Əgilye 7 - Bible en Guidar

¹ Yaŋ Yawe anah sən Moyis na: «Awle, in tat əɗiyuk Maŋgəlva na Farawən, məlmuk, Aron wasan ka məskəleŋ noko.

² Nok apel an nəɗi suk wən nan pakə, Aron, məlmuk wapel sən Farawən, wappet mə Israyelɗe əmbataŋ səka dələv nani;

³ naw na, wanəɓɓəlan makra Farawən. Wanəwet sekeneɗ gəm sesergeɗe naw aka dələv na Eziptə,

⁴ Farawən aprəmkum na ɓa. Wanəɗi vaw aka Eziptə ya wanəgilgit dulaɗe nalpa net ɗiy naw mə Israyelɗe, səka dələv na Eziptə də wətaw wən gədakə.

⁵ Vasna mə Eziptiɗ wasənən na, intə Yawe, pay nədappar vaw aka Eziptə; nədawgilgit mə Israyelɗe sə weleŋti.»

⁶ May Moyis də Aron aɗɗaŋgək va Yawe aɗi sit wən nani; vas aɗɗaŋgək.

⁷ Wəzva na Moyis tay kaklaw dodopoɗo, na Aron, kaklaw dodopoɗo kiyən hoku, gala adawpeleŋ sənən Farawən.

Farawən aɓoŋguk daprim may Moyis də Aron

⁸ Yawe anah sit may Moyis də Aron na:

⁹ «Pay Farawən anah sukum na: An dəwəl sukum na məgəɗ sekene na, kənah səngən Aron na: Agəm zleŋge noko, azgan aba Farawən, dəkkpaŋgən ka dohõ.»

¹⁰ May Moyis də Aron azzoŋguk ana Farawən da, aɗɗaŋgək va Yawe aɗi sit wən nani. Aron, azganək zleŋge nan aba Farawən dit məɗɗaŋ wəza nani yas zleŋge akkpaŋ dohõ.

¹¹ Yaŋ Farawən tam aye məsmaɗɗulet dit mulaŋ helig na Eziptə, gəm məsteteleɗ na Eziptə, aɗɗanən tetele net tamə:

¹² Naway pak azganək zleŋge nani, akkpaŋgaŋgək dohõɗe. Yaŋ zleŋge na Aron asɗik zleŋɗe neti.

¹³ Də as pak makra Farawən aɓɓəlka; dəprəm met ɓa, va Yawe anahə.

Tatwãh maddaabəŋ: Iŋkile akkpaŋgaŋgək mbeli (1)

¹⁴ Yawe anah sən Moyis na: «Makra Farawən gədaki; aɓoŋguk dəppet ɗiy dawmbata.

¹⁵ Alvəɗ aza Farawən pumu, pay adawgilyen əmbat a met iŋkile. Aziw kələmsəngən a mabuzgum na Nil. Zleŋge məs dəkkpaŋ dohõ əŋ, kəgəmgən avoko.

¹⁶ Kənah səngən na: Yawe, Maŋgəlva net mə Ibriɗ, dəslənu ənah suk na: Appet ɗiy naw dəmbataŋ dəɗɗaŋ səwən wəza a kapta-muyã; yaŋ hã kakaŋka kəprəm ɓa.

¹⁷ An Yawe anah yaŋka: Aza aŋki kədawsənən na, intə Yawe: Awla, wanirge iŋkile də zleŋge na vawa, iŋkile na Nil wakkpaŋgaŋ mbeli.

¹⁸ Kilfeŋge na Nil wamtaŋgə, iŋkile na Nil waffokoŋgu, mə Eziptiɗ aɓapaŋ na əsenin ɓa.»

¹⁹ Yawe aɓsən Moyis na: «Anah sən Aron na: Agəm zleŋge noko, aslan vok aket iŋkile na Eziptə, aket lolohẽɗi, məŋkparɗe neti, gəm bobokɗe, a təki iŋkile assoŋ pakə; wakkpaŋgaŋ mbeli! Mbel wassoŋ aka dələv na Eziptə pakə, naddəvit hiŋgiɗ na wəlaŋga, va en naddəvit mesteɓeɗ net gərmeŋɗe!»

²⁰ May Moyis də Aron aɗɗanənək va Yawe aɗi sit wən nani, yas aslan zleŋge arge iŋkile na Nil a mahara Farawən gəm a maheret məɗɗaŋ wəza nani, iŋkile na Nil pak akkpaŋgaŋgə mbeli.

²¹ Kilfeŋge na Nil amtaŋka, Nil tay əffok diyɗa, mə Eziptiɗ aɓapən əsenin iŋkile na Nil ɓa. Mbel tahəŋ aka dələv na Eziptə pakə.

²² Ya vaski məs teteleɗ na Eziptə aɗɗaŋgə. Makra Farawən asanək ɓələ, dəprəm met ɓa, va Yawe anahə.

²³ Farawən aktohuk gəɓan siti, ndən mbat eŋgil ananda, dula azan va wən ɓa.

²⁴ Mə Eziptiɗ pak, aso'oŋguk iŋkile nawsa a mabuzgum, vi aɓapaŋ na əsaŋ iŋkile na Nil ɓa.

²⁵ Sədərɓaga Yawe arge iŋkile na Nil na, agəɗək əvoŋ buhulu.

Tatwãh masula'ən: Eŋgeleŋɗe (2)

²⁶ Yawe aɓsən Moyis na: «Dok aza Farawən anah sən na: Vaŋki Yawe anahə, appet ɗiy naw dəmbataŋ əgəɗ su wəza.

²⁷ An kəɓoŋguk dappet dawmbat na, awle wanəki tatwãh aka dələv nok təhə də əki eŋgeleŋɗe.

²⁸ Nil waknah dit eŋgeleŋɗe, wagilyoŋ kawtoŋ eŋgil anok da, a gizin nawvoŋ noko, aka zəga nawvoŋ noko, eŋgil anet məɗɗaŋ wəza nok gem anet ɗiy nok da, addivit guloɗe nok dit mosgoyɗe noko.

²⁹ Eŋgeleŋɗe wapeŋgeŋ azoko, azet ɗiy noko də azet məɗɗaŋ wəza nok pakə.»