Amos 4 - Bible en Guidar

¹ Məprəm əpeləŋka, met wasliɗe na Basan dəssoŋ aka mossorgo metiŋ na Samari. Mənokum məzimgitin sahã net ɗiy məddekti, məsərən met məzurayɗe may məzunah sitin deyeɗe nokum na: «Akiya, məsegənəŋki!»

² Yawe Maŋgəlva aswayək də salala nani: Pay yaŋ əzzan akokum məs meseŋgiɗkum adawgilgukumən dit teklemɗe, en nozzoŋ dərɓogokum tam dit tulhoŋge nampa kilfi.

³ Wakugulyoŋ dəmmba zlava nawaydi pak haran a ban seki. Karɓohokumi kəla Harmon, Yawe aɗiymani.

Əzba məs awtər wəray ɓa

⁴ «Məddoŋ a Betel məraygən matuya na Gilgal; məsok zukum aza əraygən matuya. Də mompumo pak, mənokum əke zəgeɗ nawzaɓ-Maŋgəlva nokum, makəlaw na ərəh nokum tam aza əvoŋ mahokon pakə.

⁵ Məzla peŋ mədan də wuɗo ka əzaɓ-Maŋgəlva naɗɗa soko! Mətəlma na əvəl an də makra, məprəman siti, vi vaski kəŋglaŋ mənokum mə Israyelɗe.» Yawe Maŋgəlva aɗiymani.

Əhãy məs atərna wəray ɓa

⁶ In nəkisukum sahã na zəga nawgul a borokum a walaŋgəleɗe gugriɗ nokum baymeti, gəm may addivit gəleɗe nokum, yaŋ kəmulyoŋ azaw ɓa, Yawe aɗiymani.

⁷ Nəzləkumək də buwən təla hoku tak mawala. Nəziyək buwən aka walaŋgəla-metiŋ, nəzi aka walaŋgəla-metiŋ maɓɓan ɓa. Guli mbərən arahək buna, guli maɓɓan buwən dəzi akan ɓa, tay əkla.

⁸ Walaŋgəleɗe gugriɗ sula may hoku addoŋguk slorslor a walaŋgəla-metiŋ maɓɓan kawsa iŋkile məza meme net bay ɓa; ya kəmulyoŋ azaw ɓa. Yawe aɗiymani.

⁹ Nətawsukumək doŋgoyoŋ gəm muŋgus, gulyeŋge nokum gbeŋ net wəleŋɗe gəm net megezlembirkeɗi may sokoyeɗ nokum, heremeɗ nokum pak zaray azimke, ya kəmulyoŋ azaw ɓa. Yawe aɗiymani.

¹⁰ Nəslənək gəbaymərma akokum va aka tive na Eziptə, nəbeyik gewleɗ nokum də masalam, də əmõh pilseŋge nokum; nəppanək məŋgən dibirgidik nokum əmbat a məŋkənkum. Yawe aɗiymani.

¹¹ Nəzokumək va Maŋgəlva azan Sodom gəm Gomorra. Kəssoŋguk va seseme məkdəhən sə koffo, ya kəmulyoŋ azaw ɓa. Yawe aɗiymani.

¹² «Vini kana, tay nədawgəɗ suko Israyel. Vi an nədawgəɗ sukuŋka, asla zuk nalma də Maŋgəlva noko Israyel.»

¹³ Vi yaŋkəŋ na: an dəɗɗe mossorgoɗe gugriɗe, dəzəməɗ səmyã, məzərban an məs ɗəf titir aynan naɗɗa. Tay əkkpaŋgan guzli na dəfəɗ ka təki məddaŋgən. Tay ədaw aka təki an məɓayən ləklək naka dəlvafuŋ. Yawe, Maŋgəlva Məzuɓappaki iya nani.