Amos 8 - Bible en Guidar

Ula mopoɗo'ən: kəggəl də uwa net wəleŋɗe

¹ An Yawe Maŋgəlva arbansu yaŋka, kekel məknəhən də uwa net wəleŋɗe na mawala.

² Assoh na: «Miy kədawla di Amos?» Yas nəzlan na: «kekel də uwa net wəleŋɗe na mawala.» Yawe apel suwa kan na: «Əgrak net ɗiy naw na Israyel agapka. Nəzban na ulasasãhit əmpa ɓa.

³ Pay dəpas na, gəlyeŋge neŋgil ana məlĩ da wakkpaŋgaŋ wəhəm na gəlabaya, Yawe Maŋgəlva aɗiymani. Kigəbayɗe waŋɗaŋ ɓa, kazgeti a təki pakə. Təki pak wassan sləɓɓəkə!»

Əɓrət net məmanən vet tay əki əraya

⁴ Məprəm wənəŋ kana, mənokum məŋgrofetin məssehẽŋɗeŋki, mənokum məzetin məzurayɗe səka dəlvəŋki:

⁵ Mənokum kan ənah na: «Wəzləreɗ na təlaper dətoŋgoŋ go'go'u, mərahgən əmsak əvəl temseleɗ nam ɗa! Pay naffet dətoŋ go'u, məmsakgən əkol met maheɗ nam ɗa!» Kaddəɗan hĩlĩw nawsla zəga də an muzliya, kaddəɗan gagdak nawsla zəga, kaɗɗa vurum də zəga nawsla gagdak na zəga.

⁶ Kalbəh ɗiy məddekit dit koɓeɗi məzurayɗe tam ka hensek təl ɗəf taka keselmeke na haykəmari dayday waməvəle.

⁷ Yawe aswayka: «Aka əɓaygən kiya na Yakob na, nəzgət na ɗah ki zəga naɗɗa net pakəs ɓa!»

⁸ Vi aski kan dələv adaɓla, ɗiy nakan pak wassoŋ a gəlabaya. Dələv waslan zən bayman va təki babara, wa'ofkoku siske na, ndən kamsak əsan afuŋ va Nil a Eziptə paysən aknahə.

⁹ Pay dəpas na, Yawe Maŋgəlva aɗiymani: wanətəpgən pay aka tətaŋpaya; addak wəsɓəta dələv adawtoŋ ara guzluyo.

¹⁰ Wanəkkpeŋget wəzləreɗ nokum ka gəlabayɗe gəlyeŋɗe nokum tam ka wəhəma. Ɗiy pak waynaŋ gomboɗok ama gizeti, kiyit ɗiy baymet wasan məfaɗən, wanəɗi va pay əmta na karmalay. As pak wagrak wəsɓəta mbərayən diyɗa.

¹¹ Yawe Maŋgəlva aɗiyman na: Pay nan wade, wanəslən may aka dəlvafuŋ, məza na way ɓa; məza net iŋkile ɓa, ya naprəm əpel na Yawe yi.

¹² Wassoŋ slorslor təŋ sə ma pehe hã a ma pehe mbərən, təŋ sə kəla disiŋ əmbat dəmmba pay nampum, wassoŋ zərok-zərok əkayan əpel na Yawe, ya arəhən na ɓa.

¹³ «Pay dəpas na, gordeŋge ŋgbuɓo-ŋgbuɓo lelewɗe dit gewleɗ waddakaŋ sit meme.

¹⁴ Ɗiy məzəswayaŋ də mambray na Samari gəm ənahaŋ na: Də iya na Maŋgəlva noko, Dan: “awaniɓa də iya na tive na matuya na Ber-Seba!” Ɗiyis pak wazbəraŋgə asilyoŋ na əmpa ɓa.»