Əŋɗa 10 - Bible en Guidar

Mohoŋɗe na təbəz babara

¹ Yawe apel sənək Moyis amna:

² «Dəzaɓaŋ sukun mohoŋɗe na təbəz babar sula; kəzeɓigin na təbəz məvotən; watəraŋ sukun nawye ɗiyi may nasimgit dibirgidikɗe.

³ Pay muffet mohoŋɗe vet na, ɗiy dəkkalaŋgən beymet ama gizlirke nalma də Maŋgəlva.

⁴ An moho taka muffon kaka' na, ɗiy gugriɗe, deyeɗe nabet ɗiy gabalɗe na Israyel dədakkalaŋ azoko.

⁵ Pay kəffonən moho van əffo na wəgaya, dibirgidikɗe nammba pay nampum dəmbataŋgəni.

⁶ Pay kəffonən əffo masula'ən nawgaya, dibirgidikɗe na dohoŋ dəmbataŋgəni. Nawsilye na kəffonəngən əffo nawmbata.

⁷ Nawya əkkal tam na kəffonəngən zeki məza də vaŋvəl ɓa.

⁸ Kirtin Aron məsdəlveŋge dədoffetin moheŋɗe vetiski; dəssoŋ sukuməngən faɗ ka mahenziŋ məza akkpaŋ ɓa vi sayit ɗiy pakə.

⁹ Pay sən aka dələv nokum kəddoŋ ama əgay də mosokum məzəttopokum na, kəssakaŋgən dit moheŋɗeski də uffet nawgaya, vasna kaɗɗumokumi yi aba Yawe Maŋgəlva nokum, kawkõhgukumi yi səvet mesəŋgiɗkum.

¹⁰ Pay kərahaŋ pay nanneke may na wəzləra, na təla ama gərəm na, kuffotingin moheŋɗes vi kalhan əzaɓ-Maŋgəlva nokum nawzla kurmbuɗuku, may əzaɓ-Maŋgəlva nawrəh zazaya; wabbahaŋ ka Maŋgəlva dəɗɗumokumgəni. Intə Yawe Maŋgəlva nokumə.»

Təŋ səggərəm na Sinay gap a Mo'ab ( 10:11—21:35 ) Mə Israyelɗe armanənək tive

¹¹ Wəzva masula'ən də əvoŋ kaklaw sula na təla masula'ən na, ernene aslanənək zit a disiŋ ki təki məɗi ɗerewel nawslere.

¹² Mə Israyelɗe asilyoŋguk sə kapta-muyã na Sinay də mabərki ziti yaŋ ernene addoŋ əssoŋ a kapta-muyã na Paran.

¹³ Ətəŋ ədda net yas dəka əzban əpel məs Yawe aɗi wən nan sən Moyisi.

¹⁴ Ətəŋ nan na, dula na dibirgidik net kirtin Yuda də vanday nalpa net dəmbatə. Vanday nalpa net kirtin Yuda asanək ammba va Nason wətən Aminadab;

¹⁵ vanday nalpa na mahəlfa net kirtin Yisehar asanək ammba va Netanel wətən Suwar;

¹⁶ vanday nalpa na zev Zabulon asanək ammba va Eliyab wətən Helon.

¹⁷ Məktəmni təki nassa; kirtin Gerson dit kirtin Merari addoŋko, ndəɗaŋ dəslanən təki nassa aketi.

¹⁸ Dula na dibirgidik na Ruben ambatək də vanday nalpa nani; vanday nalpa nan asanək ammba va Elisur wətən Sede'ur;

¹⁹ Vanday net məzəlpaŋ na mahəlfa net kirtin Simeyon asanək ammba va Selumiyel wətən Surisaday;

²⁰ Vanday net məzəlpa na mahəlfa net kirtin Gad asanək ammba va Elyasaf wətən De'uwel.

²¹ Səɓɓan na mə Kehatɗe dəddoŋ də təki nawzaɓ-Maŋgəlva aketi; ɗiy meɓɓet tamə, tahəŋ əmpanən təki nassa tak əgap neti.

²² Siske na, dula na dibirgidik net kirtin Efrayim də vanday nalpa nan dəmbatə, vanday nalpa net kirtin Efrayim asanək ammba va Elisama wətən Ammihut;

²³ vanday net məzəlpa na mahəlfa net kirtin Manase asanək ammba va Gamaliyel wətən Pedasur;

²⁴ vanday net məzəlpa na mahəlfa net kirtin Benyamin asanək ammba va Abidan wətən Gideyoni.

²⁵ Əbayman na, dula na dibirgidik net kirtin Dan, dəmbat medidirɓe kpuɓ ammbet dibirgidikɗe beymeti. Vanday net məzəlpa na mahəlfa net kirtin Dan asanək ammba va Ahiyezer wətən Ammisaday;

²⁶ vanday net məzəlpa na mahəlfa net kirtin Aser asanək ammba va Pagiyel wətən Okran;

²⁷ vanday net məzəlpa na mahəlfa net kirtin Neftali asanək ammba va Ahira, wətən Eynan.

²⁸ Də mabərkizit vaski mə Israyelɗe addoŋ dit vandayɗe net məzəlpaŋ neti. Ndəɗaŋ mbataŋgə.

Moyis tay əkay ɗəf dəsən tive na malaka

²⁹ Moyis aɓsən Hobab wətən Re'uwel mə madiyan afət gon na: «Mənam tat əmbat a təki məs Yawe anah na: “In tat əpsukum naka.” Azbamə. Waməgəɗ suk moggoni, vi Yawe agəɗək moggon sən Israyel.»

³⁰ Hobab azlan sənək na: «Ndawna ɓa, aka dələv naw nədaddawa aweleŋgit ɗiy nawa.»

³¹ Moyis amsakək əzlani amna: «Kamə kədappam ɓa. Adan kəsənək təki mədawteh a kapta-muyã, wakəsok səm mərbə tive.

³² An kələk də mənam na, pay moggon məs Yawe aŋgəl napsəməŋ ade səm na, waməgəɗ suk moggon vani.»

³³ Ndəɗaŋ mbat sə mossorgo metiŋ na Yawe, adawaŋ əvoŋ hoku, akoti na wənmiyna na Yawe ambatək abet aka wən na malaka na əvoŋ hoku vanəŋka, vi kawsən təki məs adawɓapaŋ ətehe.

³⁴ Kapay na, slaybuwən na Yawe əssan aket kirtin dawzaraŋ sə dibirgidiki.

³⁵ An akoti tay əddani Moyis dawnah na: «Asili Yawe meseŋgiɗuk dətrayaŋgə, məzuzelokun dənzoŋgən səboko!»

³⁶ An aziwke, ndən dawnah na: «Amili Yawe, azet mə Israyelɗe kuɗiskuɗissiŋki!»