Əgilye 4 - Bible en Guidar

Maŋgəlva arbanək gagdak nan sən Moyis

¹ Moyis azlanəka: «Ya awle! Watafən wən naw ɓa, waprəmən maw ɓa. Vi wanahaŋ na: Yawe dərban zən azok ɓa!»

² Yawe aɓsən na: «Miy avokəs di?» Yas aɓsən na: «Zleŋge yi.»

³ Aɓsən na: «Azgan afuŋ.» Ndən firik əzgan afuŋ: yas zleŋge akkpaŋ dohõ, Moyis ɓak ənzan səbani.

⁴ Yawe anah sən Moyis na: «Atəl voko, arma kuturun.» Moyis atələk vani, armaka: dohõ nak kpaŋ zleŋge ammba vani.

⁵ «Vi dətafəngən na, Yawe, Maŋgəlva net afiŋgiɗit arbanək zən azoko, Maŋgəlva na Abraham, Maŋgəlva na Isak, Maŋgəlva na Yakob.»

⁶ Yawe aɓsən əmpa na: «Abas vok a mokroko.» Abasək van a makrani, ndən zargən sə makran na: van tay babar kaɗak kaɗak va ɓeɓrezlerizze, kokolo arosko.

⁷ Yas anah na: «Amndagan vok a mokroko.» Amndaganək van a makrani, ndən zargən sə makran na: van kpaŋ təstəs va gəba zəni.

⁸ Ya, an dətafnən gəm dəprəmnən sekene maddaabəŋ ɓa, asna watafnən ma an masulani.

⁹ Ya, an dətefnin sekeneɗ sules ɓa, dəprəmən mok ɓa, kəmbaɗgən iŋkile na Nil, kəggbo'gin aka dələvafuŋ; iŋkile kədawmbaɗ sə Nil əŋki, wakkpaŋgaŋ ka mbel aka dəlvafuŋ.

Maŋgəlva tay əwel Aron ka masula Moyis

¹⁰ Moyis anah sən Yawe: «Nəkkamokko Yawe, maw tay petpet aza wəpel ɓa, na dəfɗaŋgay dayday ɓa, nasuŋgoy dayday ɓa, səza kədawpel sən balam noki ɓa. Maw gədaki, dədək tay aza hərzlumuwa.»

¹¹ Yawe aɓsən na: «Naway dəpsən ma ɗəf di? Naway dədarma hərzlum ɗəfa, əsukun goryom, məzula ketek keteki may əkkpaŋgan daŋgar di? Kəsən na, in Yawe tə ɓa sa?

¹² Ya kakaŋ na, doko, IN TAT də moko, wanərban suk an kədawpele.»

¹³ Amna: «Nəkkomokko Yawe, kamə aslən ɗəf maɓɓan an kəŋgələ!»

¹⁴ Gədəv Yawe adək aka Moyis, anah sən na: «Nəsənək Aron mə Levi məlmuko, man gbi'gbi'iy ɓa, nan wapeli. Yaŋ dərəŋ əgilyen abok ələm suko; pay adawluko, zən wanneki.

¹⁵ Kəpel səngəni, kənah səngən an nawnəhã. Nawa, IN TAT də moko gəm də mani, wanərban sukum an kədaɗɗaŋ.

¹⁶ Nan wapel sit ɗiy a gəloko, wasan ka moko, wakəsok ka Maŋgəlva nani.

¹⁷ An dəwəl sən zleŋgeŋ na, agəm a voko! Dəndən kədaɗɗa sekeneɗi.»

Moyis amndanək azet ɗiy nani

¹⁸ Moyis ambatəka, amilik aza Yetro, afət goni, aɓsən na: «Kamə appaw ndawa, wanəmndaw azet milmiŋgiɗu a Eziptə, wanule, tahəŋ mederet əmpa sa?» Yetro anah sən Moyis na: «Dok zayə!»

¹⁹ Yas Yawe anah sən Moyis sə Madiyan na: «Doko, amndok a Eziptə, vi ɗiy məzukayanən zeŋgilok pak amtaŋka.»

²⁰ Moyis agəmtək ɗak nan dit kirtini, apeŋgitik aka koro, ndən buryok aka dələv na Eziptə. Moyis agəmək zleŋge na Maŋgəlva nak avani.

²¹ Yawe anah sənək Moyis: «Pay kədodok vi kawmilnya a Eziptə, Awle! Sekeneɗ nəpsuk pakə, kəɗɗegin aba Farawən. Ya naw, wanəɓɓəlan makrani, appet na ɗiy əmbat ɓa.

²² Kənah səngən Farawən na: Vaŋki Yawe anahə: Israyel iyi wətu uwa maddaabəŋ nawa;

²³ nənah sukuk na: Appan wətu dəmbat əgəɗ su wəza, yaŋ kəɓoŋ dappan əmbata! Ya asna wanəbay wutuk uwa maddaabəŋ noko.»

²⁴ Yaŋ aka tive, addəv əffete, Yawe arufo, akay əbayni.

²⁵ Sipora təgəmək ɗoro, tətaw magəmən wətəta, tənis aban dawnəh na ha'aw: «Zəlu net mbel kənani.»

²⁶ Ndəni appani. Tədawnəh na: «zəlu net mbeləŋ na», wən naskəl awray.

²⁷ Yawe anah sən Aron na: «Dok ələmsən Moyis a kapta-muyã.» Alək ələmsən aka gərəm na Maŋgəlva, yaŋ allam a makrani.

²⁸ Moyis aprəman sənək əpel na Yawe sən Aron pakə, dit sekeneɗ en aɗi sən naɗɗa pakə.

²⁹ May Moyis də Aron, addoŋgu, akkeletin ɗiy məsɓet net mə Israyel pakə.

³⁰ Aron apelik wən məs Yawe anah sən Moyis pakə, gəm aɗɗek sekeneɗ nek a maheret ɗiyi.

³¹ Ɗiy atafənək wən nani. Aprəmənək na Yawe akək wən ammbet mə Israyelɗe, awlak ərba wil neti. Ndəni agdukoŋ appu'oŋgu.