Amos 5 - Bible en Guidar

Gəlya na gəlabay aka Israyel

¹ Məprəm əpeləŋka, maw nədawɓuh akokuməŋka mə Israyelɗe.

² Waŋ ŋgbuɓɓo na Yerusalem təskotko, təsil na əmpa ɓa, Israyel lelew naka, tat ɓulohõ aka dəlvafuŋgu, ɗəf tay nawsilgit ɓa!

³ Vi an Yawe Maŋgəlva anah yaŋka «walaŋgəla-metiŋ məzugilgit ɗiy gabal ama əgaya, səkat dədappaŋgə an məzugilgit ɗiy səkatə kəlaw dədappaŋ sən Israyel.»

Ayə dafsəni

⁴ Vi van Yawe apel sit mə Israyelɗe: «Məkayawa, asna wakəssoŋ madorokum.»

⁵ Ya kədawkayawən addəv Gəla na Maŋgəlva na Betel ɓa, may kədaddoŋ addəv Gəla na Maŋgəlva na Gilgal ɓa, kədawtoŋgoŋ a təki salala na Ber-Seba ɓa'e. Vi isim adawsimginin Gilgal: Betel tam ka zəga ɗar adakkpaŋga.

⁶ Məkayan Yawe asna wakəssoŋ madorokum, vi adazzan va offo aka gəla na Yosef gəm kazəmən ɓa, məza ɗəf tay namtan sə Betel ɓa ɓa.

⁷ Ɗiy məkkpaŋganən təstəs ka ndərzla gəm əzgan zəga an də tiven afuŋgu!

⁸ Ndən dəɗɗe ŋgay net ŋgərzleɗi, gəm duŋgusu. Akkpaŋgan dəfəɗ tikiɗim ka təki məddaŋgən; dədakkpaŋgan kapay ka dəfɗa. Ndən məzuye iŋkile sə pehe əfloŋgit aka dəlvafuŋ. Iya nan na Yawe.

⁹ Ndən məzuki əray aka ɗəf gambara, əray kan ətoŋ addəv walaŋgəla-metiŋ na korgu.

¹⁰ Tahəŋ əzelen məzukiyit aka tive a təki nawtawwən na walaŋgəla-metiŋ gəm əzel ɗəf an məzupel də tiveni.

¹¹ «Vini kan Yawe anahə: mənokum tat əppət məzuraya, gəm əfaɗgən nzalaka na zəga na mabardaw. Kərkaŋgək gəleɗe dit gərmeŋge məslmeti kəssoŋ na addivit ɓa, kəmpaŋgək megezlembirkeɗ na sləma kəsaŋ na mbazla net ɓa.

¹² Ya nəsənka, əɓoŋ nokum diyɗa yi mambrayɗe nokum aŋɗaŋ ɓa: məzusərnən ma ɗəf an təstəs kənanaŋgə, mətafaŋ zəga aka əbit ɗəf kənanaŋgə. Mənokum əɗɗa ka wən dərmegin məzurayɗe aka ətawwəna.»

¹³ Vini ɗəf məs maɗula adawsan ɓat pay nani vi pay nan pay na əray yi,

¹⁴ Məkayan zəga an moggoni məza an mbərayən ɓa. Vasna wakəssoŋ madarokum, Yawe, Maŋgəlva Məzuɓappak, wasaŋ də mənokum, va kədawnahaŋgə.

¹⁵ Məzel mbərayən, məŋglu moggoni. Məziwgin wən də tiven a təki ətawwəna, Asna kuzuŋ, Yawe Maŋgəlva Məzuɓappak, wawəlsahã aket mambirgit kirtin Yosef soko.

¹⁶ An Yawe Daya Maŋgəlva Məzuɓappak anah yaŋka: «A təki nakkal pak kaprəmi əɓuhma. Aket tiveɗ pak ɗiy wanahaŋ na: “Əraya haya! Əraya haya!” Ɗiy nawya a gəlabay na, ndəɗaŋgə məzənseŋgi, gəm ɗiy en dəsənaŋ əhəm na gəlabaya;

¹⁷ Addivit megezlembirkeɗ pak kawɓuhi ma adaka paysən nədawtoŋ duwalaŋkum», Yawe anahə.

Pay Yawe adawgəm wən vani

¹⁸ Əray aket ɗiy məzəŋgluwən pay na Yawe! Madawki sukum pay na Yawe vanəs di? Təki kasak kasaki ɓa, guzli yi.

¹⁹ Tay va ɗəf məzənzan sən ɓoolu yaŋ zəga darawən adawyaŋ na urs aləm səni. Ndən mbat eŋgil, van gak aza gəla na, dohõ gboŋ əbələn!

²⁰ Pay na Yawe van na, guzli yi ɓa sa? Təki kasak kasaki ɓa. Guzli tiŋgbizlimi ɓa na təki babari ɓa.

Əzba nawzele

²¹ Nəzelke, maw tay aket wəzləreɗ nokum ɓa, miŋginit əkkalɗe nokum tay akaw nek ɓa.

²² An mənokum tat əkiyaŋ suwən əvəl nawzla kurmbuɗuku gəm əzaɓ-Maŋgəlva nawrəh zazay na, nawnan nek ɓa. Nawla aza əzaɓ-Maŋgəlva kədawzaɓaŋ dit zəgeɗ memeyẽɗ nokum məkiritiŋ ɓa.

²³ Məddergin geŋgere net gəlyeɗe nokum; də ɓaɓəlmet gəzləŋtəndəŋɗe nokum səzawa maw tay aka əprəmən ɓa.

²⁴ Ɗəɗah wən də tiven dədaw va iŋkile gəm təstəs dəsan va məlpa məs akkpa' ɓa.

²⁵ Addəv wəzva kaklaw poɗo məs kəɗɗaŋ a kapta-muyãŋ na, kəzaɓaŋ suwənək maŋgəlva gəm kəvəlaŋ suwənək də zəga na mabardaw sa mənokum ɗiy na Israyel?

²⁶ Kəslanənək Sikut məlĩ nokum də Kiyun zəga məzaɓa, ŋgərzla net meŋgilveɗ nokum məs Kəzaɓaŋgə!

²⁷ Vi aski kan nədawsimgukum balsən Damas, Yawe anahə. Iya nan na: Maŋgəlva Məzuɓappakə.