Əŋɗa 15 - Bible en Guidar

Əvəl an dədah ammba əzaɓ-Maŋgəlva

¹ Yawe apelsənək Moyisi, amna:

² «Apel sit mə Israyelɗe, anah sit na: pay kətoŋgoŋ aka dələv məs kədassoŋ adak də gəla, ana dələv məs nədapsukumuŋka,

³ an kawvəlaŋ sənən Yawe də zəga nawzəm an məzlan dəzle va əvəl nawzla kurmbuɗuku awaniɓa əzaɓ-Maŋgəlva naknahan əswaya, awaniɓa əvəl an dəsil sə makra ɗəfa may ammbet wəzləreɗi, ammba əzaɓ-Maŋgəlva vaska, vi məŋgənən dəffetengən makra Yawe na, kəweleŋgən zəga mamayã metiŋgini awaniɓa muzliya.

⁴ Ɗəf an dəki əvəl vas sən Yawe, dəkaygən əvəl də gəpa kukuɗ kilo hoku məllaɓən də mel litər taka gəm wəɗak nani;

⁵ dəwəl sən mbazla nawpesl afuŋ na, kəpsəngən litər taka gəm wəɗak nani, sap də əvəl nawzla kurmbuɗuku awaniɓa əzaɓ-Maŋgəlva nawslere an awəl sənək wət time botol.

⁶ An ndargayã yi na, kəgəɗgən əvəl də gəpa kilo sləre, məllaɓən də mel litər sula,

⁷ gəm mbazla nawpesl litər sula ka zəga məs məŋgənən nek aka Yawe.

⁸ An kapsən medgeɗge sən Yawe ammba əvəl nawzla kurmbuɗuku awaniɓa ammba əzaɓ-Maŋgəlva vi kaknahan wən miynani, awaniɓa ka əzaɓ-Maŋgəlva nawrah zazay na,

⁹ kawsapani əvəl də gəpa kilo vaytak məllaɓən də mẽl litər hoku sap aza medgeɗge vani;

¹⁰ ya mbazla nawpesl na, kəkigən litər hoku. Eskiŋ zəgeɗ nawzəm məs məŋginit nek sən Yawe.

¹¹ Vaski naɗɗa ammba medgeɗge, ammba ndargayã, ammba wət time botol awaniɓa ammba hãwã.

¹² Va wəŋɗa net zəgeɗ memeyẽɗ nawzaɓ-Maŋgəlva van asan pakə, vas kədaɗɗanən ammba taka, dəssoŋ mbarwa zlaŋ.

¹³ Vaski wətdələv pak adawzaɓ-Maŋgəlva nan pay adapsən way məhhətən məs məŋgənən nek sən Yawe.

¹⁴ Pay molhõyõ ade əsan anokumda, awaniɓa asanək awalaŋkum gap zəga na sayit ɗiy ɓəɓayə, an tay əvəl sən Yawe də way məhhətən məs məŋgənən nek na, va kədaɗɗaŋgə vas adaɗɗa.

¹⁵ Adan ɗiy taka kənanaŋ na, tive nadawgən mahenziŋ taka vikum gəm vi molhõyõ məs dəsan awalaŋkum; dəsangən tive nadawgən mahenziŋ an pay pak aba Yawe, vikum gəm vi molhõyõ va wəzveɗe atoŋgoŋ pakə.

¹⁶ Mahenziŋ taka də tive nadawgən taka dədawsan vikum gəm vi molhõyõ məs dəsan awalaŋkum.»

Əvel net peŋɗe maddaabəŋ

¹⁷ Yawe aɓsən Moyis na:

¹⁸ «Apel sit kirtin Israyel, anah sit na: pay kətoŋgoŋ aka dələv məs nədawkukum adakəŋka,

¹⁹ pay kədawzəmaŋ peŋ nadaka, kəngəmaŋ sənəngən haran na Yawe.

²⁰ Agəla an mədan daabəŋ aka gulo na, kəngəmaŋ sənəngən gəpa məpəpəla ka haran nani, ənda nan dəsangən va kədawndaŋ na zəga na mabardaw.

²¹ Səza gəpa an mətəŋ əda pak na, kəpsənəngən haran na Yawe, vas adawsan ammba saykum pakə.»

Əzaɓ-Maŋgəlva ammba mambray məs dəva ɗəfi ɓa

²² An dəvokumi ɓa, kəbeweŋgik daɗɗa taka səmmba əpel na ənziya məs Yawe aŋɗet sən Moyis iŋki,

²³ en məs Yawe aɗi sukum wən net ava Moyis beymet təŋ səza pay məs Yawe aɗi wən neti yaŋ sə dərɓagan na assoŋ ammba sayit ɗiy pakəŋki,

²⁴ an heslepe məɗɗan dəva ɗəfi ɓa, sap net ɗiy dəsənnən wən nan ɓa, sap net ɗiy beymet dəpsənəngən medgeɗge sən Yawe vi əvəl nawzla kurmbuɗuk məs məŋgənən neki, sap də əvəl an na zəga na mabardaw gəm an məŋgla nafloŋ afuŋ va məsərəka, gəm əmpa porsok taka nawzaɓ-Maŋgəlva navvuyon mambraya.

²⁵ Məsdələv dəɗɗagən mahenziŋ navvuyon mambray aka sap net mə Israyelɗe pakə, warəhaŋ əvvuy na mambraya. Vi heslepe van dəva ɗəfi ɓa, ya akiyaŋgək əvəl neti, may zəgeɗ nawzəm sən Yawe, gəm əmpa əzaɓ-Maŋgəlva məs adaŋ ammba heslepe net məs dəva ɗəfi ɓa.

²⁶ Əvvuy na mambray wasan ammba sap net mə Israyelɗe beymeti, vaska hã gap aza molhõyõ məs dəsan enedda; vi ɗiy pak aslsləraŋgək də heslepe məs wa'i ɓa vanəska.

²⁷ An ɗəf taka dəɗɗa heslepe məza wa' ɓa na, dəkigən hãw na wəzva taka ammba əzaɓ-Maŋgəlva vi mambraya.

²⁸ Məsdələv dəɗɗagən mahenziŋ navvuyon heslepe məs wa'i ɓa van ammba ɗəf nan məs dəɗɗa də mandaraŋ aba Yawe; dəɗɗagən mahenziŋ navvuyon mambraya asna warah əvvuy na mambraya.

²⁹ Dəsan mə Israyel, wətdəlva awaniɓa molhõyõ də gəla enedda zlaŋ; mahenziŋ nokum taka adawsan ammba ɗəf məs dəgəɗ heslepe məza wa' ɓa.

³⁰ «Ya ɗəf an məgəɗ zəga nzeɗi, dəsan wətdəlva awaniɓa molhõyõ, ɗəf vanəs əra adawran Yawe; ɗəf nan nawgilgini səret ɗiy nani.

³¹ Adan azelenik əpel na Daya gəm aggarək ki əpel na ənziya na, ɗəfəs nawgilgini: heslepe nan tay azan slippe.»

Wən nasmay də pay naffete

³² Aka mə Israyelɗe assoŋ a kapta-muyã na, yaŋ mə Israyelɗe aggbotoŋ aka ɗəf dakraw seseme pay naffete.

³³ Yaŋ akanən abet may Moyis, Aron dit mə Israyelɗe pakə.

³⁴ Mərmani ɗəf van lewlew, dawya əkayan tive nazga'səni.

³⁵ Yawe aɓsən Moyis kan na: «Ɗəfəs nawzani yi! Ɗiy pak dəbaynən də əskan dit gərmeŋge, a baŋgla na dibirgidiki.»

³⁶ Məzbani əpel na Yawe va aɗi wən nan sən Moyisi: ŋgboŋ net ɗiy agilgininik ɗəf van a baŋgla na dibirgidiki, məskan dit gərmeŋge, ndən zamə.

Moksoyɗe a met lukutɗe

³⁷ Yawe anah sənək Moyis

³⁸ dəprəman sitgən mə Israyelɗe vaŋka: «Təŋ səzokum hã gap azet kirtukum naddəvkum, kəɗɗaŋgən moksoyɗe a met lukutɗe nokumə, gəm kəhẽweŋgən gaɗmay mənɗerin pəreŋ pəreŋ.

³⁹ Kəguloŋgən lukutɗe də moksoyɗe azet kana, pay kədawlenin moksoyɗe vet na, wakəɗɗumonən əpel na ənziya an Yawe aɗi naɗɗa, wakəɗɗaŋ wəza dənɗaŋ. Vasna, kəppanən kizukum ətoŋ addəv matuya sən ərak na mokrokum may əsim zəga nawtoŋgukum addəv əɗɗa mambray ɓa.

⁴⁰ Kəɗɗumoŋgən əɗɗa wəza də əpel na ənziya gərakə, vas kədarbanən na, salala kənanən sən Maŋgəlva nokum.

⁴¹ Intə Yawe Maŋgəlva nokum; nəgilgukumək sə Eziptə, vi kakkpaŋ Maŋgəlva nokum. Vaski, Yawe Maŋgəlva nokum nani.»