Əŋɗa 14 - Bible en Guidar

Ɗiy tay əɓoŋgoŋ dawtoŋ a Kana'an

¹ Sap net ɗiy beymet aslerenənək meti, aŋzlaŋ vaŋvəla, avoŋgoŋ kim aka əhəma.

² Mə Israyelɗe beymet aɓoŋgoŋguk aket may Moyis də Aron; sap net ɗiy ŋgbaŋtaŋ aɓsitin na: «Haya! Ɗəɗah va məmtək aka dələv na Eziptə! Awaniɓa va məmtək a kapta-muyã daydayə!

³ Kami Yawe akiyəm aka dəlvəŋ kamta sən masalam di? Karmeti gil nam dit kirtəmə. Dəɗah səm əmnda a Eziptə ɓa sa?»

⁴ Apeleŋ awalaŋ zit na: «Məɗi səm məlĩ abamə, məmndamsəm a Eziptə!»

⁵ Moyis də Aron appu'oŋ aba sap net mə Israyelɗe məkkelit beymet hã mirbizit əne' afuŋ.

⁶ Yosuwa wətən Nun, gəm Kaleb wətən Yefunne, məs dəssoŋ eret ɗiy dəddoŋ əsəŋgləkan mammba dələv nak aŋgerninik lukutɗe neti.

⁷ Aɓsənən sap net mə Israyelɗe beymet na: «Dəlvəŋ məs məl əsəŋgləkanəŋ, dələv nan lelewaɓɓa.

⁸ An Yawe atafək na, wakəm aka dələv vani, wapsəmə, dəlvəŋ məs moŋvo gəm emelemele akan loklokəŋka.

⁹ Vasna, kəɓoŋgoŋ aka Yawe dərəŋ ɓa, kəgeslne'eŋ sit ɗiy naka dəlvəŋ ɓa, baram taka mədaflumti! Məkə net tay ɓa, ya nam yaŋ na Yawe tay də mənamə. Kəgeslne'eŋ sit ɓa!»

¹⁰ Sap net ɗiy beymet anəhaŋgək wən nasket dit gərmeŋge, yaŋ gagdak na Yawe arban zən azet mə Israyelɗe pak a gizlirke nalma də Maŋgəlva.

Moyis tay əŋgla əvvuy na mambray net ɗiyi

¹¹ Yawe apel sən Moyis amna: «Hã gap dewɗe ɗiyiŋ adazbanən əzelew di? Hã dewɗe adawɓoŋgoŋ dawtaf wən naw də va nədaɗɗe sekeneɗ naw aweleŋtiŋ pak di?

¹² Wanətaw sit gəbaymərma, gəm kawtekit səka zəga nawzəmgəla neti; ya səzok nədasɗəw ɗiy gagakɗe, gboŋgboŋ daykiyti.»

¹³ Moyis aɓsən Yawe na: «Mə Eziptə aprəmənək na, də gbogboŋ noki kəgilgit ɗiyiŋ sənedda,

¹⁴ anah sitinik wən van sit ɗiy naka dəlvəŋka; ɗiy vetis aprəmənək na, is Yawe is tat a weleŋgit ɗiyiŋki; is Yawe tə kədarban zuk a maheret ta' ulukuni; slaybuwən nok tay əziw a disiŋ aketi; is dəvoko, kədawtoŋ addəv dədəka na slaybuwən abet kapaya, dəfəɗ na addəv dədəka na offo.

¹⁵ Kəŋgəl na kawbey ɗiyiŋ va ɗəf taka kana! Ɗiy dəprəmənən sləmok wanahaŋ na:

¹⁶ “Yawe dəɓap ətoŋgit ɗiyiŋ aka dələv məs asway napsitiŋ ɓa, vini abey a kapta-muyã.”

¹⁷ Yaŋkəŋ na, gagdak na Daya naw dərban zəni! Adan kəpelik dawnəh na:

¹⁸ “Intə Yawe, zay aza ədagədəva, məknəhu də moggon məza addəɗ ɓa, məzuɓəs heslepe gəm kiɓəɓəla, məza appa zəga ətoŋ ɓa hara kana, gəm məzbə heslepe net efiŋgiɗit ɗiy aket kirtit gap sayit hoku may poɗo,”

¹⁹ kamə avvuyon heslepe net ɗiyiŋki, va mẽmẽtiŋ na əŋgla nok adassohõni, may va kəɓis ɗiy vetiŋ təŋ sə Eziptə hã aŋkəŋka.»

²⁰ Yawe azlanka amna: «Nəvvuyonək va kəssohu.

²¹ Ya hara kan na, Suway va nəsaw madarawa, suway va gagdak na Yawe atəsl mammba dəlva,

²² taka tay səmmbet ɗiyiŋ dulanən gagdak naw may sekeneɗ naw məs nəgəɗ a Eziptə gəm a kapta-muyã, məs dulanən nazaw təl kəlaw məza əprəm maw ɓaŋka,

²³ səway, taka səmmbet tay nawla dələv məs niynan napsit afiŋgittiŋ ɓa; taka səmmbet məs dəzelewənəŋ tay nawlan ɓa.

²⁴ Ya məgəɗ wəza naw Kaleb na, adan əmpəs temme dədawgən azbaw məza əɗɗa sosokko ɓa na, wanəka aka dələv məs al teksa adakəŋka: zeŋvin dədawzəm ma təki vani,

²⁵ mə Amalekɗe tam dit mə Kana'anɗe wassoŋ a təki məpəlayya. Pummo ləŋ kədawmanən horokum kamsak əmbat kəla kapta-muyã, nadda kəla pehe net vəlarɗe.»

Daya tay əgay dit ɗiy nani

²⁶ Yawe apel sənək Moyis gəm Aron, amna:

²⁷ «Hã dewɗe ɗiy mbəreytiŋ adazbanən wərwər akawəŋ di? Nəprəmək va mə Israyelɗe adaɗɗaŋ wərwər akawa

²⁸ Anah sit kan na: “Yawe dəɗimani, suway va nəsaw madarawa, məs nəprəmkum əpele anan nədawgəɗ sukum.

²⁹ A kapta-muyãŋki kigəbaykum adawvoŋgo, mənokum baymokum məs məverkum də əŋɗokum təŋ səza wəzva kaklaw sula ədda abeŋka, vi kəɗɗaŋgək wərwər akawa!

³⁰ Suway, kətoŋgoŋ na aka dələv məs nəsway nawɗikum adak də gəlaŋ an may Kaleb wətən Yefunne gəm Yosuwa wətən Nun əŋgə ɓaɓa!

³¹ Kirtukum məs kənəhaŋ na wassoŋ ka zəga mərəhən səma wəgayaŋ na, wanəke adaka; wasənən dələv məs kəzelenənəŋka.

³² Ya kigəbaykum anokum na, wavoŋ a kapta-muyãŋka.

³³ Kirtukum wassoŋ məzuteɗeŋɗe wəzva kaklaw poɗo a kapta-muyã; Waslanən tatwãh na əggbak ma nokum, hã an kəmtaŋgək gərak a kapta-muyãŋka.

³⁴ Va kəvoŋgoŋ kaklaw poɗo aka əsəŋgləkan mammba dələv naka, wəsɓəta taka ammba wəzva taka kədaɗɗaŋ aka əslan tatwãh na heslepe nokumə, kəsənəngən an məzəɗɗa pay məzgawa.”

³⁵ In Yawe, nəpelke, səway, vas nədaɗɗa də sap net ɗiy mbəreytiŋki, məs dəslerin met akawəŋki. Wagrakaŋ beymet a kapta-muyãŋka; eske adamtaŋgə.»

³⁶ Ɗiy en Moyis aslən əsəŋgləkan mammba dələv, məs əmilye net na apeleŋ mbərayən aka dələv van neki, dəɗyeŋgetin ɗiy əpel mbərayən aka dələv vanəŋka,

³⁷ zel məs dəɗɗaŋ daraw nawpel mbərayən aka dələv van na, net amtaŋgək sən gəbay metiŋ aba Yawe.

³⁸ Yosuwa wətən Nun, gəm Kaleb wətən Yefunne əŋgə kaka' məs dəkõhoŋ səret ɗiy en dəddoŋ əsəŋgləkan mammba dələv veti.

Ɗiy tay əɓoŋgoŋ əmpa

³⁹ Moyis aboton sitik əpelis pak sit mə Israyelɗe beymeti, yaŋ ɗiy aɗɗaŋ gəlabay gəddakə.

⁴⁰ Vit mazayən də mompumo pum na, ndəɗaŋ heret sek əpeŋ aka dadwar ki gərma, aɓɗaŋ na: «Mənam yakəŋkə waməpeŋ a təki məs Yawe aŋgəɗə, vi məgəɗək mbərayən.»

⁴¹ Moyis amna: «Mi dəray kədaggaraŋ kiy an Yawe aɗi wən nan di? Kəbayən na man moggon ɓa.

⁴² Kəpeŋgeŋ ɓa, vi Yawe tay a walaŋkum ɓa; kədawkanən zukum ka məzuzelɗe nokum dəbaykuməngən ɗar ɓa.

⁴³ Mə Amalekɗe gəm mə Kana'anɗe tahəŋ eske abokum, wakəzbəraŋ sit masalamɗe neti; adan kəppanənək əzban Yawe na, asan na də mənokum ɓa.»

⁴⁴ Ndəɗaŋ tilit tək əpeŋ a dadwar ki gərma, ya akoti nawsler na Yawe gəm Moyis dəddereŋ sə dibirgidik ɓa.

⁴⁵ Mə Amalekɗe gəm mə Kana'anɗe məs dəssoŋ də gəla aka gərəm adak apurkoŋgu, askanən wəleti, aburkuɗnin hã gap a Horma.