Amos 2 - Bible en Guidar

Sit mə Mo'abɗe

¹ An Yawe apel yaŋka: «Aka əɓoŋ an na Mo'ab aɓoŋ təl hoku gəm aka əɓoŋ poɗo, nəppan na wən an nəziwgin ɓa, Vi azlek sleŋsleŋɗe na məlĩ na Edom ka ɗama.

² Wanəslən offo aka Mo'ab, wazim gəleɗe mogget na Keriyot. Mo'ab wamtə addəv hoyohoyo diyɗa, addəv vaŋvəl nawgaya may ɓaɓəlma gozloro.

³ Wanəzan mətawwən nananda, wanəbey ɗiy gugriɗ nan pak sap dəndəni.» Yawe anahə.

Sən Yuda

⁴ An Yawe apel yaŋka: «Aka əɓoŋ an ɗiy na Yuda aɓoŋ təl hoku gəm aka əɓoŋ poɗo, nəppan na wən an nəziwgin ɓa. Vi azganənək mahenziŋ na Yawe gəm dərmenin əsəɓɗe nan ɓa, tepelkeɗ net məs efiŋgiɗit azban nek ezetinke.

⁵ Wanəslən offo aka dələv na Yuda; wazim gəleɗe mogget na Yerusalem əŋki.»

Ətawwən aka Israyel ( 2:6—6:14 ) Sən Israyel

⁶ An Yawe apel yaŋka: Aka əɓoŋ an Israyel aɓoŋ təl hoku gəm aka əɓoŋ poɗo, nəppan na wən an nəziwgin ɓa: vi avilinik ɗiy en təstəs ammbet koɓeɗi, məzuray tam ka hensek təl ɗəf taka.

⁷ Vi aŋglaŋgək ula burɗuk naka dəlvafuŋ aka kiyit ɗiy məddekti, ndəɗaŋ ədoɗonən tive net məssehẽŋɗe. Ɗəf də afən əddoŋ azat waŋ taka, vas adawraygənən iya naw salalaŋka.

⁸ Aket lukutɗe mətefit bas ka dəmən adawvoŋ aba matuya pakə. Tahəŋ əsanən mbazla məs afaɗgitin ɗiy addəv gəla net meŋgilveɗ neti.

⁹ Ya naw nəzetik mə Amorɗe səbeti. Mə Amorɗe məs əɓay net va na wəlaŋga na Liban, məs ɓəɓəl net va na wəlaŋga adawyaŋ Elon. Nəzanək uwa net sə disiŋ gəm səwerit sə kəlafuŋ.

¹⁰ Yaŋ naw nəgilgukum səka dələv na Eziptə, nəbbalokum a kapta-muyã wəzva kaklaw poɗo, vi kawmõh dələv net mə Amorɗe ka nokum.

¹¹ Nəsɗuwik məskəleŋɗe sə waleŋgit kirtukum, gəm məwele də əsway ammban sən Yawe sə weleŋgit gewleɗ nokum, gesiŋgi ɓa sa mə Israyelɗe? Yawe aɗiymani.

¹² Yaŋ kipsitin mbazla sit məwele na Yawe, kəɗiyaŋ wən sit məskəleŋɗe də ənəh na: kədaɗɗaŋ kəleŋ ɓa.

¹³ «Ya in yakəŋ kammuskum va mawta net pilseŋge məknəhən adammus kevele.

¹⁴ Təki nawɗam na məs pepet wazə. Məs makran arəh na gbogboŋ nan ɓa. Badaway akõhgən na kiyən ɓa.

¹⁵ Məsən bəle aziw na ɓa, məs tələn nek akõh na ɓa, məpeŋ aka pələs akõhgən na kiyən ɓa.

¹⁶ Pay dəpas na, badaway məs dəday də makra səretis pak wanzan zən mekeleŋ.» Yawe aɗiymani.