Əŋɗa 16 - Bible en Guidar

Əɓoŋ na Kore

¹ Kore, wətən Yisehar, wətən Kehat, wətən Levi, akkinik may Datan gəm Abiram kirtin Eliyab, gəm One wətən Pelet, zev Ruben.

² Dit ɗiy səkat sula də kaklaw sle' səret mə Israyelɗe aɓoŋgoŋ aka Moyisi; ɗiy vet ɗiy gugriɗ na sap net ɗiyəŋgə, may maslənɗe nakkala, ɗiy də sləmetəŋgə.

³ Akkalaŋgək aket may Moyis gəm Aron, aɓsitin na: «Mək vas də mənokum! Ɗiy naddəv əsap beymet salalaŋgə, Yawe tay aweleŋti; də tive awani kədawɗinən zukum day ki əkkal na Yawe di?»

⁴ Də əprəm wəpel vaska, Moyis zəbər, mirbizin aka dəlvafuŋ.

⁵ Yaŋ aɓsən Kore də dula nan na: «Pummo də mompumo na, Yawe warban na, naway nan di, naway məza heslepe azan ɓa di, gəm naway məwelin nadder azan di; ɗəf an məwelin na, wataf dəddergən azani.

⁶ An kədaɗɗaŋ yaŋka: məkay kasliɗe avokum, anokum Kore də vanday nan baymani,

⁷ pummo na kəsɗaŋgən offo addivti; kəziyaŋgən zəga məffok nek akan kara Yawe, ɗəf məs Yawe ada əwel na, ɗəf aski salala. Mək vaska, kirtin Levi!»

⁸ Moyis aɓsən Kore əmpa na: «Kamə məprəma, kirtin Levi!

⁹ Agəsək azokum Maŋgəlva na Isayel aɗikum temme səza sap na Israyel, vi kawtafkum ədder azani, vi kaɗɗa wəzeɗe na təki nassa na Yawe gəm kawziw aka iya na sap net ɗiy pay kədaɗɗaŋ wəza ammbet ɗiy pakəŋ sa?

¹⁰ Atafkumuk kəddereŋgən azani, is dit milmiŋgiɗuk mə leviɗe beymeti. Yaŋ kədaŋglunən wəza na məsdələv əmpa!

¹¹ Vi aski kan isi də vanday nok pak, kədawslerin mokum aka Yawe! Ya Aron tam nan miyi kan ka kəɓoŋgoŋgən akan di?»

¹² Moyis slən iye may Datan də Abiram, anet kirtin Eliyab məs dənəhaŋ na: «məmbat na aka dələv van ɓa neki.

¹³ Mək suki kəgilgəm səka dələv məs moŋvo də emelemele akan loklok vi kawbayəm a kapta-muyãŋ ɓa sa? Mbaraka mok aka əzəm məlĩ akam əmpa sa?

¹⁴ Vaski ɓa, gesiŋ kəkəm aka dələv məs moŋvo də emelemele akan loklok ɓa! Guli kəpsəm ɓa, megezlembirkeɗ ɓa! Is ule ɗiy vetis na va dərweŋge sa? Məmbat na ɓa!»

¹⁵ Gədəv Moyis adək sawɓa. Aɓsən Yawe na: «kəzlgə sləma aka əvəl net ɓa. Nətaf koro net dayday ɓa, mbərayən tay nəgəɗ sən ɗəf taka səmmbet ɓa.»

Wən mətawən aka Kore dit makkeyeŋgiɗni

¹⁶ Moyis aɓsən Kore na: «Is də vanday nok pak, kezzoŋgən aŋ pummo aba Yawe, isi, ɗiy nok veti, gəm Aron.

¹⁷ Naway pak dəgəm kasli nani; kəziyaŋgən zəga məzəffok addivti, nawaydi pak dərbangən kasli nan aba Yawe, sap pak kasliɗe səkat sula də kaklaw sle'; vaska'a də Aron gəm isi, naway pak də an nani.»

¹⁸ Naway pak agəmək kasli nani, andaŋgək offo addivti, aziyaŋgək zəga məzəffok nek akani, aziweŋ a metive na gizlirke nalma də Maŋgəlva də Moyis gəm Aron.

¹⁹ Kore akkalanək vanday nan bayman a meŋgeveti, a metive na gizlirke nalma də Maŋgəlva. Yas kan gagdak na Yawe arbə a mahara sap net ɗiy beymeti

²⁰ Yawe aɓsən Moyis də Aron na:

²¹ «Məgoh dula net ɗiyiski; wanəzet gəgaŋkəŋka.»

²² Yaŋ azbəraŋ hã mirbizit afuŋ, aɓɗaŋ na: «Aw Maŋgəlva, Maŋgəlva afən zeŋgile na zəga nammba dələv pakə, ɗəf taka dəgəɗ mambraya, yaŋ kədawke herɗe aka sap net ɗiy beymeti!»

²³ Yawe apel sənək Moyisi amna:

²⁴ «Apel sən sap net ɗiyi, anah sit na, dəzaraŋ faraɗa sə maŋgava təki nassa net may Kore, Datan, gəm Abiram.»

²⁵ Moyis le' kadda ərəh Datan də Abiram; ɗiy məsɓet na Israyel azbanəni.

²⁶ Apelik wən sən sap net ɗiyi, amna: «Mədder kan səzet gizlirkeɗe net ɗiy mbəreytiski, kədawrəŋgənən zəga nawray net təttaka dayday ɓa, geslne vi nokum van kədamtaŋ tam aka wən na mambray net pakə!»

²⁷ Ndəɗaŋ kan zaraŋ faraɗa sə maŋgava təki nassa net may Kore, Datan, gəm Abiram. Datan də Abiram agulyoŋko, tahəŋ ziwziw amet gizlirkeɗe net sap dit gil neti, kirtiti gəm dihiŋgiɗti.

²⁸ Moyis amna: «Aza aŋki kədawsənnən na, Yawe dəslənu kaɗɗa wəzeɗeŋki ɓa na, nəɗɗe na kiyu ɓa:

²⁹ An ɗiyiŋ amtaŋgək va ɗiy pak adamtaŋgə, an zəga məzəɗɗa aket ɗiy pak dəgəɗ aketi, asna, Yawe dəslənu ɓa.

³⁰ Ya an Yawe agəɗək zəga məs gabban aprəm ɓa, dəlvafuŋ akolko, asɗikik sap də zəga nawray net bayman, an apurkoŋguk mederet a təki nassa net ɗiy mimtiti, wakəsənnən na, ɗiyiŋ azelenənək Yawe.»

³¹ Aka adawbay ma əpeləska, dəlvafuŋ ləŋ pəɗak səmmba tilti.

³² Akolko, asɗikik sap dit ɗiy na daŋgla net beymeti, vaska'e dit ɗiy na Kore beymet dit zəgeɗ nawray net beymeti.

³³ Də zəga nawray net bayman apurkoŋ mederet a təki nassa net ɗiy mimtit, yaŋ dəlvafuŋ asərət aketi. Vaski azaŋ səddəv əkkala.

³⁴ Ɗiy na Israyel en dəssoŋ kiyit tərwəsl, anzoŋguk sən vaŋvəl neti, vi tay ənəhaŋ sən zit na: «Mənzamsəmə, vas ɓa dəlvafuŋ wasərət akamə!»

³⁵ Offo məs Yawe agilgin azlzlirik zel səkat sula də kaklaw sle' məzu təlnən zəga məzəffok neki.