Əŋɗa 12 - Bible en Guidar

Kokolo arəmtək Miryam

¹ Miryam gəm Aron pak apeleŋgik aka Moyis vi wən nat guluk mə Etiyopiyak məs akayə.

² Aɓɗaŋ na: «Yawe sən Moyis kaka' apelsən sa? Dəpelsəm anam ndən ɓa sa?» Yaŋ Yawe aprəma.

³ Ya Moyis nan, ɗəf məs dəɓe'gən kiyən aba Daya yi day ki ɗəf awandi pak aka dəlvafuŋgu.

⁴ Gurzik ləŋ Yawe aɓsit may Moyis də Aron gəm Miryam na: «Məgili, məddoŋ hokogukum pak a gizlirke nalma də Maŋgəlva.» Addoŋ adak hokogit pakə.

⁵ Yawe prik dəddəv dədəka na slaybuna, ndən ziw a metive na gizlirke nalma də Maŋgəlva; aye may Aron dət Miryam, ndəɗaŋ sulegit pak viteŋgi.

⁶ Amna: «Məprəm əpel nawa: An məskəleŋ tay arokum na, addəv ula in Yawe nədarban zu azani, də issine nədawpel səni.

⁷ Ya vaski də məgəɗ wəza naw Moyis ɓa, nan ndəni ɗəf na makraw sə nawda gərakə:

⁸ Maw də man nədawpel səni də ərban zuwa, məza də əpel haɗamma ɓa; tay ula gəɓa zə Yawe va asan. Ya mbar kan kəgeslne'en dawpel aka məgəɗ wəza naw Moyis ɓa di?»

⁹ Gədəv Yawe adək sawɓa, ndən mbatə.

¹⁰ Səza slaybuwən azar səka gizlirke na, kokolo akkpaŋgatək Miryam babarək kaɗak kaɗak va ɓeɓrezlerizze, Aron kpaŋgən haran akat Miriyam na, awla na, məskokoloktə!

¹¹ Aron Aɓsən Moyis na: «Aw daya nawa, kamə kədawɗi səm mambray məs məgəɗən akam ɓa, vi kiyəm tay ɓa, məɗɗaŋ mambray mənani.

¹² Aw kəta Miryam tədakkpaŋ va muzliya muwa bok zam, məs vadaya na slu zən mərrosən aka adawgilyen səddəvət manəŋ ɓa.»

¹³ Yas Moyis ahəm sən Yawe də ənah na: «Kamə Maŋgəlva, ambəlgəta!»

¹⁴ Yawe aɓsən Moyis amna: «Va afət atufsətək mefɗe aza harat na, təsat na də wil gap əfna buhul ɓa sa? Asna, təsat a mapoho əfna buhul! Sədərɓangan təmsakgən a gəlata.»

¹⁵ Məgilgiti Miryam a mapoho na dibirgidik pay buhulu. Ɗiy dəsmeŋ ɓa hã Miryam bəryok a gəlata.

¹⁶ Sədərɓagan na, ɗiy addoŋguk a Haserot, aziyənən dibirgidik net a kapta-muyã na Paran.