dit ɗiy nokum a təki kəssoŋ pakə, əfaɗ nokum ammba wəza kəɗɗaŋ addəv gizlirke nalma də Maŋgəlva yi.

³² An kəwel suwənək zəga an moggon day pak na, mambray tay kəɗɗaŋ ɓa, kəraygənən əvəl na matuya net mə Israyelɗe ɓa, kəmtaŋ na ɓa.»