Əgilye 6 - Bible en Guidar

¹ Yawe anah sən Moyis na: «Kakaŋ na wakula an nədawgəɗ sən Farawən: vi gbogboŋ na vawa, wappet əddoŋgu, ya də gbogboŋ na vawa, warɓehet səka dələv nani!»

Maŋgəlva aynanək man sən Moyis nawpəl mə Israyelɗe

² Maŋgəlva anah sən Moyis na: Intə Yawe.

³ Nərbanək zu aza Abraham, aza Isak gəm aza Yakob va Maŋgəlva Məzuɓappak, nərban zu azet də iya naw Yawe ɓa.

⁴ Də as pak na nəziwginik wənmiyna naw dənɗaŋgə, vi kapsit dələv na Kana'an, dələv məs assoŋ molhõyẽɗ addəvən.

⁵ Də as pak na, naw nəprəmək əhəm net mə Israyelɗe, vi mə Eziptiɗ tahəŋ əzəmgitin sahã, yaŋ nəɗɗum aka wənmiyna nawa.

⁶ Vini, anah sit mə Israyelɗe na: «Intə Yawe. Wanəgilgukum səka wəza na balam na Eziptə, wanəpəlkum səka balam neti, wanəkõhgukum də vaw gbogboŋgo gəm də wətawwən gədakə,

⁷ wanəndəkum kanawa, ka ɗiy nawa ya wanəsaw ka Maŋgəlva nokum. Wakəsənən na, in Yawe, Maŋgəlva nokum tə: məzugilgukum səka wəza na balam sə Eziptə.

⁸ Wanəkukum aka dələv məs nəgəm wən nan vi kapsən Abraham, sən Isak gəm sən Yakob. Wanəpsukum ka nokum. Intə Yawe.»

⁹ Vaski Moyis apel sit mə Israyelɗe, ya dəprəmən ma Moyis ɓa, vi wəgəsa nawɓəs net gəm wəza ɓəɓəl na balam neti.

¹⁰ Yawe apel sən Moyis də wənah na:

¹¹ «Doko! Apel sən Farawən, məlĩ na Eziptə. Dəppet mə Israyelɗe, əmbat səka dələv nani!»

¹² Yaŋ Moyis apel aba Yawe na: «Yaŋ na, mə Israyelɗe dəprəmnən maw ɓa. Mbari Farawən adaprəm maw də dədək na mawəŋ di?»

¹³ Yawe anah sən Moyis gəm sən Aron, aɗi sitik wən nan nadawrih mə Israyelɗe də Farawən, məlĩ na Eziptə, vi kawgilgit mə Israyelɗe səka dələv na Eziptə.

Iya net dihigiɗin Moyis də Aron

¹⁴ Eŋkiŋ migil gəla na uwa na afiti. Eŋkiŋ mahəlfa na Ruben, Ruben, Tiz na Israyel: Hanok, pallu, Hesron gəm Karmi.

¹⁵ Kirtin Simeyon: Yemu'el, Yamin, Ohad, Yakin, Sohar gəm Sawul, wətət mə Kana'ankə. Eŋkiŋ mahəlfaɗe na Simeyon.

¹⁶ Aŋki iya net kirtin Levi va zeŋvit asani: Gerson, Kehat, gəm Merari. Wəzva na Levi agəɗək səkat də kaklaw hoku kiyən buhulu.

¹⁷ Kirtin Gerson: Libni də Simey, aza mahəlfaɗe neti.

¹⁸ Kirtin Kehat: Amram, Yisehar, Hebron gəm Uzziyel. Wəzva na Kehat agəɗək səkat də kaklaw hoku kiyən hoku.

¹⁹ Kirtin Merari: Mahli də Musi. Eskiŋ mahəlfaɗe na Levi aza zeŋviti.

²⁰ Amram akaytək Yokebed, mamndayan ka guluk nani; tuwe sənək may Aron də Moyis. Wəzva na Amram agəɗək səkat də kaklaw hoku kiyən buhulu.

²¹ Kirtin Yisehar: Kore, Nefeg gəm Zikri.

²² Kirtin Uzziyel: Mika'el, Elsafan gəm Sitri.

²³ Aron agəmtək Eliseba, wətən Aminadab, məlmən Nason; tuwe sənək may Nadab, Abihu, Ele'azar, gəm Itamar.

²⁴ Gəm kirtin Kore: Asir, Elkana də Abiyasaf. Eskiŋ mahəlfaɗe na Kore.

²⁵ Ele'azar, wətən Aron, akaytək wətən Puti'el ka goni; tuwa sənək Pinhas. Eskiŋ migil gəla net mə Levi aza mahəlfa neti.

²⁶ Yawe, sit may Aron də Moyis anah sit na: «Migilgit mə Israyelɗe səka dələv na Eziptə, aza dulaɗe nalpa»;

²⁷ Moyis gəm Aron, ndəɗaŋgə dəpeleŋ sənən Farawən, məlĩ na Eziptə, kawgilgit mə Israyelɗe sə Eziptə.

Maŋgəlva tay əsɓan iynama nan sən Moyis

²⁸ Aka pay Yawe apel sən Moyis aka dələv na Eziptə,

²⁹ Yawe apel sən Moyis dawnəh na: «Intə Yawe, anah sən Farawən məlĩ na Eziptə an nənah sukuŋ pakə.»

³⁰ Moyis anah aba Yawe na: «In yakəŋ də dədək a mawa. Də tive mawan Farawən adaprəm su di?»