Əgilye 8 - Bible en Guidar

¹ Yawe aɓsən Moyis na: «Anah sən Aron na: Atəl vok də zleŋge nok aket məlpeŋge, lolohẽɗi gəm aket bobokɗe, agilgit eŋgeleŋɗe aka dələv na Eziptə.»

² Aron atələk van aket iŋkile na Eziptə; eŋgeleŋɗe agilyoŋguk slolɓoɓ slolɓoɓ aka dələv na Eziptə.

³ Yaŋ məs teteleɗ na Eziptə aɗɗaŋ tetele va neti: agilgitinin eŋgeleŋɗe aka dələv na Eziptə.

⁴ Farawən ayek may Moyis də Aron, aɓsit na: «Məkkaman Yawe dəzargit eŋgeleŋɗeŋ səzaw faraɗa, səzet ɗiy naw faraɗa, wanəppet ɗiy dəmbataŋgən əzaɓ-Maŋgəlva sən Yawe.»

⁵ Moyis anah sən Farawən na: «Istə kədawvay pay an dəslə suk nəkkamgən viyuko, viyit məɗɗaŋ wəza nok gəm viyit ɗiy noko, vi nawzargit eŋgeleŋɗeŋ faraɗa səzoko, faraɗa səddəvit gəleɗe noko, dəppaŋgən a Nil kaka'ə.»

⁶ Yaŋ amna: «Mazayni.» Moyis amna: «Va kənahə, vi kəsəngən na, ɗəf tay va Yawe, Maŋgəlva nam ɓa,

⁷ Eŋgeleŋɗe wazaraŋ səzoko, səŋgil anokda, sə net məɗɗaŋ wəza nokda, gəm səzet ɗiy noko faraɗa, dəppaŋgən a Nil kaka'ə.»

⁸ May Moyis də Aron agilyoŋguk sə na Farawən da. Moyis ahəmsənək Yawe aka wən net eŋgeleŋɗe məs ataw vi Farawən.

⁹ Yawe agəɗək va əpel na Moyis. Eŋgeleŋɗe amtaŋgək kakãh səŋgili, sə daŋla gəm sura.

¹⁰ Ekkeletinik kpewkpewi, dələv kpaŋ vərãhə.

¹¹ Adan Farawən awla na arahək effete. Aɓəlanək makrani, dəprəm met ɓa, va Yawe anahə.

Tatwãh mohoko'un: Birteŋɗe (3)

¹² Yawe anah sən Moyis na: «Anah sən Aron na: Aslan zleŋge noko, arga ologudum na dəlvafuŋ; dəkkpaŋ ka birteŋɗe aka dələv na Eziptə təhə.»

¹³ Aɗɗanənək vaska, Aron atələk van də zleŋge nani, yas arga ologudum na dəlvafuŋ. Birteŋɗe azzoŋguk aket ɗiy dit zəgeɗ memeyẽɗ pakə. Ologudum na dələv akkpaŋgək ka birteŋɗe aka dələv na Eziptə təhə.

¹⁴ Məs teteleɗ də tetele neti, aɗɗaŋgək va net vi kawtew birteŋɗe ya dəɓapnən ɓa. Birteŋɗe assoŋguk aket ɗiy dit zəgeɗ memeyẽɗ pakə.

¹⁵ Məs teteleɗ anah sənən Farawən na: «Va Maŋgəlva yi zəgaŋka.» Də as pak makra Farawən asanək ɓələ. Dəprəm met ɓa, va Yawe anahə.

Tatwãh mapoɗo'ən: Bembirɗe (4)

¹⁶ Yawe anah sən Moyis na: «Asil də mopumo pumu, aziw aba Farawən, awla, an agil əmbat kəla met iŋkile. Kənah səngən na: An Yawe anah yaŋka: Appet ɗiy naw dəmbataŋ əɗɗaŋ səwən wəza.

¹⁷ Vi an kəppet na ɗiy naw əmbat ɓa na, wanəslin bembirɗe akoko, aket məɗɗaŋ wəza noko, ɗiy noko, gəm aket gəleɗe noko. Gəleɗe net mə Eziptiɗ waknəhaŋ dit bembirɗe, də dələv məs adassoŋ akan dayday.

¹⁸ Pay nan na, kiva na Gosen, a təki məs ɗiy naw assoŋ na, wasan temme; bembirɗe assoŋ na adak ɓa, vi kəsəngən na in Yawe tə aka dəlvəŋka.

¹⁹ Wanəkõhgit ɗiy naw səzet ɗiy noko. Sekenes mazayən adarba.»

²⁰ Yawe aɗɗak vaska. Bembirɗe azzoŋguk gədak addəv gəla na Farawən, addəv gəleɗe net məɗɗaŋ wəza nani gəm aka dələv na Eziptə pakə; dələv arayək viyit bembirɗe.

²¹ Farawən ayek may Moyis də Aron, aɓsit na: «Məddoŋ məzaɓ-Maŋgəlva sən Maŋgəlva nokum aka dələv aŋka!»

²² Moyis amna: «Dədah naɗɗan vas ɓa, vi əzaɓ-Maŋgəlva sən Yawe Maŋgəlva naməŋka, zəga an mə Eziptiɗ azeleŋgi yi. Mə Eziptiɗ wawləmən də heret mənam əɗɗa an azeleŋ məza ndəɗaŋ əskəmən ɓa sa?

²³ Tive nasɓəta hoku aka ədaw a kapta-muyã mədaddamə, ka məzaɓgən-Maŋgəlva sən Yawe Maŋgəlva namə, va adawnah səmə.»

²⁴ Farawən amna: «Naw wanəppokum əmbata, kəzaɓəŋgən-Maŋgəlva sən Yawe Maŋgəlva nokum a kapta-muyã. Ya kan na Kədaddoŋ faraɗa ɓa hara! Məkkam ambawa.»

²⁵ Moyis amna: «Awle in tat əgilyew səzoko, wanəkaman Yawe, mazayin ləŋ na bembirɗe wazaraŋ səza Farawən faraɗa, səzet məɗɗaŋ wəza nan gəm səzet ɗiy nani, ya hara na, Farawən dəppan gabba əmas akamə, məza kamsak ətek ɗiy dadda əzaɓ-Maŋgəlva sən Yawe ɓa!»

²⁶ Moyis agilik səza Farawən, akkamanək Yawe.

²⁷ Yawe aɗɗak va əpel na Moyis. Bembirɗe azaraŋgək səza Farawən faraɗa, səzet məɗɗaŋ wəza nan gəm səzet ɗiy nani. Tay dəpəl tətaka ɓa.

²⁸ Də as pak na, Farawən aɓɓəlanək makrani, dəppet ɗiy dəmbataŋgən ɓa.