Amos 9 - Bible en Guidar

Ula masle'eni

¹ Nulak Yawe ziwwe aka matuya. Yaŋ amna: Atəɓ kiyit dədəkeɗi, gebbet dəbuzluŋgurgəni! Akkrep aka kiyit anet baymeti, an tahəŋ dəmbraŋ əmpa'e na wanəɓeret də masalam. Ɗəf tay nawɓap ənzan ɓa, ɗəf tay nawndəwəɗ ɓa.

² An atoŋgoŋguk a təki net ɗiy mimtiti, vaw wakde sədaka. Ya an apeŋgeŋgik a disiŋ, wanəprikgit sədaka.

³ An aɗamaŋgək aka gərəm na Karmel, wanəkeyeti, wanikdih sədaka. An aɗɗumoŋguk əɗam sə maharaw də ətəpa ammbet iŋkile a pehe na, wanəpsən tive sən dohõ naret iŋkile dəlgən əbilit sədaka.

⁴ An addoŋguk anet meseŋgiɗit da ka belemɗe na mawgaya, wanəɗi wən nan sən masalam dəbeygin sədaka. Wanəzi haraw aketi nawgəɗ sit mbərayən, məza moggoni ɓa.

⁵ Yawe, Maŋgəlva Məzuɓappak məzurəŋgən dəlva, ndən əkkere, ɗiy nakan pak tahəŋ əɗɗa gəlabaya. Dələv tay əslan zən a disiŋ va Nil baymani, siske na, tay əpirken afuŋ, va məlpa Nil a Eziptə an aknahka.

⁶ Ndən məs dəɗi təki nassa nan a disiŋ, dəɗi gabban aka dəlvafuŋ. Ayek iŋkile na pehe yaŋ ofleŋ aka dəlvafuŋ. Yawe yi iya nani.

Ətawwən aket ɗiy en dəraygənəni

⁷ Yawe aɗiyman na: «Mənokum mə Israyelɗe, məstaka dit ɗiy na Kus kənanaŋ azaw ɓa sa? Intə nəgilgin Israyel sə Eziptə ɓa sa? Nəgilgit mə Filistiɗe sə Kaftor'e gəm mə Siriɗe sə Kir ɓa sa?»

⁸ Awle, hara Yawe Maŋgəlva tay aka dələv net milyeŋge en dəraygənəni. «Wanəzan səka dəlvafuŋgu, də as pak na, nəzan na gəla na Yakob ɓa, Yawe aɗiymani.

⁹ Vi in yakəŋ əɗiwən nani, naɓlet ɗiy na Israyel səret ɗiy meɓɓet pakə, va adaɓlanən zəga na pəkat gəpa məza gərmaŋgək taka dayday əbətat afuŋ ɓa.

¹⁰ Də masalam nədawzet məs mambrayɗe naret ɗiy nawa, ndəɗaŋ mənahaŋ na: kəki na ɓa, kəgapgən na tatwãh akam ɓa!»

Dərɓaga əraya

¹¹ «Pay dəpas na: wanəsilgin guɗuk na Davit. An dəɓəsl na, wanəsuko, an diɓlu gəm an dəray na wanəsilgini, wanərkan va aka pay asan lahəŋka.

¹² Ka dəmõhənəngən dələv na Edom an dəpələ gəm ɗiy-ɗar məs iya naw adawya aketi. Daya aɗiyman, naɗɗa as pakə.»

¹³ «Yawe aɗiyman na: Awle, pay tay əzzani məzənse wazban məzəbəla məzəzlga tam məɗot mokkoy na uwa net megezlembirke: Askan na, mbazla meleketen wayəm səket mossorgoɗe gugriɗe gəm səket mossorgoɗe pakə.

¹⁴ Wanəzaɓan ənziya net ɗiy naw mə Israyelɗe: Wamsakaŋ ərket walaŋgəleɗe məɓzliwti, wassoŋ addivti. Wampaŋ megezlembirkeɗi wasaŋ mbazla neti. Waɗɗaŋ guli net wəleŋɗe wazəmən uwa neti.

¹⁵ Wanəzi aka dələv an nawray veti. Ɗəf tay narɓehet əmpa səka dələv məs nəpsitiŋ ɓa. Yawe Maŋgəlva nok anahə.»