Əŋɗa 17 - Bible en Guidar

Kasliɗe net beyneŋgiɗ Kore

¹ Yawe apelsənək Moyisi, amna:

² «Anah sən məsdələv Ele'azar, wətən Aron, dəkkelet mazaŋzaŋɗe səra offo, vi na matuyaŋgə, gəm dətrayan offo faraɗa.

³ Mazaŋzaŋɗe net ɗiy en dəfaɗən mambray net də ənziya egge netiŋ na, nawkepetiŋgə dəkkpaŋgaŋgən koŋgroŋgo nawɗup aka təki nawzaɓ-Maŋgəlva, vi mərbeti yi aba Yawe, salalaŋgə. Wassoŋ ka naɗɗumon wən azet kirtin Israyel.»

⁴ Məsdələv Ele'azar hãs ənde mazaŋzaŋɗe na təbəz pepreŋ məs ɗiy məzlet arbaŋ neki, yaŋ məkepit kaɗɗet ka nawɗup aka təki nawzaɓ-Maŋgəlva.

⁵ Zəga naɗɗumon an dətoŋgi sit kirtin Israyel, vi ɗəf an dəsən gabban ɓa, va ənəh na, ɗəf məs zev Aron iyi ɓa na, adadder kawzla tursan sən Yawe ɓa: As vi adaɗɗa akan va na Kore də vanday nan ɓa yi, an dəgəɗ akan məs Yawe anah sən dafsən də ma Moyis naka.

Ɗiy tay əɓoŋgoŋ aket may Moyis də Aron

⁶ Vit pummo na, sap net mə Israyelɗe beymet təŋgaŋ wərwər aket may Moyis də Aron: «Kəbeyinik ɗiy na Yawe!»

⁷ Adan sap net ɗiy pak adakkalaŋ aket may Moyis də Aron, ndəɗaŋ heret kpaŋgən dəka gizlirke nalma də Maŋgəlva. Awlanən na, slaybuwən asərətəka, mbagən gagdak na Yawe ərban zəni.

⁸ Moyis də Aron mbataŋ ama gizlirke nalma də Maŋgəlva.

⁹ Yawe apel sənək Moyisi amna:

¹⁰ «Məgil səddəv vanday net ɗiyiski, wanəzet gəgaŋkəŋka!» Ndəɗaŋ zəbər hã mirbizit afuŋ

¹¹ yaŋ Moyis aɓsən Aron na: «Agəmət mazaŋzaŋgək noko, andə offo sə matuya, is hãs tursan akani, agəm zuko, dok aza vanday net ɗiyi; aɗɗa sit mahenziŋ navvuyon mambraya, vi Yawe atəŋgək herɗe nani: gəbay mbərayən atəŋgək səkay.»

¹² Aron agəmək kasli va Moyis anahə, anzan addak vanday, vi gəbay mbərayən atəŋgək a weleŋgit ɗiy səkay. Ndən tursan sek əziyən, aɗɗa mahenziŋ naskoɓ mambray aket ɗiyi.

¹³ Ndən ziw aweleŋgit ɗiy mimtit dit en medereti, yaŋ gəbay mbərayən aɓətə.

¹⁴ Ɗiy en dəmtaŋ sən gəbay mbərayən na, əŋɗa net tay gabal kəlaw kiyən poɗo də səkat buhul, məza əŋɗet en dəmtaŋ aka wən na Kore ɓa.

¹⁵ Aron həmndak aza Moyis ama gizlirke nalma də Maŋgəlva; gəbay mbərayən nak aɓətka.

Zleŋge na Aron

¹⁶ Yawe apel sənək Moyisi, amna:

¹⁷ «Apel sit mə Israyelɗe, anah sit dəkiyaŋ sukun zleŋge taka aza mahəlfa, zleŋɗe wassoŋ kəlaw kiyit sula, məs deyeɗe net mahəlfaɗe adawkiyaŋgə. Kəvergən iya na ɗəf taka səmmbet pak aka zleŋge nani.

¹⁸ Aka zleŋge na Levi na, kəvergən iya na Aron, vi zleŋge taka kaka' adawsan aza daya na mahəlfa.

¹⁹ Kəziygin zleŋɗe vet addəv gizlirke nalma də Maŋgəlva, aba ɗerewel nawslere, a təki nədalma də mənokum.

²⁰ Ɗəf məs zleŋge nan agilgin ɗaŋkalən na, ndəni nəweli: vasna, ŋgburŋgbur məs mə Israyelɗe adaɗɗaŋ akawəŋ wanəzargən faraɗa səzawa.»

²¹ Moyis apel sitik mə Israyelɗe, yaŋ deyeɗe net akiyaŋ sənən nawadi pak zleŋge taka, zleŋge taka aza daya na mahəlfa pakə, sap zleŋɗe kəlaw kiyit sula; zleŋge na Aron iyi addekit zleŋɗe veti.

²² Moyis sek əzi zleŋɗe nek aba Yawe addəv gizlirke na ɗerewel nawslere.

²³ Vit pummo na, Moyis toŋ addəv gizlirke na ɗerewel nawslere, dula na, zleŋge na Aron, zev Levi agilginik ɗaŋkalən: agilginik ɗaŋkalən taka, affuyũk taka hã asɓetik kirtini.

²⁴ Moyis vitgit zleŋɗe beymet səba Yawe vi karbet sit mə Israyelɗe beymeti; awlenini, nawadi pak amsakək əgəm zleŋge nani.

²⁵ Yawe aɓsən Moyis na: «Amsak aɗi zleŋge na Aron aba ɗerewel nawslere, azaɓan ka zəga narba ammbet ɗiy məɓoŋti. Vasna, wakəzargən ŋgburŋgbur net faraɗa səzawa, əmta arih na ɓa.»

²⁶ Vas Moyis agəɗə; aɗɗak məs Yawe aɗi sən wən nani.

Wəza net məsdəlveŋge gəm net mə Leviɗe

²⁷ Mə Israyelɗe aɓsənən Moyis na: «Awla! Wən nam agrakka, waməmtə baymam pakə,

²⁸ dədder go'o pakə, məs dədder go'o aza təki nassa na Yawe pak tay əmta; vas mədagrak kan hã serek tək sa?»