Əgilye 9 - Bible en Guidar

Tatwãh mesle'eni: Gbəgba' net zəgeɗ memeyẽɗi (5)

¹ Yawe aɓsən Moyis na: «Dok aza Farawən, apel sən na: Vaŋ Yawe Maŋgəlva net mə Ibriɗ anahə: Appet ɗiy naw dəmbataŋ əɗɗaŋ suwən wəza.

² Vi an kəɓoŋgək dəppet əmbata, an kətekike,

³ va Yawe wasan aka gebet nok nawra, aket pilseŋge, aket korɗe aket zlogomeɗi, aket wasliɗe gəm gilewi! Gəbay mərma gədaki.

⁴ Yawe waɗi uɗak a weleŋgit gazlaŋɗe net mə Israyelɗe dit en net mə Eziptiɗi. Zəga tay namta səran net mə Israyelɗe beymet ɓa.»

⁵ Yawe aɗiyək pay ta'ə, amna: «Mazayni Yawe adaɗɗa zəgas aka dəlva.»

⁶ Yaŋ mazayən nan na, Yawe aɗɗak zəga naka: zəgeɗ memeyẽɗ net mə Eziptiɗ pak amtaŋka, ya net mə Israyelɗe na, tay dəmtə təttaka ɓa.

⁷ Farawən aslənəka yaŋ awla na zəga mamayã net mə Israyelɗe, təttaka tay dəmtə ɓa! Də as pak, makra Farawən aɓɓəlka; dəppet ɗiy əmbat ɓa.

Tatwãh masləre'ən: Məskaɗe (6)

⁸ Yawe aɓsit may Moyis də Aron na: «Məndə moŋglo na gulo, vokum ɗapɗap sula, Moyis dəndolgən a disiŋ a mahara Farawən.

⁹ Wakkpaŋ ologudum aka dələv na Eziptə pakə, wakkpaŋ məskaɗe məs met nziliw nziliw, azet ɗiy dit zəgeɗ memeyẽɗ naka dələv na Eziptə pakə.»

¹⁰ Andaŋgək moŋglo na gulo naka, yas aziwweŋ aba Farawən; Moyis andoluk a disiŋ, akkpaŋgək məskaɗe məs met nziliw nziliw azet ɗiy dit zəgeɗ memeyẽɗi.

¹¹ Məs teteleɗ dəɓap əziweŋ aba Moyis ɓa viyit məskaɗe neki, vi məskaɗe vet atəhənək zit məs teteleɗi gəm zit ɗiy na Eziptə pakə.

¹² Yaŋ Yawe aɓɓəlan makra Farawən, va Yawe anah sən Moyis naka, dəprəm met ɓa.

Tatwãh mabuhuloni: Ɓeɓrezle (7)

¹³ Yawe aɓsən Moyis na: «Asil pumu, dok aziw aba Farawən. Kənah səngən na: An Yawe, Maŋgəlva net mə Ibriɗ anah yaŋka: Appet ɗiy naw dəmbataŋ əgəɗ su wəza.

¹⁴ Vi kakaŋ na, wanəslin tatwãh akoko, aket məɗɗaŋ wəza nok gəm ɗiy noko, vi kəsəngən na, ɗəf tay aka dələv va in ɓa.

¹⁵ Va nətələk vaw nərgukuk dit ɗiy nok də gbəgba mərma na, kəta kəzək səka dəlva.

¹⁶ Nəppok madorok hara na: vi karban suk gbogboŋ naw kulagəni, vi iya naw dəbbalgən aka dələv pakə.

¹⁷ Noko, əssa nok mbərayni azet ɗiy nawa, Kəppet əmbat ɓa.

¹⁸ Mazayən pay va yaŋkəŋka, wanəzi ɓeɓrezleɗ gədakə, va Eziptə atəŋgə, dəgəɗ ɗah vas va kakaŋkəŋ ɓa.

¹⁹ Ya kakaŋ na, aslən əɗemet zəgeɗ memeyẽɗ nok də zəga an nok nawra pakə. Ɗəf də zəga mamayã dəsan awra, akkalaŋ na eŋgil ɓa ɓeɓrezleɗ waziyaŋ aketi, wamtaŋgə.»

²⁰ Ɗəf sə weleŋgit məɗɗaŋ wəza na Farawən, məs dəgeslne sən əpel na Yawe akõhgitik məɗɗaŋ wəza nan dit zəgeɗ memeyẽɗ nan eŋgili.

²¹ Ɗəf an dəɗi makran aka əpel na Yawe ɓa, nan appetik məɗɗaŋ wəza dit zəgeɗ memeyẽɗ nan awra.

²² Yawe aɓsən Moyis na: «Atəl vok a disiŋ, ɓeɓrezleɗ dəziyaŋ aka dələv na Eziptə pakə, aket ɗiy dit zəgeɗ memeyẽɗi, aka kevile nawra naka dələv na Eziptə.»

²³ Moyis atələk zleŋge nan a disiŋ, Yawe ahayka, yas ɓeɓrezleɗ də offo aziyaŋ aka dəlvafuŋ, Yawe aziyik ɓeɓrezleɗ aka dələv na Eziptə.

²⁴ Ɓeɓrezleɗ slaŋh-slaŋh də offo aziyaŋgək diyɗa: va ndən dəgəɗ ɗah aka dələv na Eziptə səza akkpaŋ vanday ɓa.

²⁵ Ɓeɓrezleɗ abeynənik zəgeɗ memeyẽɗ dit ɗiy dəssoŋ a muyã na Eziptə də kiste nawra pakə; aŋzletik wəleŋɗe nawra pakə.

²⁶ Dələv na Gosen kaka, a təki məs mə Israyelɗe assoŋgu, ɓeɓrezleɗ dəɗɗaŋ ɓa.

²⁷ Farawən aslənək iye may Moyis də Aron, anah sit na: «Kakaŋ na, nəgəɗək mbərayən; Yawe təstəsi; in dit ɗiy nawtə məsdarawɗe.

²⁸ Məkkaman Yawe! Wəhãy na Maŋgəlva dit ɓeɓrezleɗiŋ məkə! Wanəppokum kəmbataŋgəni, kənziyaŋ na ɓa.»

²⁹ Moyis, aɓsən na: «Pay nədagilwew sə walaŋgəla-metiŋ na, wanətəl vaw kəlaza Yawe; əhãy na buwən gəm ɓeɓrezleɗ assoŋ na əmpa ɓa, vi kəsəngən na, dələv na Yawe yi.

³⁰ Nəsənək na, is dit məɗɗaŋ wəza noko, kawgeslne'eŋ sənən Yawe Maŋgəlva ɓa'e.»

³¹ May ŋgərayã də palga arayaŋka, vi palga apokko, ngərayã tam tay əffiyo.

³² May temsele də toksor dərayaŋ ɓa, vi net dirɓe dirɓe adawpokoŋgu.

³³ Moyis agilik səza Farawən, sə walaŋgəla-metiŋ, atələk van kəlaza Yawe; əhãy na buwən dit ɓeɓrezleɗ pak aziwweŋke, buwən aɓərək dawzi aka dəlva.

³⁴ Adan Farawən awla na, buwən də wəhãy nani gəm ɓeɓrezleɗ aɓəraŋka, azbanək əɗɗa mambraya, yas aɓɓəlan makran ndən dit məɗɗaŋ wəza nani.

³⁵ Makra Farawən aɓɓəlka; dəppet mə Israyelɗe əmbat va Yawe anah də ma Moyis nak ɓa.