Əgilye 39 - Bible en Guidar

Lukutɗe net məsdəlveŋge: lukut na daya net məsdəlveŋge Lukut na daya net məsdəlveŋge

¹ Pəreŋge, pepreŋ witwiti, gəm holhõ holhõ, aɗɗetinik lukutɗe na mahenziŋ naɗɗa wəza addəv gəla na Maŋgəlva, yaŋ aɗɗaŋ lukutɗe na mahenziŋ sən Aron va Yawe aɗi wən nan sən Moyis.

² Agəɗ Lukut na daya net məsdəlveŋge na meleŋge, mənɗerin pəreŋ pəreŋ, pepreŋ witwiti, holhõ holhõ gəm na ngərayã kukulfut məɗəmən.

³ Akapanənək meleŋge sloprokko, mətaweti gabagaɗe naɗɗa aweleŋgi en mənɗerit va əffiyo na muŋgus, pepreŋ witwiti, holhõ holhõ gəm ngərayã kukulfut wəza na məbay gawla sən zəga.

⁴ Aɗɗaŋ sənənək helegeɗ mətokit a metteɓ man dahãdahã na əlawni.

⁵ Helegeɗ na lukut na daya net məsdəlveŋge nan məstaka də zəni: na meleŋge, mənɗerin pəreŋ pəreŋgi, pepreŋ va gozoy, holhõ holhõ gəm ngərayã məɗəmən va Yawe aɗi wən nan sən Moyis.

⁶ Aɗɗaŋgək gərmeŋɗe nzoloknzolok məgulit addəvit gəlet na meleŋge, mətipit va adawɗiyaŋ tampoŋ aka iya net mə Israyelɗe.

⁷ Atipik gərmeŋɗe naɗɗumet mə Israyelɗe nek aket helegeɗ na Lukut na daya net məsdəlveŋge, va Yawe aɗi wən nan sən Moyis.

Gabaga na makra

⁸ Agəɗək gabaga na makra, wəza na məbay gawla, va məɗɗa Lukut na daya net məsdəlveŋge na meleŋge, mənɗerin pəreŋ pəreŋgi, pepreŋ va gozoy, holhõ holhõ gəm də helege na ngərayã kukulfut məɗəmən.

⁹ Təkzlumən poɗo dakadaka məmaslən haran sula aɗɗanəni, zezek nan va ɗəf papar taka, slosloprok nan va ɗəf papar taka ləmasl sula.

¹⁰ Evereninik dit gərmeŋɗe na sləma wədor poɗo: wədor taka lawkakanya, nzoloknzoloku, gəm ma kolobo. Wədor an maddaabəŋgi yi

¹¹ wədor masulani: gərəm zulazula gəm təbəz ɓəɓəla.

¹² Wədor mahoko'ən: barbarə, lekeɗek lekeɗek, pepreŋ liwliwi.

¹³ Wədor mapoɗoni: dit en va mabazaya, en nzoloknzoloku, gəm en titir ɗesl ɗesli məgulit addəv gəlet na meleŋge nawŋgbeɗeɗeti.

¹⁴ Gərmeŋɗe vet aza iya na mahəlfa net mə Israyelɗe kəlaw kiyit sulaŋgə, məvertiŋ də əver na tampoŋ aza iya pakə, vi mahəlfa kəlaw kiyən sula yi.

¹⁵ Aɗɗanənək ngiyamɗe məturoɗit gəm məɗimit na meleŋge saksak aza gabaga na makra ɗəfa.

¹⁶ Aɗɗaŋgək gəlet na meleŋge sula, ndemeɗ na meleŋge sula, aɗiynin ndemeɗ sula nek aza metteɓ ma gabaga na makra ɗəf nak dahãdahã.

¹⁷ Agulininik everzleɗ məbaya na meleŋge nek azet ndemeɗ sula aka metteɓ ma gabaga na makra ɗəf naka.

¹⁸ Metteɓ met everzleɗ məbaya sula nek atokinik aza gəlet sula naka, aŋgbe'inik azet helegeɗ naza Lukut na daya net məsdəlveŋge kəlabani.

¹⁹ Aɗɗaŋgə ndemeɗ na meleŋge sula, aŋgbe'inik a metteɓ ma gabaga na makra, təkzlumun kəlaza Lukut na daya net məsdəlveŋge dəŋgili.

²⁰ Aɗɗaŋgək ndemeɗ na meleŋge sula, aŋgbe'in azet helegeɗ na Lukut na daya net məsdəlveŋge sula neki, aza gabbet dəbe go'o də təki əsap neti, disiŋ ki helegeɗ na Lukut na daya net məsdəlveŋge.

²¹ Asapanən gabaga na makra ɗəf nak dit ndemeɗ nan azet ndemeɗ na Lukut na daya net məsdəlveŋge də helege mənɗerin va əffiyo na muŋgus vi dəsangən aza gabaga nawlaw aka Lukut na daya net məsdəlveŋge, vasna gabaga na makra ɗəf van awzar səka Lukut na daya net məsdəlveŋge ɓa va Yawe aɗi wən nan sən Moyis.

Lukutɗe na matuya meɓɓeti

²² Lukut məsilip məs agəɗə, wəza na məskokono na gabaga yi, dəsangən mənɗerin va uffiyo na bəbərət mətəwək dəwənnani də lukut na daya net məsdəlveŋge.

²³ Wəla lukut məsilip addak təkiyi, tay va wəla lukut na təbəz nawgaya, mərmahən sulək ki man məza awngar ɓa.

²⁴ Aɗɗaŋgək motondoloŋɗe mənɗerit va uffiyo na muŋgus, pereŋ na gozoy, hõlhõ hõlhõ, gəm ngərayã məɗəmən aza gabba lukut məsilip vani.

²⁵ Aɗɗaŋgək weweɗe na meleŋge saksakə, agulnin weweɗe a weleŋgit motondoloŋɗe naza gabba lukut məsilipi, tərwəsl aweleŋgit motondoloŋɗe neki.

²⁶ Wewe taka, motondoloŋ taka, wewe taka, motondoloŋ taka naza gabba lukut məsilip tərwəsl naɗɗa wəza, vas Yawe aɗi wən nan sən Moyis.

²⁷ Aɗɗaŋgək lukutɗe na ngərayã kukulfuto, wəza na məskokono na gabaga sən Aron gəm sit kirtini.

²⁸ Gəm mətərkiya na ngərayã kukulfuto, zəgeɗ nawveret kulpupuɗe na məlĩ na ngərayã, fərŋgbəŋgbəŋɗe na ngərayã kukulfut məɗəmni.

²⁹ Gəm gabaga nawlaw na ngərayã kukulfut məɗəmən mənɗerin va əffiyo na muŋgus, pepreŋ na gozoy, holhõ holhõ, wəza na məbay gawla, va Yawe aɗi wən nan sən Moyis.

³⁰ Aɗɗaŋgək zəga nawsənən aza mətərkiya na meleŋge saksak nawɗi ɗəf aka wəza salala, məveri akan də əver na tampoŋ: Salala na Yawe.

³¹ Məŋgba'i halagak mənɗerət va əffiyo na muŋgus, kaŋgba'ən aka mətərkiya va Yawe aɗi wən nan sən Moyis.

Moyis asəŋgləkanək wəza an məɗɗan baymani

³² Vas wəza na gəla na gizlirke nalma də Maŋgəlva agrakə, mə Israyelɗe aɗɗanənək va Yawe aɗi wən nan sən Moyis dekdeki.

³³ Məkini təki nassa aza Moyis: gizlirke, zəgeɗ nan pakə, məŋgba'aɗe nani, bəlaŋɗe nani, məziyeɗ nani gəm təlni

³⁴ Məmbəka nan net gəbaɗe net ndergeyẽɗ məhimti, gəm məmbəka net gəbaɗe net kilfeŋge adawyaŋ na dofeŋ, məzeŋge na gabaga.

³⁵ Akoti na miziwe, gəm zleŋɗe nan də man namsani.

³⁶ Tabəl dit zəgeɗ nan pakə də peŋ nabani.

³⁷ Gəla lalam na meleŋge saksakə, lalamɗe nani wədor net lalamɗe taka, zəgeɗ nan dəwən neti, gəm mẽl nawkekeɓe' təkiya.

³⁸ Gəm təki nawzaɓ-Maŋgəlva na meleŋge, mẽl nappay na mahenziŋ, tursan nawzla, gəm məzlzlara na ma gizlirke.

³⁹ Təki nawzaɓ-Maŋgəlva na təbəz pepreŋge, gəm gazway nan na təbəz pepreŋge, zleŋɗe nan dit zəgeɗ nan pakə; ŋgefleŋ də zəga nawɗiyən akani.

⁴⁰ Məzlzlaraɗe na daŋgla, dədəkeɗ nani, təlni, məteŋge na maddamba na kirit memeŋgle. Helegeɗ nani, məmpaɗe nan dit zəgeɗ nan baymet na wəza na təki nassa na gizlirke nalma də Maŋgəlva.

⁴¹ Lukutɗe na mahenziŋ naɗɗa wəza addəv gəla na Maŋgəlva, lukutɗe ammba məsdələv Aron gəm lukutɗe net kirtin naɗɗa wəza na məsdəlva.

⁴² Vaski mə Israyelɗe aɗɗanən wəza van pak, va Yawe aɗi wən nan sən Moyis pakə.

⁴³ Moyis awlak wəza an aɗɗaŋ pakə, vas aɗɗanən dekdek va Yawe aɗi sən wən nani. Yas Moyis aɓuh sit ma.