Amos 6 - Bible en Guidar

Baray məs awtər ɓa

¹ Əray aket ɗiy dədanziyaŋ kiyit foŋgo a Siyon, gəm en dəɗiyən əɗɗum net aka mossorgo metiŋ na Samari! Petmekel an daabəŋ net mahəlfaɗe. Mə Israyelɗe tay əddoŋ akokum!

² Məddoŋ a walaŋgəla-metiŋ na Kalne, mula. Asna məddoŋ sədak walaŋgəla na Hamat metiŋ, səɓɓan na, məpirik a Gat net mə Filistiɗe. Wakulanən na: kədayaŋgək kiyit dəlveŋges sa? Dələv net metiŋgini day ki dələv nokum sa?

³ Mənokum tat əgay əslaŋgən pay na tatwãh dərɓe. Ya gagay kədaddergənən azokum.

⁴ Mənokum məvoŋgoŋ aket ɓərzləmeɗ na gozlobekne, may məkəɗəŋgəlaŋ aket antoŋɗe nokum vi kampər botolɗe dit kirit wasli məwelit sə gazlaŋ.

⁵ Mənokum tat iya gəlya wəlokum kolkol ammba gəzləŋtəndəŋ. Mənokum ɗəh əzaɓ zəgeɗ meleketet nawya gəlya va na Davit.

⁶ Mənokum məsan zəga dit hiliŋgiɗ nawsa mbazla, mənokum tat əppay mel məzufok nek diyɗa azukum. Ya mokrokum assokum aka wən na əray na Yosef ɓa.

⁷ Vini kakaŋ na, kasimgiti, daabəŋ kiyit en əsimgit pakə. Wəzləra net mətampəlɗe wabaymani.

Əza na Samari

⁸ Yawe, Maŋgəlva aswayək ndən sən kiyən Yawe Maŋgəlva Məzuɓappak aɗiyman na: «Maw tay aka əkaɓ na Yakob ɓa, nəzelik gəleɗe lelewɗe nani. Wanəppan walaŋgəla-metiŋ van də an naddəvən pak avet məzuzelɗe.»

⁹ An zel tahəŋ dəmbraŋ kəlaw addəv daŋgla taka, wamtaŋgə.

¹⁰ Asna mahəlfa na gugo net ɗiy en dəmtaŋ dədawgilgin gəbay net səŋgil kawndikit, wanah sən ɗəf məɗamən naddəv gəla na: «Ɗəf tay azok sa?» Ɗəf van wazlan sən na: «Awwo, ɗəf tay ɓa.» Wamsak ənah səni: «Amsan mok kpuɓu! Ɗəf adawya sləma Yawe ɓa.»

¹¹ Vi Yawe aɗiyək wən nan na, waɓzlu gəla metiŋgini gəm wapɗak gəla an muzliya.

Əska wəla təl sula məza tər wəray ɓa

¹² Pilseŋge aŋkoroŋ aka milɓe sa? Enseŋ adak dit wasliɗe sa? Mi dəgəɗ kəkkpaŋganən zəga an də tiven ka muwəna gəm ənziya an təstəs kpaŋ ka ndərəzl di?

¹³ Mənokum tat ənneken zukum aka Lo-dabar (ɗarə); mənokum tat ənah na: «Də gboŋgboŋ nami məmõh Karnayim, mohõ sula ɓa sa?»

¹⁴ Yawe, Maŋgəlva Məzuɓappak aɗiyman na, in yakəŋ əsilgit ɗiy akoko mə Israyel, wasərnən mok təŋ səma Lebo-Hamat hã gap a məlpa na Araba.