Amos 3 - Bible en Guidar

Ɗiy na Maŋgəlva wazlanən aka an aɗɗaŋgə

¹ Mə Israyelɗe gəm məlma bayman məs Yawe agilgit səka dələv na Eziptə, məprəm əpel nan akokum, dawnəh na:

² «Anokum kaka' nəsən səddəv məlma nammba dələv pakə; vini nədawtaw wən akokum aka mbərayən nokum baymani.»

Maŋgəlva tay əpele, məskəleŋ asan na ɓatɓat ɓa

³ Ɗiy sula wadawaŋ matak an dəslereŋ ɓa sa?

⁴ Ɓoolu wahəm a muyã an zəga nampər tay arah ɓa sa? Wət ɓoolu wahəm a vov nan an zəga tay arəm ɓa sa?

⁵ Bəŋga wabət ammba pew̃eŋ an zəga tay nakkənən adak ɓa sa? Bizwil waprət ɗar məza zəga tay arəm ɓa sa?

⁶ Kaffoni gozloro nadda ama əlpa məza mekret ɗiy əzlah ɓa sa? Tatwãh wagəɗ a walaŋgəla-metiŋ məza Yawe dəɗɗa ɓa sa?

⁷ Yawe Maŋgəlva aɗɗa zəga məza ərban məɗama nan sit məɗɗaŋ wəza nan məskəleŋɗe ɓa ɓa.

⁸ An ɓoolu ahəmək na, naway məs geslne ada na ɓa di? Yawe Maŋgəlva apelke, naway məs agəɗ na kəleŋ ɓa di?

Ətawwən aka Samari

⁹ Mətəl ma azet gəleɗe mogget na Asdod gəm naka dələv na Eziptə, mənah na: «Mekkal aket mossorgeɗe gugriɗ na Samari, mula ɗarɗar naddəvən diyɗaŋka, gəm əzəmsahã an dədaɗɗa addəvən.»

¹⁰ Dəsənaŋ əɗɗa moggon ɓa «ndəɗaŋ məkkalanən zəga mərəhən də gagay gəm də popoho addivit gəleɗe net moggetiŋki.» Yawe aɗiymani.

¹¹ Vini yi, an Yawe Maŋgəlva anah yaŋka: «Mossok wasərŋgəsl dəlva, waddakan gbogboŋ noko, wande zəgeɗ naddivit gəleɗe nok moggetiŋki.»

«Əkõh» məza də ənnek ɓa

¹² An Yawe anah yaŋka: «Va məzutaɗa adawmõh təl zəga sula awaniɓa metteɓ sləman səma ɓoolu, vas adawmõhnin mə Israyelɗe məs dəssoŋ də gəla a Samari, dəssoŋ aket zəgeɗ nawvoŋ may aket ontoŋɗe kukuɗɗeŋki.»

Əhãyã

¹³ Yawe Maŋgəlva Məzuɓappak aɗiymani. «Məpak sləmokum, məprəman sit kirtin Yakob an məpel aketi:

¹⁴ Vi pay nədawsilyaw ətawwən aka kiɓəɓəl na Israyel, wanətaw aka wən net matuyaɗe na Betel, kaŋzluti mohoŋɗe na matuya vani, wabətaŋ afuŋ.

¹⁵ Wanəɓzlu gəla na təlapaya, də gəla na dabbiya pakə. Gəleɗe na gozlobekne wazaŋgə! Gəleɗe gugriɗes wabzlaŋgə!» Yawe aɗiymani.