Əŋɗa 13 - Bible en Guidar

Moyis tay əslən ɗiy ula mammba təki na Kana'an

¹ Yawe apel sənək Moyis amna:

² «Aslən ɗiy ula mammba dələv na Kana'an məs nədapsit kirtin Israyeləŋka; Kəslənaŋgən ɗəf taka səddəv mahəlfa, naway pak ammba mahəlfa net efiŋgiɗni; səret deyeɗe net mə Israyelɗe kədawgimini.»

³ Vasna hã sə kapta-muyã na Paran Moyis aslin dəka əpel na Yawe; ɗiyis pak deyeɗe net mə Israyeləŋgə.

⁴ Iya net yaŋka: Na mahəlfa na Ruben, Sammuwa wətən Zakkur;

⁵ na mahəlfa na Simeyon, Safat wətən Hori;

⁶ na mahəlfa na Yuda, Kaleb wətən Yefunne;

⁷ na mahəlfa na Yisehar, Yigeyal wətən Yosef;

⁸ na mahəlfa na Efrayim, Hoseya wətən Nun;

⁹ na mahəlfa na Benyamin, Palti wətən Rafu;

¹⁰ na mahəlfa na Zabulon, Gaddiyel wətən Sodi;

¹¹ na mahəlfa na Yosef, mahəlfa na Manase, Gaddi wətən Susi;

¹² na mahəlfa na Dan, Ammiyel wətən Gemalli;

¹³ na mahəlfa na Aser, Setur wətən Mikayel;

¹⁴ na mahəlfa na Neftali, Nahbi wətən Wofsi

¹⁵ na mahəlfa na Gad, Ge'uwel wətən Maki.

¹⁶ Aski iya net zel məs Moyis aslən nadda əsəŋgləkan mammba dəlva; sən Hoseya wətən Nun na, Moyis apsənək iya Yosuwa.

¹⁷ Moyis aslinik əsəŋgləkan mammba dələv na Kana'an. Aɓsit na: «Məpeŋ adak kəla Negev, kəggaraŋgən ki mossorgo

¹⁸ kulanəngən va dələv van asani, may an ɗiy nadak də gəla gboŋgboŋgəŋ awaniɓa mivvirtiŋgə, may ɗiy takatakaŋgə adaka awaniɓa diyɗaŋgə.

¹⁹ Kulanəngən an dələv məs ɗiy vetis assoŋ də gəla adak van moggoni, awaniɓa mbərayni, an walaŋgəleɗe məs assoŋ addivit vet dibirkidikɗeŋ awaniɓa korguɗeŋgə.

²⁰ Kulanəngən an dələv van də ba'ariyi awaniɓa məmtəniyi, wəleŋɗe tahəŋ sa tahəŋ ɓa. Mərɓəh geslne kəkayaŋgən uwa net wəleŋɗe naka dələv vani.» Dasək van na, mawala net dadabiyeɗ net megezlembirkeɗi yi.

²¹ Yaŋ apeŋgeŋ əsəŋgləkan dələv van təŋ sə kapta-muyã na Sin hã a Rehob, go'o də Lebo-Hamat.

²² Kəla Negev apeŋgeŋgi, agapaŋ hã a Hebron a təki məs Ahiman, Sesay, gəm Talmay zeŋvit mə Anakɗe assoŋ də gəla. Hebron van wəzva buhul daabəŋ ki Sowan na Eziptə məmpani

²³ Agapaŋ hã a təki məpəlayya na Eskol, a təki məs atawan kiva megezlembirke də mokkoy nani, aslanən də zleŋge ndəɗaŋ akan sula. Gəm əmpa akayaŋ tonzok də sokoyo.

²⁴ Məlvan təki vanəs na, walaŋ na Eskol, va ənəh na walaŋ na mokkoy, vi mokkoy məs mə Israyelɗe atawaŋ sədak naka.

Maslənɗe na Moyis tay əbotonən gabba malaka neti

²⁵ Dərɓaga əvoŋ kaklaw poɗo mulaŋ mammba dələv nak amilyoŋgu.

²⁶ Azzoŋ ərih may Moyisi, Aron gəm sap net ɗiy na Israyelɗe a kapta-muyã na Paran, a Kades. Aboton sitin malaka neti gəm sən sap net ɗiy na Israyel baymani, arban sitin uwa net wəleŋɗe naka dələv vani.

²⁷ Aŋɗan sənən wənəŋ sən Moyisi, aɓɗaŋ na: «Mələk aka dələv məs kəslənməŋka, dələv van moŋvo də emelemele akan lokloki yi; uwa net wəleŋɗe nadak yaŋka!

²⁸ Vas hara na, ɗiy dəssoŋ adak də gəla gboŋgboŋgəŋ, walaŋgəleɗe tahəŋ dit gəleɗe gboloŋgboloŋgu, məwələk zev Anak adak kpakə.

²⁹ Amalek tay də gəla aka va na Negev; mə Hittiɗe, mə Yebusɗe gəm mə Amorɗe tahəŋ də gəla aka mossorgo, mə Kana'anɗe tahəŋ də gəla a ma pehe naddak təkiya gəm zimiɗɗe a ma Yurden.»

³⁰ Yaŋ Kaleb aɓətgit ɗiy məzuzelenin wəza na Moyisi, amna: «Əpeŋ mədawpeŋge! Waməmõhõ; sesel waməska wəlani.»

³¹ Ya ɗiy en dəpeŋgəŋ dəndən aɓsənən na: «Məɓap na əwak sit ɗiy vet ɓa, vi gboŋgboŋgəŋ day kimə.»

³² Ndəɗaŋ təŋ əpel mbərayən aka dələv məs asəŋgləkanən nak abet mə Israyel, aɓɗaŋ na: «Dələv məs məbbalanəŋka, dələv məzəm ɗiy nakani yi, əmpa na, ɗiy en məwəl adak vet pak məɓeytiŋgə.

³³ Məwələk dogomɗe adaka, kirtin Anak mahəlfa net dogomɗe; mənam ula zəm na va heyɗeŋɗe, net van kpak vas adawləmən ezeti.»